Nafarroak 118 adingabe migratzaile gehiago hartu beharko ditu, eta EAEk ez du bat bera ere jaso beharko

Gazteria eta Haurtzaro Ministerioak Kanariar Uharteetara iritsi diren eta inoren kargura ez dauden adingabeak banatzeko taulak aurkeztu ditu gaur. Horien arabera, Euskal Autonomia Erkidegoa (EAE) ez dago behartuta adingaberik jasotzera, ezta Katalunia ere, orain arte egin duten ahaleginagatik. Nafarroak, ordea, 118 adingabe gehiago hartu beharko ditu.

EAEk 731 adingabe hartzeko gaitasuna du, baina egun 1.778 ditu.

Kataluniak iragarri du, gutxienez, aurreko kanpainetako kopuru berari (31) erantzuteko asmoa duela. Espainiako ¡Gobernuak aurreikusitako lekualdatze guztiak burutu ondoren ere, Katalunia izango da bere sisteman gazte gehien dituen erkidegoa, eta alde handiarekin.

Nerea Melgosa Ongizate, Gazteria eta Erronka Demografikoko sailburua pozik agertu da Ministerioak kontuan hartu duelako Euskal Autonomia Erkidegoak adingabe migratzaileak hartzeko "aldez aurretik egindako ahalegin etengabea": "Orain beste erkidego batzuek egin behar dute", erantsi du.

Horrela, Espainiako Gobernuak Kanarietatik 3.000 adingabe migratzaile beste lurralde batzuetara lekualdatzeko asmoa du, gehienak Andaluziara, Madrilera eta Valentziara, Gazteria eta Haurtzaro Ministerioko iturriek baieztatu dutenez.

Guztira, Espainiako Gobernuak artxipelagotik 3.975 adingabe eramateko asmoa du; baina, aurreikuspenen arabera, 850 inguru kendu beharko zaizkie, Estatuko harrera sareak hartuko baititu, asilo-eskatzaileak direlako, Auzitegi Gorenak emandako aginduarekin bat etorriz.

Honenbestez, datu horien arabera, Andaluzia (677 gazte), Madril (647) eta Valentzia (571) izango lirateke uharteetatik gazte gehien hartuko lituzketen erkidegoak.

100 milioi euroko funtsa

Espainiako Gobernuaren egitasmoak martxoaren 18an onartutako errege lege-dekretuak aurreikusten zuen 100 milioi euroko funtsaren banaketa jasotzen du, atzerritarrei buruzko legearen 35. artikulua erreformatzeko eta mekanismo hau sortzeko.

Lekualdaketa guztiak Ministerioak ordainduko ditu, eta Estatuak ordainduko ditu gazte guztien harrera gastuak, gutxienez, lehenengo hiru hilabeteetan.

Gainera, Ministerioak Aragoi, Balear Uharteak, Kanariar Uharteak, Kantabria, Errioxa, Ceuta, Melilla, Nafarroa eta Madrili kalte-ordaina emango die gain-okupazioagatik.

Datu horien arabera, Kanariar Uharteak izango lirateke baliabide gehien jasoko lituzkeenak, 24 milioi euro baino gehiago, eta, ondoren, Madril (15 milioi baino gehiago) eta Andaluzia (8 milioi baino gehiago). Nafarroak, berriz, 3 milioi euro baino gehiagoko ekarpena izango du.

Gazteria eta Haurtzaro Ministerioak Batzar Sektoriala deitu du datorren astearterako, uztailak 8a, 16:00etan. Bertan, datorren Konferentzia Sektorialaren gai-zerrenda aztertuko da.