Terrorismoaren kontrako operazioa abiarazi dute Ukrainan

Arsen Avakov Ukrainako Barne ministroak iragarri duenez, Ukrainak terrorismoaren kontrako operazio bat abiarazi du Slaviansk hirian (Ukraina hego-ekialdean), larunbatean errusiazale armadun batzuek hiriko polizia-etxea hartu eta Errusiako bandera udaletxean jarri ondoren.

Gobernuak abiatutako "terrorismoaren kontrako" operazioan, Ukrainako Segurtasun Zerbitzuetako agente bat hil da eta beste bost zauritu dira, Kieveko Barne ministroaren esanetan.

"Operazioa Ukrainako Segurtasun Zerbitzuek zuzentzen dute", idatzi du Barne ministroak Facebooken, eta gaineratu du herrialdeko indar armatu guztietako unitateek parte hartu dutela bertan.

Atzo Ukrainako Defentsa eta Segurtasun Nazionalerako Kontseiluak errusieraz hitz egiten den eremuetako krisiaren inguruan eztabaidatzeko deitu zuen urgentziazko bileraren ondoren egin ditu iragarpen horiek Avakovek.

Egoera bereziki larria da Donetsk eskualdean. Slavianks hiria, ia 120.000 mila biztanlekoa, eskualde horretan dago.

Errusiak, bestalde, Ukrainaren operazioa "agindu kriminal bat" dela esan du.

Armak uzteko astelehenera arteko epea

Oleksandr Turtxynov Ukrainako behin-behineko presidenteak asteleneheko 09:00ak arteko epea (08:00, Espainian) eman die errusiazaleei armak utzi eta amore emateko. Turtxynovek esan du ez dutela beste Krimea bat onartuko; alegia, ez dutela utziko Ukraina ekialdea Errusiara batzea, eta armekin erantzuteko prest daudela.

Premiazko bilera

Ukrainako egoera aztertzeko premiazko bilera deitu du Nazio Batuen Erakundeko Segurtasun Kontseiluak. New Yorken igandeko arratsaldeko zortziak (Euskal Herrian, goizaldeko ordu biak) direnean hasiko dute bilera.

Gerra Zibila

Errusiak adierazi du mendebaldearen esku dagoela Ukrainan gerra zibila ekiditea.

Errusiako Kanpo Arazoetarako Ministerioak komunikatu batean proposatu du NBEk eta Europako Segurtasun eta Kooperaziorako Erakundeak "urgentziaz" azter dezatela eskualde horietako krisia.

Errusia, "arerio"

Anders Fogh Rasmussen NATOko idazkari nagusiak Politiken egunkarian idatzitako artikulu batean esan duenez, Errusiak "arerioa balitz bezala hitz egiten eta jokatzen du".

Rasmussenek "Ukrainako muga ondoan Errusiako milaka tropa gerrarako prest" egotea kritikatu du, eta gaineratu du Mosku "Gerra Hotza bukatu zenetik ikusten ez genuen moduko propaganda-guda" egiten ari dela.

Errusiak Ukrainan erakutsitako jokabideak Mosku "isolatu egin du munduan" eta "bere sinesgarritasuna kolokan jarri du", azpimarratu du.

"Probokazioak eten"

Eskualdeko hiriburuan, Donetsk hirian, errusiazaleek Gobernuaren egoitza hartu zuten orain astebete, eta atzo Barne Ministerioko Eskualde Departamentuko egoitza hartu zuten.

Andrei Desxitsa Ukrainako Kanpo Arazoetarako ministroak "Moskuk probokazioak bertan behera uzteko" eskatu zion Sergei Lavrov Errusiako homologoari.

Kieven arabera, "probokazio horien helburua" da Ukraina, Errusia, Europar Batasuna eta Amerikako Estatu Batuetako diplomaziaren buruek Genevan egin nahi duten "bilera zapuztea".

John Kerry AEBko Estatu idazkariak atzo Moskuri ohartarazi zion "ondorioak" izango direla Errusiak tentsioa baretu ezean.

NBE, irtenbide baketsuaren bila

"Ukrainak bizi duen egoeraren aurrean", elkarrizketarako deia egin du Ban Ki-Moonek, eta gaineratu du gatazka ez dela bi aldeetako inoren mesedetan.

Horrez gain, tentsioa baretzeko eta "desberdintasun guztiez eztabaidatzeko", "urgentziazko elkarrizketa eraikitzailea" egiteko eskatu du. NBE irtenbide baketsu bat lortzeko lan egiteko prest dagoela azpimarratu du.

Mariupol ere hartuta

Errusiaren aldeko zenbait manifestarik Mariupol hiriko udaletxea hartu dute, Donetsk eskualdean, Ukrainako hegoaldean, zenbait hedabide digitalen arabera.

"Donetskeko Errepublika" sortzearen aldeko ekitaldi politiko baten ostean hartu omen dute udaletxea.

LB.ua hedabide digitalak jasotzen duenez, maskarak jantzita zeramatzaten manifestari batzuk eraikin barrura sartu dira, leiho batzuk apurtu ostean, eta bandera ukrainarrak kendu eta Donetskeko banderak jarri dituzte.

Errusiazaleek udaletxetik altzariak atera dituzte eta barrikadak egin dituzte.