Ereduak

Handienak ginen, azkarrenak, bizkorrenak. Bagenekien zein zen gure bidea, gure helburua. Etorkizuna antolatuta geneukan eta bide urraketarik ez zen izango. Auto onenak egiten genituen, sendoenak. Beste inork baino kotxe gehiago ekoizteko gai ginen, eta gainera, gure soldatek eta lan baldintzek ez zuten munduan parekorik. Eskuzabalak ere izan gara lana, aberastasuna eta oparotasuna 45 herrialdetara eraman ditugulako eta herri horietako langileak gureak bezain lehiakorrak izatea lortu dugulako. Langileek zuzeneko parte-hartzea dute egitasmo eta erabakietan, jabeen artean erakunde publikoak ere badira, eta egiten dugunak arro sentiarazten gaitu elkartasuna eta aberastasuna zabaltzeaz batera herri oso baten izaera eta lana egiteko era ikur nagusitzat dugulako.

Eta orain zer? Zintzoenak, zuzenenak tranpa egin duenean norengana jo behar dugu? Alferrok, iruzurgileok zer esan genezake? Europako herri indartsuenaren oinarriek dar-dar egiten dutenean non dago babes lekua? Gure kontra esan zituztenak noren zerrendan erantsi behar ditugu?

Volkswagen munduko auto konpainia handienetakoa da, 600.000 langile ditu, 45 herrialdetan ditu lantegiak eta beretzat beste bi miloi langilek lan egiten dute. Greziak baino aberastasun handiagoa sortzen du. Baina, itxuraz ez zen nahiko. Munduko lehenak izan nahi zuten, eta horretarako, Estatu Batuetako merkatua ezinbestekoa zuten. Han, gainera, beste konpainia batzuk arazoak zituzten, kili-kolo zebiltzan eta egoera aprobetxatuta, Volkswagen nagusi bihurtu zitekeen. Eta ataka horretan baten batek erabaki zuen ordura arteko bidetik ateratzea zilegi zela, helburuak merezi zuelako. Orain ohartu dira behar ez zituzten irabazi horiek, inork eskatu ez zuen erabateko nagusitasun horrek hondamendira eraman lezakeela konpainia osoa. Urtetan egindako lana eta ahalegina arriskuan daudela eta batez ere irudia, ukitu eta neurtu ezin daiteken konfiantza eskuartetik joan zaiela.

Uste genuen onenak ginela. Goian, iparraldean gaudenok munduaren ikuspegi egokiena genuela eta behekoek, hegoaldekoek, gauzak gaizki egiten zituztela, alferkeriaz edo ezjakintasunez. Orain aitortu beharko dugu agian ez garela hain ezberdinak, eta agian beste horien lekuan izan bagina gure jokaera ez litzatekeela hain ezberdina.