Asmoak eta lorpenak

Estatu Islamikoak Sirian zeukan azken gotorlekua galdu du, Estatu Batuen laguntza duten miliziano kurduek menderatu dituzte Al Baghuz hirian borroka luze eta gogorraren ondoren. Gerrillari islamiarrek 2014an benetako estatua sortzea lortu zuten Irak eta Siriaren artean. Mosul izendatu zuten kalifa-herriaren hiriburu, zortzi miloi biztanle izatera iritsi zen estatu hori, Erresuma Batuaren zabalera eta diru asko eman zien aberastasuna izan zuten mendean, batez ere erregai ustiategiak. Kalifa-herria aro garaikidean izandako gertaera bitxi eta harrigarriena izan da, gerrillari talde batek mundu guztiaren kontra, Armada indartsuenen aurka, baliabide modernoenak erabilita Erdi Aroko eraikuntza politiko-erlijiosoa sortu du.

Abu Bakr al Bagdadik Mosulgo meskitan bere burua kalifatzat hartu, kalifa-herria aldarrikatu eta mundu guztiko musulmanei bere esanetara jartzeko deia egin zienean, Mendebaldean barre egin genion, leku askotatik, baita herrialde arabiar eta musulmanetatik ere, kritikak jaso zituen, baina jende askok, herrialde guztietako fededun ugarik itxaropenez jaso zuen berria. 40.000tik gora dira Kalifa-herria babestera joandako gerrillariak, asko eta asko mendebaldean jaio eta hazitakoak. Beste asko ez dira gai armak hartzeko, ez lukete Estatu Islamiarrak adierazi eta egiten duen guztia onartuko, baina aspaldiko partez, umiliazio mugagabeen eta neurrigabeen ondoren harrotasuna erakusteko arrazoia ikusi dute Mosulgo aldarrikapenean.

Mendebaldeak, munduko jabeek, beldur diete, kezka azaldu dute. Boterea, aginte gorena lortzeko lehian dabilenak nahiago du beldurra eragitea, aldeko jarrerak edo maitasuna sortzea baino. Estatu Islamikoak sare sozialen bidez, ikus-entzunezko tresnak maisutasunez erabilita batzuk izutzea eta besteak erakartzea lortu du. Erakutsi du edozeinek, horretarako borondatea badu, min egin liezaiokeela etsaiari, ekintzaile ausartak saria izango duela…

Gure buruan sartu ezin daitezken kontuak, gure pentsaerak sekula onartuko ez lituzkeen jokaerak, beste garai batzuetatik datozen hizlarien mezuak… Pizgarri eta suspergarri dira guztia galdu dutenentzat, irain eta bidegabekeria bortitzenen biktimentzat, euren bizitza kanpotik antolatzen dietela uste dutenentzat. Kalifa-herria desegitea lehen helburu bihurtu da mendebaldeko gobernuentzat, Donald Trumpek Estatu Islamikoa amaitu dela adierazi du. Baina Al Baghuzen erorketak ez du ezer aldatuko. Milaka familia surik gabeko infernura amilduko dira, baina Estatu Islamikoak milaka ekintzaile mobilizatu ditu, zer egin erakutsi die eta noren kontra jo. Herri arabiar eta musulmanetan ondoeza eta ezinegona handiegiak dira gerra hau irabazi dugula pentsatzeko.