Truss, Downing Streeten izango den hirugarren emakumea

Liz Truss Alderdi Kontserbadoreko buruzagi berri eta Erresuma Batuko lehen ministro berri izendatu dute, Rishi Sunak bere alderdikideari gailendu ostean. Berau izango da aurrerantzean Boris Johnson ordezkatuko duena. Nabarmentzekoa da kargu honetan egongo den hirugarren emakumea dela, Margaret Thatcher eta Theresa Mayren ondoren.

Erresuma Batuan, Trussek, azken boladan, Burdinazko Dama berriaren titulua eskuratu du, eta Margaret Thatcher lehen ministro ohiari dion begirune berezia azpimarratu dute askok. Krisi ekonomikoaren aurrean, zerga txikietan eta neurri ekonomiko liberaletan oinarritutako politikak babesten ditu.

47 urte ditu Trussek eta Ingalaterrako Oxford hirian jaio zen beti ezkertiartzat jo duen familia batean. Unibertsitateko garaian hasi zuen bere aktibismo politikoa, eta hasiera batean, Alderdi Liberal Demokratarenganako joera izan bazuen ere, laster aldatu zen hori; izan ere, bere ideiak Alderdi Kontserbadorerantz aldatu zituen.

Bere ibilbide profesionala ez zuen politikara bideratu hasiera batean, enpresa pribatura baizik, kontulari gisa. 2000. urtean, Hugh O'Leary senarrarekin ezkondu zen, eta bi seme-alaba izan zituen.

2001eko hauteskundeetan saiatu zen lehen aldiz Komunen Ganberako diputatu izaten. Lehen saio horretan galdu zuen, eta bigarrenean ere bai, lau urte geroago, bi kasuetan, West Yorkshireko barrutietan. 2006an lortu zuen lehenengoz kargu publiko bat, Greenwicheko zinegotzi gisa, Londreseko kanpoaldean.

Ondoren, David Cameronek begia bota zion, eta 2010eko hauteskundeetan diputatu izateko hautagai izendatzearen alde egin zuen, South West Norfolkeko gotorlekuan, toriek segurutzat jotzen zuten eserleku batean. Alderdiaren baseak alferrik saiatu ziren bere hautagaitzaren aurka egiten, eta Truss, azkenean, Komunen Ganberan sartu zen.

Gobernura bi urte geroago sartu zen, Hezkuntza Ministerioan, eta 2014an, Ingurumen sailera egin zuen jauzi. Brexit-aren aurka agertu zen, eta Erresuma Batua EBtik aterako zela baieztatu zenean, dibortzio horrek zekartzan aukerak defendatzen ahalegindu zen.

Johnson lehen ministro zela, 2019an, Nazioarteko Merkataritzaren ardura hartu zuen kabinetearen barruan, eta, bi urte geroago, Kanpo Arazoetako ministro izendatu zuten. 

Orain, Downing Streeten egongo den hirugarren emakumea izango da, Margaret Thatcher (1979-1990) eta Theresa May (2016-2019) alderdi bereko hiru kideen ondoren.