Erregaien prezioek igotzen jarraitzen badute, Europar Batasunak ez du baztertzen errazionamendua ezartzea

Europako Batasuna hainbat neurri aztertzen ari da, hala nola diesela eta kerosenoa errazionatzea eta erreserba estrategikoetatik petrolio gehiago askatzea, Ekialde Hurbileko gerratik erator daitekeen energia-krisi “iraunkor” baten arriskuaren aurrean, ostiral honetan Dan Jørgensen EBko Energia komisarioak ohartarazi duenez.

Komisarioak azpimarratu duenez, EBk “oraindik ez du hornidura-krisirik baieztatzen", baina kontingentzia-agertokiak prestatu nahi ditu, AEBk eta Israelek otsailaren 28an Iranen aurka hasitako gerraren ondorioen aurrean. Hala, erregaien prezioek igotzen jarraitzen badute, Europar Batasunak ez du baztertzen errazionamendua ezartzea. Irango gerra luzatuz gero, “energiaren prezioak altuagoak izango dira denbora luzez”.

Lehen erasoen ondoren, Brent petrolioaren prezioa ia 120 dolarrera iritsi zen, eta gaur egun 107 dolar inguruan dabil; hala ere, merkatuetan aldakortasuna mantentzen da, Ormuzko itsasartea itxita dagoelako. Itsasarte hori Teheranen kontrolpean dago, eta petrolio gordinaren itsas garraioaren % 20 handik igarotzen da.

“Egoerarik okerrenerako prestatzen ari gara, nahiz eta oraindik ez garen iritsi kerosenoa edo diesela bezalako produktuak errazionatu behar izatera. Hobe da prest egotea gero damutzea baino”, azpimarratu du EBko Energia komisarioak.

“Aukera guztiak aztertzen ari gara, eta argi dago zenbat eta larriagoa izan egoera, orduan eta gehiago aztertu beharko ditugula tresna legegileak ere”, gaineratu du. Airelineak daude keroseno-horniduraren inguruan kezka handiena duten sektoreen artean.