Goretti ziklogenesiak alerta laranja mantenduko du kostaldean gau osoan

Prezipitazioak ugariak izango dira goizean, baina itsasaldeko arriskuagatiko alerta laranja 06:00ak arte egongo da indarrean, lehen bi milietan. Aurrerantzean, egoerak pixkanaka hobera egingo du, eta abisu horia ezarriko dute, 21:00ak arte.

Horrez gain, arreta berezia jarri beharko zaie pasealekuetan eta malekoietan ur zipriztinei, eta, beraz, beste abisu hori bat aktibatuta egongo da 06:00ak arte. Euskalmetek beste abisu hori bat ezarriko du elurragatik barnealdean, 12:00ak arte.

Aldi berean, eguerdira arte alerta laranja egongo da indarrean Nafarroako Pirinioetan elurteengatik, 800-1000 metrotik gorako lodierekin, Ipar Euskal Herrian bezala, abisu horiak ezarriz, tenperatura baxuak, muturreko hotza, haizea, elurra eta izotza direla eta.

Goretti ziklogenesiak muturreko haize-boladak eragin ditu Europan ere. Frantzian 213 km/h-ko haize-bolada maximoak erregistratu dira, Normandiako kostaldean. Gainera, argirik gabe geratu dira 380.000 etxebizitza Frantzian eta 57.000 etxebizitza Britainia Handiko hego-mendebaldean, hegaldiak bertan behera geratu dira eta hainbat ikastetxe itxi dituzte denboralearen ondorioz.

Mendebaldeko haizea gogor jotzen ari da Ipar Euskal Herrian 100-110 km/h-ko haize-bolada maximoekin, eta kostaldean 120-130 km/h-koekin. Aurreikuspenen arabera, ostiral arratsaldetik aurrera baretuz joango da haize-boladen indarra, baina neguko denboralearen alerta mantenduko da.

Eusko Jaurlaritzak 2025-2026 Neguko Bidezaintza Plana aktibatu du, Euskadiko errepideetan segurtasuna bermatzeko. Planak elurra kentzeko makinak, garabiak, laguntza-ibilgailuak eta Ertzaintzaren patruilak aktibatu ditu, baita gatz eta gatzun kopuru handiak ere. Segurtasun Sailak gomendatu du arreta handiz gidatzea, abiadura moteltzea eta neguko pneumatikoak edo kateak erabiltzea; betiere, elurra egiten badu.

Ertzaintza eta larrialdi-zerbitzuak itsasora erori den pertsona bat bilatzen ari dira, Zurriola eta Ramon Maria Lili artean, Donostian. Lehen informazioen arabera, adineko gizon bat da. Donostiako itsas pasealekua itxita dago, "Goretti" ziklogenesiak eragindako ekaitzaren ondorioz.

Eusko Jaurlaritzako Segurtasun Sailak meteorologia abisuak berretsi ditu astebururako, "Goretti" ziklogenesi leherkorra dela eta. Izan ere, haize-bolada oso indartsuak dira gaur, batez ere kostaldean. Elur-kota 700 metrora jaitsiko da arratsaldean, eta olatu handiak espero dira. Horrekin lotuta, nabigaziorako abisu laranja indarrean mantenduko da, 5 edo 6 metrorainoko olatuekin.

Nafarroako Foru Komunitateko errepideetan ipar-mendebaldean prezipitazio iraunkorrak ari dira: Gainera, Pirinioetan elurra ari du 800 metrotik gora eta Erriberan haize-bolada oso gogorrak espero dira. Honako errepide hauek moztuta dira elurragatik: Zaraitzu–Ipar Euskal Herria (NA-2011) eta Otsagabia-Irati (NA-2012).

'Goretti' ziklogenesiak eragindako haize-boladen ondoren, zenbait hegaldi desbideratu edo bertan behera geratu dira. Oraingoz, normaltasuna da nagusi Loiuko aireportuan, bai irteeretan eta baita iritsieretan ere. Izan ere, atzo bost hegaldi desbideratu zituzten eta bat bertan behera geratu zen. Hala ere, egunean zehar egoera meteorologikoa aldatuz joango da, eta, beraz, adi egotea gomendatzen dute adituek.

Nafarroa egun hodeitsu eta euritsua izango du gaur, 'Goretti' ziklogenesiaren ondorioz. Ipar-mendebaldean prezipitazio iraunkorragoak izango dira. Pirinioetan, elur-kota 800 metrora jaitsiko da, eta izotza izango da puntu altuetan. Mendebaldeko eta ipar-mendebaldeko haizeak-bolada ere izango dira, bereziki Erriberan eta mendebaldeko mendilerroetan.

'Goretti' ziklogenesiak alerta meteorologikoa aktibatu du Ipar Euskal Herrian, ostiral gauerdira arte. Neguko ekaitza espero da, mendebaldeko haize oso gogorrekin, batez ere kostaldean. Hain zuzen ere, 100-110 km/h-ko haize-boladak, eta 120-130 km/h-ra heldu daitezke. Barnealdean ere boladak indartsuak izango dira. Arratsaldetik aurrera, egoerak hobera egingo du pixkanaka, baina kontu handiz ibiltzea gomendatzen da.

'Goretti' sortutako zailtasunekin batera, badira bestelako arazoak errepideetan. Adibidez, Biriatuko mugako pasabidea, AP-8an, itxita dago 3,5 tonatik gorako kamioientzat ostiral honetan, Frantziako nekazariek Mercosurrekin sinatutako akordioaren aurka egindako protesten ondorioz.

Goretti ziklogenesi leherkorrak mendebaldeko Europari eragingo dio aste honetan, eta Euskal Herrian ere eragina izango du. Fenomenoaren izenak alarma eta nahasmena eragin ohi ditu. Izenak aditzera eman dezakeena gorabehera, adituek azpimarratu dute ez dagoela leherketarik, prozesu atmosferiko hutsa da eta. Jarraian, argi eta erraz azalduko dugu fenomeno hori zertan datzan.

Irungo A-63  errepidea, Baionarako noranzkoan, moztuta dago bi noranzkoetan. Gainera, AP8ko muga itxita dago 3.5 tona baino gehiagoko kamioientzat.

Gipuzkoako hiriburuko Udalak ohar bidez jakinarazi duenez, urtarrilaren 10ean (larunbata) 09:00ak arte itxiko dituzte, eta, ondorioz, Santa Klara uharterako garraio zerbitzua ere etenda dago.

Eguerditik aurrera, alerta horian sartuko gara, haize-boladak eta elurragatik. Izan ere, mila metrotik behera izango ditugu elur-malutak. 700 metrotik behera egingo du gauera, eta prezipitazioak espero dira.

Euskal Herriko eguraldiak aldaketak izango ditu hurrengo egunetan, tenperatura baxuek markatutako gabonen ostean. Asteazken honetan, berriz ere, egun hotza izango da, Goretti depresioa iritsi aurretik.

Goretti ziklogenesia nabaritu da dagoeneko Euskal Herrian. Hain zuzen ere, atzo Urduñan eta Zaldiaranen 100 km/h-ko abiadurako haize-boladak izan ziren, eta Zegaman 89 km/h-koak. Haize zakarraren ondorioz, hainbat hegaldi desbideratu eta bertan behera utzi behar izan zituzten Loiuko aireportuan. Une honetan, Euskal Autonomia Erkidegoa abisu horian dago haize-boladengatik eta nabigaziorako arriskuagatik, Euskalmeten arabera.