Barakaldoko bi gazte eta Balmasedako bat, Santanderreko istripuan hildakoen artean

Hiru euskal gazte, kantabriar bat eta Almeriako beste bat dira istripuan hildakoak, Santanderreko Bocal kostaldeko pasabidean izandako istripuaren ondorioz. Gainera, Guadalajarako neska bat agertu barik dago.

Espainiako Gobernuak Kantabrian duen Ordezkaritzak jakinarazi duenez, bost hildakoak Barakaldoko 19 urteko bi neska, Balmasedako 21 urteko mutil bat, Camargoko (Kantabria) 22 urteko beste gazte bat eta Almeriako 20 urteko beste bat dira.

Desagertutako neska Guadalajarakoa da, 20 urtekoa; atzotik ospitalean dagoen neska, berriz, Elvillarkoa (Araba) da eta 19 urte ditu. 

Lanbide Heziketako zentro bateko ikasle talde bat zen, eta ibilbide bat egiten ari ziren Bocal hondartzaren eta Espainiako Ozeanografia Institutuaren artean. 

Leku horretan, zurezko hainbat pasabide daude, eta horietako bat igarotzen ari zirenean gertatu zen ezbeharra. Egitura hautsi egin zen eta denak itsasora erori ziren, haitz ugari dagoen eremu batean. 

Istripuaren ikerketa daraman epaileak baimena eman du dagoeneko identifikatuta dauden  hildakoen gorpuak entregatzeko; asteazken arratsaldean zehar espero da gorpu horiek entregatze. 

Kantabriako Larrialdietarako Zerbitzuak 16:45 inguruan jaso zuen abisua, eta erreskate operatibo zabala bertaratu zen istripuaren tokira.

"Hutsune beteezina", Barakaldon

Barakaldoko Udalak "sakon" deitoratu du atzo Santanderreko "zorigaiztoko" istripuan herriko bi gazte hil izana.

Ohar labur batean, Barakaldoko Udalak adierazi du "hiriko bi gazte hil izana atsekabe handia" ekarri duela hirira eta "bete ezinezko hutsunea" utzi dutela.

"Barakaldok biktimen gertukoen doluarekin bat egiten du, eta gaur hainbat laguni eragiten dien minarekin ere bat egiten du", gaineratu du.

Udalbatzaren eta Barakaldoko herritar guztien izenean, Udalak bere "doluminik sakonena eta maitasunik handiena" helarazi die hildakoen familiei, lagunei eta hurbilekoei, "min handiko une hauetan".

Balmaseda, atsekabearekin bat

Bestalde, Balmasedako Udalak ere ohar bat plazaratu du, istripu tragikoak eragindako atsekabearekin bat eginez, eta azpimarratuz biktimen artean udalerriko 21 urteko gazte bat dagoela. “Gure doluminik sentituenak eta maitasun guztia” helarazi nahi izan dizkiete haren familiari, lagunei eta gainerako biktimen senide eta gertukoei; halaber, “Heraseko La Granja CIFPko hezkuntza-komunitateari” ere babesa adierazi diote.

Eusko Jaurlaritzaren babesa 

Bingen Zupiria Eusko Jaurlaritzako Segurtasun sailburuak Jaurlaritzaren babesa eskaini die Santanderreko Bocaleko pasabideko ezbeharrean hildako hiru euskal gazteen familiei, eta zauritutako gazte arabarra lehenbailehen osatzea espero du.

Erantzukizun "partekatuak"

Hugo Moran Ingurumeneko Estatu idazkariak (PSOE) asteazken honetan "hiru administrazioen erantzukizunaz" —Ministerioa, Kantabriako Gobernua eta Santanderko Udala— hitz egin du Bocaleko pasabideko tragedia dela eta, herritarren segurtasunari buruz galdetuta. 

"Herritarren segurtasunaren gaineko erantzukizuna hiru administrazioen ardura da", erantzun du Estatuko idazkariak ,istripuaren lekuan bertan, pasabidea noren esku dagoen galdetu diotenean.

Moranek adierazi du ezbeharraren nondik norakoak ikertzen ari direla, eta erantzun du "nahiko zaila" dela "erantzuleak aurkitzen saiatzea, arrazoia zein den ez badakizu".

Gema Igual (PP) hiriko alkateak hemeroteka aipatu du eta adierazi du obra Kostaldearen eta Itsasoaren Jasangarritasunerako Zuzendaritza Nagusiak (Espainiakoak) egin zuela. "Santanderko bizilagunek oso ondo dakite eta orain ez dugu ukatuko obra Kosta-agintaritzak egin zuela, santandertarren protestak eragin zituen, eta amaitu gabe zegoela beste proiektu batekin ordezkatu zen", adierazi du, eta gaineratu du ez dela orain hasiko inori erantzukizunik leporatzen, ez delako "horretarako unea".

Nolanahi ere, adierazi du administrazio bakoitzak dagokion dokumentazioa emango diola epaitegiari, izan daitezkeen erantzukizunei buruz ebatz dezan.

SER irrati kateak baieztatutako informazio baten arabera, bizilagun batek 112 zenbakira deitu zuen pasabidea txarto zegoela esateko, behera etorri baino 24 ordu lehenago.