Ibar auziko epaileak beste hilabete bat eman dio fiskalari lekuko berri bati buruzko erabakia har dezan

Pablo Ibarren auziaren ardura duen Estatu Batuetako epaileak hogeita hamar eguneko epea eman dio Fiskaltzari, lekuko berri bati deklarazioa hartzea beharrezkotzat jotzen duen ala ez ebatz dezan. Pablo Ibar Elkarteak jakinarazi duenez, lekuko horren testigantzak 1994an egindako erailketen zigorretik libre utziko luke presoa.

Luzapen berria duela egun gutxi onartu zen, Pablo Ibar ordezkatzen duen Daniel Tibbitt abokatuak epaileari idatzi bat aurkeztu ondoren.

Abokatuak salatu zuen akusazioak epaitegiak txostena egiteko ezarritako epeak ez dituela bete, bitan, lekukoak jendaurreko entzunaldi batean deklaratu behar ote duen argitzeko. Azken epea maiatzaren 13an amaitu zen.

Ibarren defentsaren arabera, lekuko berri horrek identifikatu egin zituen Ibarri egotzi zaion krimenaren benetako bi egileak, eta horrek errugabetu egingo luke floridatarra.

Elkarteak Fiskaltza isilik egotea kritikatu du. Haren esanetan, "Pablo Ibarren eta haren familiaren mina luzatzea baino ez du eragiten; hilabeteek aurrera egiten dute eta Estatuaren ordezkariak egoera hori saihesteko ez dute ezer egiten, eta hain hilketa ankerraren inguruko egia argitzeko inplikatu gabe jarraitzen dute".

Pablo Ibar bizi osorako espetxe-zigorra betetzen ari da Floridako kartzela batean, gaueko klub bateko jabea eta bi modelo hiltzeagatik zigortuta. Hala ere, beti adierazi izan du errugabea dela.