Denboraren makina lapiko bat da

Egunotan Donostiatik dabilenak erraz topatuko ditu Time Machine Soup iragartzen duten kartelak han eta hemen.  Denek akaso, ez dute argi izango datorren astean Tabakaleran egingo dena zer den.  Ikuskizuna happening ludiko bezela aurkeztu dutenez, azalpen argiago bat eskatu diogu Ziortza Basaguren Bizitzaren Itsasargiko teknikariari:“ Zentzumen guztiak airean jarriko dizkigun eta disziplina pilo bat nahasten dituen ikuskizuna da”, aurreratu du. Publikoaren parte-hartze zuzena izango duela ere badio.

Jorge Oteizak esan zuen behin gure eta kobazuloetan bizi ziren gizakien artean 80 amama baino ez daudela, eta hain zuzen, hortxe du oinarria ideiak. “Amonak izan dira beti sutondoan kultur transmisioaren ardura izan dutenak  eta zopa, su horren gainean mundu osoan eta garai guztietan  egon den jakia”, dio Basagurenek. Horregatik erabaki dute zopa izatea publikoa Europako historiako garai desberdinetara eramango duen elementua. Dena dela, 80 zopa egitea larregi izango litzatekeela iritzi diote eta 12 baino ez dituzte egin. Erlojuaren ordu bakotxeko bat.

Lan antropologiko handia eskatu du historiako 12 garai ezberdinetan zopak nolakoak izango liratekeen jakiteak, eta lan hori lapikora eramateko ardura Iñigo Cojo sukaldariarena izan da: “Garai batean espartarrek edo erromatarrek jaten zituzten zopen kopia zehatzak egingo bagenitu, zopa nazkagarriak irudituko litzaizkiguke, beraz, guk nahiko ikuspegi garaikidearekin kozinatu ditugu, gure gaur egungo gustuei egokituta baina aldi berean denboran zehar bidaiarazteko ahalmenari eutsiz”.

Ikuskizunera doan jendeak probatu egingo ditu zopok, baina Ziortza Basagurenek argi uzten du ez dela “ ez afari bat, ez dastatze bat”.  Izan ere, ez da lapiko kontuetara mugatuko ikuskizuna. Harkaitz Canoren testuek, Agurtzane Intxaurragaren arte eszenikoek eta Xabi Erkiziaren soinuek 12 garai ezberdin horiek girotzean ezinbestekoak izango dira, besteak beste.  Zopa beraz, ikuskizunaren parte baino ez da izango.

Otsailaren 11, 12, 13, 19, 20 eta 21ean egingo dute Time Machine Soup Tabakaleran, euskeraz eta gazteleraz. Sarrerak salgai daude dagoeneko 18 eurotan.

Kultura Alternatiboa

Programa ofizialetik kanpo ere badago non aukeratua  egunotan.  KA,  Kultura Alternatiboa izeneko plataformak Energia Olatuak ekimenean aurkeztu zuen  urte osorako 100 ekintza kultural alternatibo antolatzeko ideia, eta 20.160 euroko laguntza jaso dute horregatik. Honezkero martxan dago eurek diseinaturiko egitaraua eta  musika, antzerkia edota erakusketak biltzen ditu. “Kultura alternatiboa kulturaren %99 da. Merkatuan nabarmentzen diren artistak oso gutxi dira eta besteak izkutuan daude , eta guk Ikusezina den kultura ikusarazi nahi dugu”, dio Jokin Telleria KAko kideak. Izkutuan dauden artista horiekin osatu dute euren 100 ekimeneko programa.  “Helburua ekintza hauetan parte hartzen duten artistak eta aretoak KAren sarean sartzea da. Honez gain, artea supermerkatu, denda zein ilepaindegietara eraman nahi dugu. Leku guztiak dira onak artea zabaltzeko”, esan du Telleriak.

KAren programan hurrengo zita  Liher eta Aitor Nabarroren emanaldia izango da hilaren 12an Lasarteko Jalgi Kafe Antzokian. Egitaraua www.kulturaalternatiboa.com gunean dago ikusgai.