Erregeak doitasuna orekatzeko hazkuntza-neurriak eskatu ditu

Juan Carlos erregeak hazkuntza-neurriak eskatu ditu doitasuna orekatzeko, ohiko Gabonetako hitzaldian. "Gaurko uko egiteek biharko ongizatea bermatuko dute", nabarmendu du.

Erregearen hitzaldiak hiru ardatz izan ditu: Krisi ekonomikoa, "Espainiaren indarra" Europaren eta Iberoamerikaren barruan eta klase politikoan konfiantza berreskuratzeko beharra, "krisitik irteteko neurri moduan".

Krisi ekonomikoa

"Duela zenbait urtetik hona bizi dugun krisi ekonomiko larriak pentsaezineko intentsitatea, hedadura eta iraupena erdietsi ditu", esan du Juan Carlos erregeak.

Halaber, gazteenganako kezka azaldu du, eta honako hau esan du haiengatik: "Segurtasunik eta adorerik gabe altxatzen dira egunero, beren ekonomiaren egoera zailak, langabeziak eta zalantzazko etorkizunak eraginda".

Bestalde, "ezin dugu ukatu ezkortasuna badagoela, eta haren efektuak nabariak direla bizi dugun giro sozialaren kalitatean", esan du. "Ezkortasun hori instituzioetatik eta guztiok kezkatzen gaituzten zeregin politikoetatik aldentzea eragiten ari da", gaineratu du.

Erregearen hitzetan, austeritatea eta hazkundea bateragarriak izan behar dira. "Egungo uko egiteek etorkizuneko ongizatea bermatu behar dute", nabarmendu du. "Zentzuzko epe batean, gure gizarte garatuaren ezaugarri diren eskubide sozialak babesten direla ziurtatzeko", azaldu du.

"Gure ekonomia berriro haz dadin, geure kontuak konpondu behar ditugu, eta, aldi berean, aberastasuna sortuko duten estimuluak sustatu. Estimulu horietako batzuk politika ekonomikoaren eta fiskalaren bitartez sortzen dira, edo berrikuntza eta partaidetza bultzatzen duten politiken bidez. Baina krisi honetatik aterako gaituen lehendabiziko estimuluak konfiantza du izena", azpimarratu du.

Politika maiuskulaz

"Dena ez da ekonomia", azaldu du. Herritarrek politikariengandik duten pertzepzioak unerik onenak bizi ez dituela jakinda, politika eskatu nahi izan du, "krisitik irteteko orduan oinarrizko papera duelako".

Politika handia errebindikatu nahi izan du, "Gobernutik nahiz oposiziotik interes orokorrari eta herritarren ongizateri begiratzen diona. Pertsonak aurrez aurre jartzearen ordez, eta dibertsitatearekiko errespetua oinarri izanik, bilguneak integratzen dituena, indarrak batuz, ez bananduz".

Horretarako, "elkarrenganako errespetua eta leialtasuna bezalako balioak sustatu behar dira. Duela hiru hamarkada luze, balio horiek lagundu zuten elkarbizitzako esparru berria ezartzen, gure aniztasuna aintzat hartzen, eta Espainiako hizkuntza, kultura eta instituzioak babesten".

"Bada garaia aurrera begiratzeko eta ahal dugun guztia egiteko, zauri irekiak itxi daitezen, nabarmendu du.

Ahalegina eta sakrifizioa

"Koroa badaki nolako ahalegina egiten ari diren herritarrak adoretsu. Bizitzan egiten diren ahaleginak ez dira inoiz alferrik, eta egungoak ere baliagarriak izango dira", ziurtatu du.

Testuinguru honetan, "familien jarrera pairamentsua eta leiala nabarmendu nahi dut, baita erakunde humanitarioen elkartasuna ere", beren lanarekin, "mesede handia egiten baitiote gizartearen egonkortasunari". Halaber, eurentzako eta euren familientzako baldintza hobeen bila herrialdea uzten ari diren espainiarren sakrifizioa ere gogora ekarri nahi izan du.

Azkenik, Gabonak "eskuzabaltasunaren garaipenaren sinbolo" direla esan du, "norberekoikeriaren aurrean": "Eskuzabaltasuna, solidaritatea eta konpromisoa guztiok beti aintzat hartu, eduki eta sustatu behar ditugun balioak dira, batez ere bizi dugun garai honetan".