Arantza Quirogak dimisioa eman du

Arantza Quiroga badoa. EAEko PPren Presidentetza eta 20 urteko ibilbide politikoa utzi du, bizikidetzaren alorrean emandako pausoak porrot egin ostean. Askok egintzat ematen zuten dimisioaren iragarpena goizean egin du, Alderdi Popularrak Donostian duen egoitzan emandako prentsaurreko batean.

Sei egun eman ditu Quirogak agerraldi publikorik eta adierazpenik egin gabe. Sakelako telefonoa ere itzalita eduki du. Informaziorik ezak ezinegona eragin du EAEko PPko alderdikideen artean. Quirogak zer egin behar zuen ez zekiela esan zuen atzo bertan Nerea Llanos idazkari nagusiak.

Joan den asteazkenetik, 'Askatasun eta Bizikidetza' Lantaldea sortzeko mozioa erretiratu zuela iragarri zuenetik, egon da isilik Quiroga. Alderdi guztiak, EH Bildu barne, bizikidetzaren inguruko akordio batera biltzeko saiakera bertan behera geratu zen egunetik, hain justu. "Kale egin dut akordioa lortzeko saiakera horretan. Zintzoena alde egitea da, beste batzuek lekukoa har dezaten", aitortu du.

"Banoa, baina alderdi honek bere bideari jarraituko dio, aurrera ateratzeko prest dauden pertsonak badaudelako, eta proiektua badagoelako. Nik baino askozaz hobeto egingo dute", agertu du.

Sei egunotako "isilunea"ren nondik norakoak azaldu ditu agerraldian. Quirogaren hitzetan, mozioa atzera botako zuela iragarri eta biharamunean jakinarazi zion Maria Dolores de Cospedal PPko idazkari nagusiari dimititzeko asmoa zuela. Honek, baina, "ondo pentsatzeko" eskatu, eta mozioa atzera botatzeko eskatu ziotenean "gaitzesteko" asmorik ez zutela argitu zion.

Bizikidetza helburu

Mozioaren harira, egindakoa "ondo" egin duela sinetsita, "mila aldiz" aurkeztuko lukeela esan du Quirogak, Alderdi Popularra "bizikidetzaren, egiaren eta biktimekiko justizia bilatzeko orduan abangoardian" izan behar dela iritzita.

"Hori izan dut helburu politikan aritu naizen urte luze hauetan. Uste dut, orain, ETAk hiltzen ez duen honetan, aurrerapausoa eman behar genuela eta bizikidetzan aurrera egin, horren alde borrokatu dugu eta hainbat urtez".

"Hori da bidea", erantsi du, eta "gaur-gaurkoz posible izan ez bada ere", ziur da denbora bat igarota, "berriro aurkeztuko dutela". "Espero dut alderdikideak ausartak izatea", erantsi du. "Ez da helburu politiko bat, gizarte helburu bat baizik", borobildu du.

Biktimak

Halaber, egun hauetan isilik egon dela-eta, bere jarreragatik "deseroso" sentitu direnei barkamena eskatu die.

Biktimei ere zuzendu zaie, eta mozioarekin "irainduta sentitu diren edo erabakia ulertu ez duten biktimei" barkatzeko eskatu die. "Ez diet inoiz minik egin nahi izan", azpimarratu du. Izan ere, argudiatu duenez, "euren ahotsa" izateko lanean izan da urteotan, "euren duintasunak eta memoriak euskal gizartean merezi duten lekua izan dezaten".

Era berean, euren "ulermena" helarazi dioten biktimei eskerrak eman dizkie. Alderdiko kideentzat, batez ere Cospedalentzat eta Nerea Llanos EAEko PPko idazkari nagusiarentzat, esker oneko hitzak izan ditu, erakutsi dioten "leialtasunagatik".

Kazetari andana bildu da Quirogaren agerraldiaren berri emateko. Argazkia: EFE

Alderdiak eskatu zion mozioa erretiratzea

Kazetarien galderei erantzunda, mozioa erretiratzeko eskaera alderdiak, Estatuko zein Euskadiko kideek, egin ziola aitortu du Quirogak. Atzera egitearen erabakia "erantzukizunez" hartu zuen, ez zuelako alderdi barruan "bere kasa zebilen bakarra" izan nahi. Edukia hizpide hartuta, "aparteko berrikuntza ez" zela nabarmendu du. "Orain ez du inork edukia zalantzan jarri", erantsi du

Hala, aitortu du ez dela "bidezkoa" "jarreraren bat izan zen, egunkari bateko azal faltsuren bat, eta horrek eragin zuen dena".

Alderdiaren gaitzespena jasan ote duen itaunduta, ezezkoa erantzun du Quirogak. Mozioa erretiratuko zuela jakinarazteko prentsaurrekoan, ordea, hala sentitu zela onartu du.

"Premiazko erabakiak"

Borja Semper Gipuzkoako PPko presidenteak adierazi du alderdiak "premiazko erabakiak" hartu behar dituela Arantza Quirogaren dimisioaren ostean. Erabaki horiek "Euskadin" hartu behar dituztela jakinarazi du, "EAEko PPko militanteen artean".

"Quirogaren erabakia zein den jakin dugu eta hori ekintza politikora eraman behar dugu orain", adierazi du Semperrek Eusko Legebiltzarreko pasabideetan, Quirogak dimisioa eman duela jakin ostean. Semperrek Quirogaren lana goraipatu du eta, esan duenez, "ez da oharkabean igaro euskal politikatik", baina alderdia ezin da "zehaztasunik ezean" gelditu Semperren arabera. Hiritarrek "barne arazoetan murgilduta" dauden irudia hartu dutela uste du Gipuzkoako PPko presidenteak.

"Gauzak nola egin behar diren esaten digutela, horren irudia eman dugu, eta uste du Euskadiko PPk irudi hori albo batera utzi behar duela. Euskadiko PPko militanteek eta zuzendaritzak erabaki behar dute EAEko PP nork zuzendu behar duen", gaineratu du.

Bere aldetik, Alfonso Alonso Arabako PPko presidentea eta Osasun ministroak adierazi du Quirogaren erabakia "errespetatzen" eta "deitoratzen" duela. Aldi berean, EAEko PPko buruzagiei deia egin die "erantzun azkarra" emateko, "talde sendoa egiteko".