Sanchezek barkamena eskatu die sozialistei "merezi ez zutenengan" konfiantza izan zuelako, baina, "arduragatik" aurrera egin behar dela berretsi du

Pedro Sanchez Espainiako Gobernuko presidente eta PSOEko idazkari nagusiak barkamena eskatu die sozialistei, merezi ez zuten pertsonengan konfiantza izateagatik, eta PSOEk barne zein kanpo ustelkeria "garaituko" duela agindu du.

Mezu horrekin hasi du hitzaldia Sanchezek PSOEren Batzorde Federalean, eta bere alderdiak ustelkeriagatik bizi duen une zaila onartu duen gisan berretsi du, ez diotela erronkari ihes egingo. "Egoeraren ardura hartuko dugu", azpimarratu du.

"Barkamena eskatu nahi dizuet berriro ere zuei – sozialistoi –, oker nengoelako merezi ez zuten pertsonengan konfiantza jartzean", baina konbentzimendu berarekin  gaineratu duenez, "ez dugu hutsik egingo biziberritzeari ekiteko orduan". 

Sanchezek azpimarratu duenez sozialistak ez dira PPkoak bezalakoak. "Guk ez dugu ezikusiarena egiten", adierazi du, eta PSOE "jende onez, zintzoz, langilez, inoiz eskua kutxan sartuko ez lukeen jende umilaz" eginda dagoela azpimarratu du.

"Zuek aukeratu nauzue ontzi honetako kapitain. Eta kapitainak ez du ihes egiten itsaso txarra datorrenean, kapitaina geratu egiten da, denboraleari aurre egitera, norabidea salbatzera eta portua irabaztera", adierazi du PSOEko buruzagiak, txalo artean.

Bere hitzartzearen beste une batean, PP asteburuan egiten ari den kongresuan defendatzen ari den "agenda erreakzionarioaren" aurka egin du, popularrek, eta Voxekin batera "koalizio ultraeskuindar" bat prestatu nahi dutela nabarmendu du. Sanchezen arabera, horien proiektu politikoa ez da "eraiki nahi dutenaren arabera definitzen, baizik eta erakunde desberdinetara igotzeko aukeraren aurrean, indargabetu eta suntsitu nahi dutenaren arabera".

Hori da "koalizio ultraeskuindarrak, Alderdi Popularrak eta Voxek Espainiarentzat egindako promesa, agenda erreakzionario bat, agintean dagoen lekuetan gordintasun osoz agertzen dena".

"Feminista izatea ez da postureo ekintza bat"

Alderdiko Batzorde Federala hasi baino pixka bat lehenago, ntolakuntza idazkari laguntzaile izendatua izatera zihoan Francisco Salazarrek uko egin dio zuzendaritzako karguari, jbere aurkako hainbat jazarpen salaketa anonimo argitaratu ondoren.

Bere hitzaldian, Sanchezek militante eta kide sozialista guztiak animatu ditu sexu jazarpen kasuak salatzera eta alderdiak eskura jarri dituen eta salatzaileen anonimotasuna ziurtatzen duten barne kanalak eta salaketa sistema erabiltzera. "Babestu egingo ditugu", ziurtatu du.

"Feminista izatea ez da postureo ekintza bat" sozialistentzat, esan du Sanchezek, eta, ondoren, feminismoa izateko modu bat dela adierazi du, "pentsatzen den bezala bizitzea" eskatzen duen benetako konpromiso bat. "Pentsatzen badugu emakume baten gorputza ez dagoela salgai, ezin dira halako jokabideak onartu", azpimarratu du, eta PSOEk edozein jokabide matxistaren aurrean "zero tolerantzia" izango duela berretsi du. 

"Errespetua eta duintasuna", aldarrikatu du Espainiako Gobernuko presidenteak.

Gazako "genozidioaren" salaketa

Nazioarteko gaurkotasunari erreferentzia eginez, Pedro Sanchezek salatu du Israel Zisjordanian eta Gazan egiten ari denak "izen bakarra" duela: "genozidioa".

Buruzagi sozialistak nabarmendu duenez Espainia "itxaropenerako itsasargi" bihurtu da munduan "milioika pertsona aurrerakoirentzat", "bakearen eta nazioarteko zuzenbidearen alde" egiteagatik eta "multilateralismoari, garapenerako laguntzari eta 2030 Agendari" laguntzeagatik.

"Baita (Benjamin) Netanyahu lehen ministroa Zisjordanian eta Gazan egiten ari dena salatzeagatik ere, izen bakarra baitu: genozidioa", gaineratu du.

"Burua altxatu" eta aurrera begiratzeko deia

Sanchezek hamahiru neurri gehigarri ezartzea proposatu dio larunbat honetan alderdiaren Batzorde Federalari, erakundearen barruan ustelkeria prebenitzeko eta atzematen diren kasuak zigortzeko.

Irekiera hitzaldian aurreratu du Sanchezek hamahiru neurri horien proposamena, hiru ardatzetan biltzen direnak, eta horietako batzuk aipatu ditu, hala nola kargu kolegiatu gehiago sortzea eta funtsezko postuetan dokumentu askorentzako sinadura bikoitza ezartzea, bi kasuetan "kontrol gurutzatuko mekanismo" gisa.

PSOEko idazkari nagusiak Batzorde Federalaren hitzaldiari amaiera emateko, "burua altxatu" eta aurrera begiratzeko deia egin die sozialistei, "ustelkeriaren aurkako erabateko konpromisoa" berrestearekin batera.

Izan ere, 45 minutu inguru iraun duen hitzaldiaren hasieran esan duenez, "bihotza ukituta" duen arren, "ezbeharrei aurre egin eta horiek gainditzeko erabakimena oso-osorik" ditu. 

Azpimarratu duenez, "inoiz baino gogo eta determinazio handiagoa" du, ez soilik "eusteko", baizik eta "aurrera egiteko", "lortutakoari heldu eta mehatxatuta dauden aurrerapenak bermatzeko". 

"Zazpi urte hauetan lortutako guztia"-ren garrantzia aitortu ostean, sozialistei "aurrera" begiratzeko eskatu die, oraindik lortzeko dagoen horri so.