Aurrekontuak onartu eta gero hauteskundeak deituko dituela iragarri du Torrak

Quim Torra Generalitateko presidenteak Kataluniako hauteskundeak deituko dituela iragarri du asteazken honetan, baina ez du datarik zehaztu; izan ere, 2020rako Aurrekontuak onartuta deituko ditu hauteskundeak. Aurreikuspena da Aurrekontuak bizpahiru hilabete barru onartzea, hau da, martxoan edo apirilean.

Generalitatearen Jauregian egindako adierazpen instituzional batean, Torrak nabarmendu du Kataluniako legealdi honek ez duela "ibilbide politiko luzeagorik", ERCren "leialtasunik ezagatik". Kataluniako Parlamentuko presidente Roger Torrentek, ERCko kidea bera, "estalperik gabe" utzi duela esan du Torrak, eta nabarmendu du: "Gobernu batek batasuna behar du, komuneko estrategi partekatua, bazkideen arteko leialtasuna; bestela, ezinezkoa da ibiltzea".

Arratsalde honetan, 15:00etan, Kataluniako Gobernuak CatComu-Podemekin hitzartutako aurrekontu-proiektua onartuko du; Parlamentuan onartzeko nahikoa babesa du proiektuak, baina Ganberako prozesuak bi hilabeteko iraupena izaten du. Segur aski, alabaina, beste hilabete bat beharko du proiektuak onartua izateko, hain zuzen ere Estatutu Berme Kontseiluak oposizioaren helegiteen gaineko ebazpena eman arte.

Kataluniako Gobernurako "etengabeko arriskua"

Torraren esanetan, Parlamentuan aulkirik ez izateak "Presidentetza babesik gabe uzten du", eta, halaber, "etengabeko arriskuan jartzen du Kataluniako Gobernua"; hortaz, haren iritziz, "ezinbestekoa" da herritarrei berriro ematea hitza, "2017ko abenduaren 21eko agindu politikoa berritzeko".

"Nire herrialdean, erradikaltasun demokratikoaren hastapena errespetatzea nahi dut, bai eta Gobernuak eta Parlamentuak gehiengoetan eta konfiantzetan oinarritzea ere. Gehiengorik eta konfiantzarik ez balego, nire iritziz herritarrek zehaztu behar dituzte gehiengo berriak eta berritutako konfiantzak", adierazi du.

Presidenteak esan du "herrialdearentzat onena zein den" izango duela kontuan hauteskundeak deitzeko. Hauteskunde horiek balio beharko dute "agindu demokratikoa berregiteko", eta bideratu beharko dute aurrera egitea, "2017ko urriaren 1eko agindua gauzatzeko helburuan, alegia, independentzian. Denok bildu beharko gara berriro batasunean".

Aurrekontuak onartzeaz gain (Torraren esanetan, "hainbat defizit sozial askori konponbidea ematen lagundu beharko dute" Aurrekontu horiek), Torrak babestu du aztertzea "Espainiako Gobernuak benetako negoziazioari heltzeko borondate errealik ote duen".

Negoziazio horretan, Torrak espero du "gure herrialdeko gatazka politikoari heltzea; izan ere, espainiar Estatuak ezezkoa eman digu demokraziaz guztiz baliatzeari, eta ukatu digu autodeterminazio-eskubidea". Lehen hitzordua otsailaren 6an izango da, Pedro Sanchez Espainiako Gobernuko presidenteak eta Torrak egingo duten bileran.

ERCk ez du leialtasunik izan

Kataluniako presidentearen iritziz, ERCk ez du errespetatu "independentisten arteko adostasuna", haren diputatu-agiriari dagokionez; Torrak uste du Gobernuko bere bazkideek ez dutela "leialtasunik" izan gai horretan.

Hortaz, Torrak zehaztu du "edozein interesen gainean, herrialdea eta haren beharrak jartzeko garaia" dela, bai eta Aurrekontuak onartzeko garaia ere. Esan duenez, "herrialde Aurrekontuak" izango dira horiek.