"Gipuzkoa gidatzeko prest" da EH Bildu, eta EAJri eta PSEri herritarren interesen bizkar aritzea egotzi die

Maddalen Iriarte EH Bilduren Batzar Nagusietako bozeramaileak esan du Gipuzkoak ezin duela "gehiago itxaron" eta "lidergo aktibo eta hurbil berri bat" behar duela, erronka berrien aurrean "inertziak" eta "betikoak" ez dutelako balio.

Gipuzkoako EH Bilduk Herrialde Batzarra egin du larunbat honetan Beasaingo Igartza Jauregian, eta bertan 20 kidez osatutako mahai politikoa berretsi dute aho batez, tartean, joan den martxoaren 16an aukeratutako Batzorde Betearazlea, Nekane Zinkunegi buru- Batzorde horretako kide dira, halaber, Maddalen Iriarte, Zelai Amenabarro, Jon Zulueta, Lore Agirre eta Saioa Rodriguez.

Ekitaldi publikoan, Zinkunegiz gain, Maddalen Iriarte Gipuzkoako EH Bilduko bozeramaileak ere hartu du hitza, eta aldarrikatu duenez, Gipuzkoak "ezin du gehiago itxaron". "Gipuzkoa funtsezko une batean dago. Gipuzkoarrek, dauden tokitik, aurrera egin dute etengabe, sortu dute, abangoardia izan dira, maitatu dute, kezkatu dira, ilusionatu dira, baina erakunde batzuk atzean geratu dira, urrundu egin dituzte herritarrak, uxatu egin dituzte, betikoan jarraitzen dutelako", azpimarratu du.

Bere ustez, jendea urrundu egin da erakunde batzuk "inertzian eta paralisian" jarraitzen dutelako, eta gaineratu duenez, "gurea bezalako herri bati gerta dakiokeen gauzarik okerrena da geldirik egotea, mundua ziztu bizian biraka ari den bitartean; galdera berriak ditugulako, bat batean sortzen direnak, eta erantzun berriak eman behar dizkiegulako". Erronka berriei erantzuteko prest egon behar dela azpimarratuta, EH Bildu "horretarako prest" dagoela ziurtatu du. 

Lidergoak, hitzetik haratago, ekintzak behar dituela nabarmendu du eta Gipuzkoak behar duen lidergo politikoa gauzatzera datozela azpimarratu, "ezkerretik, feminismotik, jendea zainduz, aukera berdintasunetik, lurra zainduz, aberastasuna banatuz, euskaraz zaindu eta biziberrituz", egingo dutela azpimarratu du, "askatasunaren bidean, zutunik, tinko eta umil egingo dugu". 

Bestalde, Nekane Zikunegik lidergo partekatuak eta erakundeen arteko lan kooperatiboa defendatu ditu, alderdien eta eragile sozialen eta herritarren artean.

Bere hitzartzean, zera galdetu du: "Gogoan al dituzte herritarrak AHTren lotunea Ezkiotik ala Gasteiztik izan behar duen beren artean eta beren barnean eztabaidatzen duten alderdietako ordezkariek? Gogoratu al dira herritarren gaurko eta biharko beharrez sakoneko zerga erreforma ahaztu, berrikuspen soilera mugatu eta kenkarien bilduma soila adostu duten horiek?". 

Zinkunegiren ustez, "Gipuzkoan ere epe luzerako ikuspegia duten proiektu partekatuak eraikitzeko unea da". Zinkunegik azpimarratu du "gutxiengoan gotortuta" dagoela Gipuzkoako egungo Foru Aldundia "unean uneko kudeaketara mugatzen ari dena, gipuzkoarron interesak bazter utzita".  Horren aurrean, azpimarratu duenez, "EH Bildu prest dago lidergoa hartzeko, eta etorkizuneko erronkei abangoardiako erantzunak emateko Gipuzkoatik". Lehen indar munizipalista direla gogorarazita, azpimarratu duenez "ez diogu uko egingo herritarren aginduari, lidergo politikoa hartuko dugu eta gobernatuko dugu", gaineratu du.