EH Bilduk elkarlanerako deia egin dio EAJri, Euskal Herriaren aitortza nazionalean aurrera egiteko

EH Bilduk Arabako Mahai Politiko berria aurkeztu du larunbat honetan Gasteizen, 22 kide izango dituen organoa. Ekitaldi publikoan, Ibon San Saturnino EH Bilduren Arabako arduradun politikoak eta Eva Lopez de Arroyabe Arabako Batzar Nagusietako bozeramaileak hartu dute hitza. Politikarekiko "desafekzio garai honetan", EH Bilduko kideentzat "politika arduratsua betebeharra" dela esan du San Saturninok, baita "politika egiteko modu hori Arabako gizartea eraldatzen laguntzen" ari dela ere.

San Saturninok "eskua luzatu" dio herri osoari, EAJri aipamen zuzena eginez: "Bidea argi daukagu. Eta nahiz eta aste honetan bertan EAJren bozeramailea den Diez jauna irrati elkarrizketa batean Alderdi Popularrari bere sozio potentzial bezala zuzendu, edo atzo bertan Ipiñazar andereak Madrilen edo Bruselan ordezkaritza nazionalak erdiesteko bideari ateak itxi, guk bidea argi daukagu. EH Bilduk Euskal Herri osoari eskua zabaltzen jarraituko du gure aitortza nazionalean aurrera egiteko eta garaiko erronkei herri erantzunak adosteko, sinistuta baikaude hori dela bide bakarra aurrera egiteko".

EH Bilduren iritziz, sei dira lehentasunak.

Lehena, ongizatea eta oinarrizko eskubideak, bizitza duina izateko. "Araban atzeraka egin den arloa da hori eta zerbitzu publikoei bultzada berria eman behar zaie", adierazi du.

Bigarrena aberastasunaren sorrera eta banaketa da, eta "industria deskarbonizatu, lehen sektorea bultzatu, soldata duinak ezarri eta zerga erreforma sakona" aipatu ditu hori lortzeko.

Larrialdi klimatikoa litzateke hirugarren ardatza, eta laugarrena, lurralde arteko oreka eta kohesioa. Horretarako, nekazaritza-guneetako baliabide eta zerbitzuak areagotu behar direla defendatu du, eta, era berean, Trebiñu EAEn integratzeko pausoak ematera konprometitu da San Saturnino.

Erronka demografikoari ere aurre egin nahi dio EH Bilduk, baita "autoritarismoak eta eskuin muturrak munduan ireki dituzten kultura eta baloreen gatazkan" parte hartu ere. "Berdintasuna, aniztasuna eta justizia defendatu beharra daude", ohartarazi du Arabako EH Bilduren buruak.

Koalizio subiranistaren azken urteetako gorakada politika egiteko modu "ez konbentzionalagatik" izan dela ere esan du San Saturninok. "Motzera jokatzea, sareetako okurrentziek, lokatza eta aurrez aurreko borroka beste batzuei uzten dizkiegu, EH Bilduk beti irizpide baten arabera jokatzen duelako, hartzera goazen erabakiak jendearen baldintzak hobetuko dituen galdetzen diogu geure buruari", hausnartu du.

Eva Lopez de Arroyabe Arabako Batzar Nagusietako bozeramaileak ere hartu du hitza ekitaldian, eta horrek ere koalizioaren "lidergoa" goraipatu du, bai foru erakundeetan,  baita herrietan ere, gobernutik zein oposiziotik. Horren adibide, Gasteizko Udalean egindako aurrekontuen inguruko akordioa eta Batzar Nagusietakoa aipatu ditu. Bi horietan EAJk eta PSE-EEk gobernatzen dute, gutxiengoan.

Hala, "lidergo horri esker" Gasteizek, esate baterako, atzotik, Aldiriko zerbitzu berria duela gogoratu du, eta EH Bilduk proposaturiko Arabatran delakoaren oso antzekoa dela esan du. Orain, Aldiriko zerbitzua "hobetzea" tokatzen dela ere gaineratu du, industrialdeetan eta Gasteizko auzo berrietan ere geldialdiak egin ditzan.