Kalera itzultzeko eta "entzuteko, partekatzeko eta taldea eraikitzeko" deia egin die Ansolak alderdikideei

Bizkai Buru Batzarreko (BBB) presidente Iñigo Ansolak dei egin die alderdikideei "EAJren indar guztia batzeko, egindakoa berrikusteko, egin beharrekoa doitzeko eta kalera itzultzeko, herriz herri, auzoz auzo". Horretarako, alderdikideei erregutu die "entzuten, partekatzen eta taldea eraikitzen jarraitzea". "Lan hori ez du inork egingo gure izenean, alderdikide bakoitzak bere gain hartu behar du, batzoki bakoitzak, zinegotzi bakoitzak eta tokian tokiko arduradun bakoitzak", esan du.

Alderdikideen babespean, Ansolak agerraldia egin du eguerdian Muskizen, Ezkerralde-Meatzaldeko Alderdikide Egunean. Bertan aldarrikatu du "Bizkaia eta Euskadi eraikitzen jarraitzeko, EAJk egunero-egunero erakusten duen konpromisoa".

Berbaldian, azpimarratu du bere alderdia ez dela kontakizunetik bizi, "ekintzetatik baizik", eta adierazi du EAJk ez duela hauteskunde batetik bestera atsedenik hartzen, hots, egunero ari dela lanean, "konpromisoan, hurbiltasunean eta ekintzan" oinarritutako politika defendatzeko. 

Alderdikide Egunaren festa-giroa gorabehera, Ansolak ez du ahantzi atzo Bilbon izandako hilketa. Horregatik, "gaitzespen, haserre eta tristura" adierazpenekin hasi du bere diskurtsoa. "Hilketa ankerra izan zen, bihozgabekeriaz egindakoa", deitoratu du. Halaber, nabarmendu du emakume bati min egiteko asmoz adingabe bat "erabiltzea" dela "indarkeria matxistaren eredu bortitzena eta gupidagabeena".

Zentzu horretan, buruzagi jeltzaleak azpimarratu du emakumeen aurkako indarkeria desagerrarazteak "lehentasun politikoa eta premia morala" izan behar duela.

Bestalde, BBBko presidenteak mezu zuzena igorri die, bere hitzetan, "gobernatu gabe modan daudenei". Hartara, EH Bildu koalizioari aurpegiratu dio "zaratan eta anbiguetatean babestea bere proiektua definitu behar ez izateko". "Ez dute benetan egin nahi dutena egiten, eta gainera besteen lana eragozten saiatzen dira", salatu du.

PPrentzat ere izan du hitzik, Euskadiren alde egin beharrean, "gorrototik" jokatzen dutela iritzi baitio. "Bidean harriak jartzen jarraitzen dute, horiekin eraiki beharrean. Haiek jakingo dute! Jendeak elkarlana, aurrerapausoak eta ulermena eskatzen ditu, alegia, EAJren eredua", erantsi du.