D eredua eremu ez-euskalduneko zentro publikoetan ere, eskuragarri

2016-2017 ikasturtean, lehen aldiz, euren haurrak sare publikoko D ereduan matrikulatzeko aukera izango dute Nafarroako eremu ez-euskalduneko gurasoek. Euskararen Legea aldatuta, datorren ikasturtea izango da aukera hori ematen lehengoa.

Berrikuntza historiko honen berri eman du goizean Jose Luis Mendoza Nafarroako Hezkuntza kontseilariak, haur eta lehen hezkuntzako aurre-matrikulazio kanpaina aurkezteko prentsaurrekoan.

Gurasoek otsailaren 15etik 19ra izango dute aurrematrikula egiteko epea, haurrak lehen aldiz inskribatzen badituzte edota eskolaz aldatu nahi badituzte. Hiru urteko 6.000 ume batuko zaizkie egun Nafarroako Hezkuntza sisteman dabiltzan 60.789 ikasleei.

Gutxienez, zortzi ikasle

Mendozaren hitzetan, "eremu ez-euskaldunean D ereduko lerroak zabalduko ditugu datorren ikasturtean eta hori da, inondik inora, berrikuntza nabarmenena". Nabarmendu duenez, "foru erkidego guztian Gobernuak eskaintzen dituen eredu linguistikoak eskainiko ditugu".

Aukera hori bermatzeko, euskarazko lerroa ez duten eskoletara eskaerak jasotzeko jarraibideak bidali dituzte, aukera hori bermatze aldera.

Hezkuntza kontseilariak iragarri duenez, gutxienez zortzi ikaslek eskatu beharko dute euskarazko lerroa. Ikasle nahikoa ez dagoen kasuetan, inguruko eskola batean pilatuko dituzte, eta garraio eta jantokia ordaintzeko laguntzak emango dizkiete.

Hezkuntza D ereduan hasten duten eremu ez-euskalduneko umeei lehen zein bigarren hezkuntza eredu horretan jarraitzeko aukera "bermatu" nahi die, horrenbestez, foru gobernuak.

Ikasle ratioak

Ikasgela bakoitzeko egon daitezkeen ikasle kopuruari dagokionez, Lehen Hezkuntza 30etik 25era jaitsiko dute; 32tik 30era Bigarren Hezkuntzan eta Batxilergoan 33an mantendu dute, Legeak 35 ere onartzen badu ere. Kopuru hori lortzen ez duten ikastetxeetara "errefortzuak" bidaliko dizkiete oinarrizko ikasgaietan eta atzerriko hizkuntzan laguntzeko.

Ikasleari dagokion zentroa erabakitzeko orduan dagoen araudia berriro aztertuko dutela hitzeman du Mendozak, "gertutasuna lehenetsi dadin, beste faktoreen gainetik". Asmoa jatorri, erlijio, sexu eta bestelako arrazoiengatik diskriminazioak saihestea da. Dena dela, helburu hau 2017/18 ikasturtean beteko dutela ohartarazi du kontseilariak