Zabaldutako informazioa 'egiazkoa eta kontrastatua' izan dela esan dute akusatuek
Iñigo Cabacasen auziko grabaketa batzuk argitaratzea egotzita, gaur hasi da Bilboko Auzitegian Jone Goirizelaia abokatuaren, Iñaki Soto Gara eta Naiz hedabideetako zuzendariaren eta Iñaki Iriondo kazetariaren kontrako epaiketa. 'Ugarteko' ezizenez ezagutzen den Ertzaintzako agenteak jarri zuen salaketa, Cabacasek buruan pilotakada jaso zuen egunean polizia operatiboaren buru zenak.
'Ugartekok' salaketan esan zuen bi hedabideok argitara emandako informazioen eta abokatuak bere agerraldietan esandakoen ondorioz "osasun arazo larriak" dituela. Bere identitatea eta karga polizialaren gauean berak emandako aginduen grabazioa publiko egitea salatu zituen, horrekin bere "intimitate eskubidea eta ohorea urratu" delakoan. 250.000 euroko kalte-ordaina eskatzen du.
Gaur eserleku berean eseri dira salaketa jarri duen ertzaina eta akusatuak. Cabacasek pilotakada jaso zuen egunean operatiboaren ardura zuen agenteak aldeei erantzunez esan du "jazarpena" eta "epaiketa paraleloa" egin diotela Gara eta Naiz komunikabideek eta Goirizelaia abokatuak. Horren ondorioz "depresioa" izan duela zehaztu du. Aginduen grabazioa publiko egin ondoren postu administratibo batera aldatu zutela ere esan du epaiketan, eta bere garapen profesionalari kalte egin diola argitalpenak.
Hiru akusatuei aurpegiratu die zuzenean lotu dutela gomazko pilotaka jaurtitzearekin, eta ondorioz, Cabacasen heriotzarekin, nahiz eta instrukzioko epaileek ez duten inputatu.
Bere aldetik, Goirizelaiak esan du prozesuan sortu diren "ebidentziei jarraituta" egin dituela adierazpen eta inputazio eskaera guztiak.
Soto eta Iriondo kazetariek ere "kasuaren jarraipena garrantziaren neurrikoa" izan zela defendatu dute epailearen aurrean. Zabaldutako informazioa "egiazkoa, zorrotza eta kontrastatua" izan dela nabarmendu dute, eta "iritzia ongi oinarritua" egon dela beti. Guztiz baztertu dute bestelako motibaziorik.
Fiskalak salaketaren zati bat kontuan hartzea eskatu dio epaileari, eta Gara eta Naiz komunikabideek argitara emandako zenbait informazio erretiratzea eskatu du, errugabetasun presuntzioa urratu zutelakoan. 13.000 euroko kalte-ordaina eskatu du Fiskaltzak.
'Ugarteko' artatu zuten psikologoak eta psikiatrak ere hitz egin dute. Horien hitzetan, estresak sortutako nahasmendua izan zuen ertzainak, baina "arina".
Protestak
Iñigo Cabacasen familiak "enegarren injustizia" eta "umiliazioa" salatu ditu Bilboko Auzitegian hasi den epaiketaren aurrean. Sendiak ohar bidez salatutakoaren arabera, Cabacas auzia argitzeko egingo den lehen epaiketan ez da gaztearen heriotza bera epaituko, egiaren eta justiziaren bila familiaren bidelagunak izan direnak baizik.
'Cabacas Gogoan' plataformak deituta, elkarretaratze jendetsua egin dute epaiketa hasi aurretik Auzitegiaren atarian.
Argazkia: EFE
Euskal Kazetarien Elkarteak eta Kazetarien Euskal Elkargoak salatu egin dute Cabacas auziaren baitan Gara eta Naiz hedabideen aurka abiatutako prozesu judiziala, eta horrek "kazetariak kriminalizatzea" eta "adierazpen askatasunaren oinarriak urratzea" dakarrela ohartarazi dute.
Zure interesekoa izan daiteke
Gizon batek bikotekidea hil du Pontevedran eta bere buruaz beste egin du ondoren, atxilotu aurretik
Emakumearen gorpua ahizpak aurkitu du, bere etxebizitzako lurrean, eta gizona ihes egiten ikusi du. Gizona etxebizitza batean gotortu da eta Guardia Zibila berarekin negoziatzen aritu da arratsalde osoan, entregatu zedin, baina bere buruaz beste egin du azkenean.
Lau urteko haur bat oso larri Oionen, bigarren solairutik erorita
13:30 aldera gertatu da istripua, eta helikopteroz eraman dute Gurutzetako ospitalera, buruan kolpe handi bat zeukala.
Talde animalistek protestak egin dituzte Bilbon eta Iruñean, ehizaren eta ehiza-txakurren erabileraren aurka
Espainiako Estatuko 44 hiritan eta beste 41 herrialdetan izan da mobilizazioaK, Galgoaren Munduko Egunarekin bat eginez.
Diru bilketa abiatu dute Aroztegia auzian zigortutako zazpi kideei jarritako isunei aurre egiteko
Zazpi ekintzaileek ez zuten kartzela zigorrik jaso, baina 62.000 euroko isuna ordaintzera kondenatu zituzten. Isunez gain, defentsa eta gainerako gastuak ordaintzeko bilketa egingo du orain Aroztegiko Elkartasun Komiteak.
Joko areto baten aurka protesta egiteagatik auzipetutako Sopelako lau gazteen aurkako epaiketa atzeratu dute, data jarri gabe
32 urteko kartzela zigorra eta 112.400 euroko isuna eskatu dute lau sopeloztarrentzat. Auzia birritan artxibatu dute, eta akusazio partikularra da pertsonatutako akusazio bakarra. Hain justu, auzipetuei elkartasuna adierazteko manifestazioa egin zuten atzo Sopelan.
Osasun Sailak zehaztu du iraungitako txerto hexabalenteak Iztietako (Errenteria) eta Ondarretako (Donostia) osasun-zentroetan jarri zituztela
Osakidetza hasi da kaltetutako 30 pertsonak (25 haurtxo eta 5 heldu) berriro txertatzen. Iraungitako txerto tetrabalentea edo hirukoitz birikoa jaso zutenek (75 bat lagun) asteon jasoko dute gertakin zuzena.
Matrikulazioa % 5 jaitsiko dela uste du Hezkuntza Sailak, baina ikasturtean zehar heldutako ikasleekin orekatu daitekeela erantsi du
Begoña Pedrosa Hezkuntza sailburuak azaldu duenez, matrikula kopuruak % 5 inguru egin du behera, datu demografikoak kontuan hartuta egindako estimazioen arabera. Dena dela, iragarri du beherakada "matrikulazio biziak" konpentsatuko duela; izan ere, irailetik 5.400 ikaslek eman dute izena EAEko hezkuntza sisteman.
Gidari bat ikertzen ari dira istripu batetik ihes egin eta alkoholemia proba egiteari uko egiteagatik
Ertzaintzak ikertu gisa inputatu du bart Trapagaranen beste ibilgailu baten kontra istripua izan eta ihes egiten saiatu zen gidari bat, bide-segurtasunaren aurkako ustezko delitu bat egotzita. Eusko Jaurlaritzako Segurtasun Sailak jakinarazi duenez, larunbatean, 21:00ak aldera, bi ibilgailuk talka egin zuten Bizkaiko udalerri horretan, eta gidarietako bat bertan artatu behar izan zuten. Beste gidaria, onik atera zena, ihes egiten saiatu zen, baina agenteek geldiarazi egin zuten. Gizonak uko egin zion alkoholemia proba egiteari.
Hiru pertsona artatu dituzte Usurbilen, sute batean kea arnasteagatik, eta beste bat Errenterian
Usurbile, hiru pertsonak tokian bertan artatu dituzte, baina Errenterian, Donostia Ospitalera eraman behar izan dute emakume bat. Barañaingo supermerkatu batean ere sutea izan da larunbat honetan baina ez da inor zauritu.
Manteroen kontrako "poliziaren esku-hartze bortitza" salatu dute dozenaka lagunek Bilbon
Mbolo Moye Doole eta Manteroekin bat! plataformek deituta, ostegunean Ertzaintza eta Udaltzaingoa manteroen aurka indarkeriaz aritu zirela salatu dute. Horien esanetan, "ez da gertaera isolatua izan", hilero jazotzen baitira halakoak.