CCOO Korrikatik kanpo geratu da, AEK-k erabaki baitu sindikatuak ez duela lekukoa eramango, "euskararen aurkako jarrerak sustatzen" dituelakoan

CCOO sindikatuak ez du lekukorik eramango aurtengo Korrikan, Ane Elordi Korrikaren koordinatzaileak asteazken honetan Euskadi Irratiko "Faktoria" irratsaioan iragarri duenez. Haren hitzetan, Errenteriako lan deialdi publikoan gertatu dena "mugarria" izan da. Hortaz, sindikatuko kideekin egindako bileran, azaldu zieten ez zutela bateragarri ikusten haien jardunbidea eta 24. Korrikan parte hartzea.

Albistea jakinarazi eta ordu gutxira, AEK-k bilera horren nondik norakoak eman ditu ohar batean. AEKren Nazio Kontseilua Euskadiko CCOO sindikatuaren ordezkariekin bildu zen astelehenean, eta Argia aldizkariak argitaratutako informazioari "sinesgarritasun osoa" emanda, CCOOko kideei jakinarazi zieten "bateraezinak" zirela "euskararen aurkako jardunbide horiek sustatzea eta Korrikan lekukoa eramatea".

CCOO sindikatuarekin zerikusia duten pertsonak

Argiak zabaldutako informazioen inguruan AEK-k honakoa esan du: "Demostratutzat jotzen dugu helegite horien atzean, norbanako batzuen interesen aldeko jardunbidea ez ezik, modu antolatu eta sistematikoan helegiteak hauspotzen dituen talde bat ere badagoela, eta talde horretan badaudela CCOO Euskadi sindikatuarekin zerikusia duten pertsona esanguratsuak".

Hori dela eta, AEKren iritzian, "jardunbide antolatu eta sistematiko hori euskararen ezagutza unibertsalaren kontra doa (…), euskaldunon hizkuntza-eskubideen kontra; hau da, Korrikaren mezuaren aurkako jardunbidea da".

Diskurtso eta jardunbide horien artean "kontraesana dago", AEKren aburuz. "Bateraezintzat jotzen dugu jardunbide horiek sustatzea, batetik, eta 24. Korrikan CCOO Euskadiko zuzendaritzak lekukoa eramatea, bestetik", gaineratu du.

Plazaratutakoaren inguruan hausnarketa egiteko eskatu zieten sindikatuko kideei, eta koordinakundeak jakinarazi duenez, hurrengo egunean adierazi zuten ez zutela "euren burua Korrikan ikusten, eta, hortaz, ez dutela parte hartuko". 

CCOOk "apartheid soziala" salatu du

Bere aldetik, Santiago Martinez Euskadiko CCOOren idazkari nagusiak salatu du Korrikaren antolatzaileek betoa jarri diotela sindikatuaren zuzendaritzari, aurtengo euskararen aldeko lasterketan parte har ez dezan.

Bilbon emandako prentsaurreko batean, Martinezek sindikatuarekiko "apartheid sozialaren estrategia" gaitzetsi du, eta adierazi duenez, CCOO Euskadik "normaltasun osoz" parte hartu izan du orain arteko "Korrika guztietan". Haren hitzetan, kilometroa erosi ohi dute, eta duela hiru bat urtetik martxan dute, AEKrekin, formakuntza-prozesu bat erakunde barruan.

Martinezen arabera, Euskadiko CCOOren zuzendaritzak "irizpide demokratikoak ditu arau, eta afiliazio osoa ordezkatzen du". Era berean, dei egin die afiliatuei "nahi duten moduan parte har dezaten Korrikan, aspaldian antolatzaileak ere gainditzen dituen, eta, orain bezala, etorkizunean ere bazterketa-saiakerak gaindituko dituen jai batean".

Erreakzioak

ELA sindikatuak, berriz, "euskararen aurka antolatutako kanpaina" baten parte izatea leporatu dio CCOOri, eta ustezko konspirazio baten biktima gisa bere burua aurkeztea kritikatu du. ELAk babes osoa adierazi dio AEKri, Korrikaren antolatzaileari, eta CCOOko zuzendaritza lekukoa eramatetik baztertzeko erabakia babestu du. 

ELAk esan du Estatuko sindikatuak eta PSOE oztopo direla hizkuntza-politikarako, eta CCOOri leporatu dio euskararen normalizazioa oztopatzea administrazioetan. Gainera, CCOO “euskararen etsaitzat” jotzea kritika politiko zilegia dela defendatu du, ez erasoa, eta bere militantzia inoiz baino indar handiagoz 2026ko Korrika babestera animatu du.

Ildo beretik mintzatu da LAB ere. Zentral horren arabera,  oraingoan, "euskarafoboek" AEK jarri dute "jopuntuan", eta horren aurrean "babes osoa" adierazten diote koordinakundeari. "Aitortza eta eskertza, euskararen alde egiten duen lan ezinbestekoagatik". 

Sindikatu abertzaleak erantsi du euskararen aurkako "oldarraldi hori hainbat sindikatu, alderdi eta eragile euskarafobok antolatu eta sustatu" dela, lan deialdi bat edo beste aitzakia hartuta. "Euskara ez dakiten herritarrei ikasteko bidea sustatu eta erraztu behar zaie, ez oztopatu, lan-eskubideen eta hizkuntz-eskubideen arteko dikotomia faltsua elikatuz", adierazi du ohar batean. Korrikan "masiboki" parte hartzera deitu ditu LABek euskal langileak. 

PSE-EEren aburuz, egoera hori intolerantziaren erakusgarri da, euskarari berari kalte egiten diona. Bere ustez, bazterketa horrek hautsi egiten du hizkuntza sustatzeko ekimen batek sustatu beharko lukeen "pluraltasun eta adostasun espiritua".

Hori dela eta, alderdiak iragarri du kargudun bakar batek ere ez duela Korrikako ekintzetan parte hartuko "politika horrek jarraitzen duen bitartean", eta antolakuntzarekin duen harremana berrikusiko duela iragarri du. Hala ere, euskara eremu guztietan sustatzeko konpromisoa berretsi du, eta elkarrizketaren eta hizkuntza-eskubideen errespetuaren aldeko apustua egin du, "edozein inposaketa edo jabetze ideologiko" baztertuta.