Istiluak izan dira bart Azpeitian gazte batzuen eta polizia agenteen artean, eta bi ertzain zauritu dira

Bart gauean, istiluak izan dira Azpeitian gazte talde baten eta polizia agenteen artean. Gertakariak bi ertzain arin zauritu utzi ditu.  

Ertzaintzak azaldutakoaren arabera, istiluak larunbat goizaldeko 4ak aldera hasi dira, Ertzaintzaren patruila batek gazte bat identifikatu eta isuna proposatu ostean, hiri-altzarietan pintadak egiteagatik. Handik gutxira, gazte talde handi batek Udaltzaingoaren bulegoetara jo eta agenteei eraso omen die, polizia-etxea ere erasotuz. Egoera bideratzeko Ertzaintzaren esku hartzea beharrezkoatzat hartu dute.

Azkenik, udaleko zinegotzi batek bitartekotza lanak egin behar izan ditu egoera baretzeko eta taldea sakabanatzeko.

Bi ertzain arin zauritu dira istiluetan. Horregatik, Ertzaintzak diligentziak ireki ditu, eta auzia agintaritza judizialera eramango da.

Bestalde, Nagore Alkorta Azpeitiko alkateak babesa helarazi die bart lanean zeuden udaltzainei, eta lasaitasun mezu bat bidali nahi izan du. Hala eta guztiz ere, Ertzaintzaren segurtasun dispositiboa "neurriz kanpokoa" izan dela azpimarratu du.

"Gure udaltzainek babes falta sentitu dute, eta Ertzaintzari deitu diote (...) bueltan, Ertzaintzaren izugarrizko segurtasun dispositiboa izan da (...). Oraindik informazioa falta zaigu, baina guretzat tenstioak areagotzeko jarrerak ez dira onargarriak", gaineratu du Alkortak.

Amaitzeko, alkateak dei egin die azpeitiarrei hastear diren jaiak kolektibo guztiekiko errespetuz bizitzeko.

Eusko Jaurlaritza: "Gertakari onartezinak"

Eusko Jaurlaritzako Segurtasun sailak Azpeitian izandako gertakariak gaitzetsi ditu.

"Gure gizartean lekurik ez duten eta bizikidetzaren aurkako gertakari oso larriak eta onartezinak dira", adierazi du Segurtasun sailak jasotakoa salatuz.

Euskal gizarteari eskatzen diogu horrelako gertaerak ez onartzeko eta gaitzesteko. Guztion esku dago, gizarte gisa dugun betebeharra da, profesionaltasunez babesten gaituztenak babestea.

Horrekin batera, Eusko Jaurlaritzak elkartasuna adierazi die Azpeitiko Udaltzaingoko eta Ertzaintzako agenteei.

EUSPEL: “Utzikeriaren ondorio”

Euskal Polizien Elkartasuna (EUSPEL) sindikatuak salatu du Azpeitiko Udaltzaingoaren egoera eta gertatutakoa "utzikeriaren, inprobisazioaren eta inbertsio faltaren ondorio" dela azpimarratu du.

Horregatik, sindikatua lau neurri exijitu ditu: Lehenik, berehalako ikerketa eta arduradunen identifikazioa; bigarrenik, erantzukizun penalak ezartzea egileei; hirugarrenik, baliabide tekniko eta gizatiarren berehalako hornidura; eta, azkenik, agenteentzako babes instituzional eraginkorra eta erreala. 

ESAN: "Gertaera onartezinak"

ESANek, Azpeitiko Udaltzaingoan nagusi den sindikatuak, irmo salatu ditu "onartezinak diren gertaerak, langile publikoen eta bizikidetasun demokratikoaren aurkako eraso zuzena baitira".

Sindikatuak alkatearen eta Udal Gobernuaren "gaitzespen publikoa, argia eta anbiguotasunik gabea" eskatu du, baita "Udaltzaingoaren plantilla lehenbailehen indartzea" eta dotazioa ere.

ERNE: "Autoritate printzipioa berreskuratu behar dugu"

ERNE Udaltzaingoa sindikatuak "salaketa eta gaitzespen irmoa" adierazi du sare sozialetan, "bart Azpeitian izandako gertakarien aurrean", eta "babes eta elkartasun osoa" adierazi die "kaltetutako lankide guztiei".

Sare sozialetan argitaratutako mezu batean, sindikatuak "autoritate printzipioa berreskuratzearen" alde egiten du, eta, horretarako, dioenez, "funtsezkoa da politikarien eta epaileen lana". Halaber, azpimarratu dutenez, herritarren segurtasuna mantentzeko eta pertsona guztiek jai-guneez gozatu ahal izatea bermatzeko "funtsezkoa da Euskal Poliziari material modernoak (taser), prestakuntza egokia eta giza-baliabide gehiago" eskura jartzea.