Trafiko-murrizketa ugari Bilbon, Vuelta dela eta

Bilbok Espainiako Itzuliaren 3. etapa hartuko du gaur. San Mamesetik abiatuko da 13:30ean eta Diego Lopez de Haron amaituko da, 17:30ean.

Etapak trafiko murrizketak eragin ditu bezperatik. Izan ere, asteartean, muntaketa-lanak hasi dira San Mames inguruan, 09:00etatik aurrera. Athleticen partidek izaten duten antzeko eragina izan du trafikoan.

Horrenbestez, Udalak gomendatu du auto pribatua ez erabiltzea, aukerarik egokiena metroa eta trena hartzea delakoan. Izan ere, Bilbobus eta Bizkaibusen ibilbideetan ere mozketak izango dira, baita Euskalduna eta Basurtu arteko tranbia-ibildibeetan ere. Ibilbideak aldatzearekin batera, beraz, ohiko geltokiak mugituko dira.

Halaber, murrizketak izan diren eremuetako garajeetan sartu-irtenak egiteko aldaketak izango dira, bai eta irteerako eta helmugako inguruneetan aparkatzeko erreserbak ere.

Lasterketaren egunean, 06:30 eta 21:00 bitartean Sabino Arana, Abandoibarra eta Kale Nagusiko trafikoa mugatuta egongo da. Hala, 07:00etatik aurrera Kale Nagusirako sarbidea itxita egongo da Jesusen Bihotza eta Moyua artean, baita Anselmo Clave pasealekua eta Kale Nagusirako zeharkaleak ere.

Hala ere, Iparragirre kaleak zeharkako zirkulazioa izango du.

Bestalde, 09:00etatik aurrera eta ekitaldiaren amaierara arte, Euskalduna zubian ez da trafikorik izango, antolatzaileen eta Udal-operatiboko ibilgailuak izan ezik. Gainera, tunel garrantzitsuenak ere, Artxanda, Salve eta Ugasko, itxi egingo dira, bi noranzkoetan, gutxienez lasterketa hasi baino ordubete lehenago.

Ez dago jakiterik noiz irekiko dituzten, Udaltzaingoaren eta Ertzaintzaren esku egongo baita.