Basauriko hilketa matxista salatzeko elkarretaratzea egin dute ostiral arratsaldean, talde feministek deituta

Basauriko Asanblada Feminista eta Emakumeok Bat Koordinadora (Basauriko Emakume Elkarte eta Elkarte Feministen Federazioa) talde feministek deituta, elkarretaratzea egin dute ostiral arratsaldean Azaroak 25 plazan, "amorrua eta mina" publikoki adierazteko. Izan ere, bertako emakume baten heriotza genero indarkeriarekin lotutako hilketa bat izan ote den ikertzen ari dira.

Ohar batean adierazi dutenez, 2026an bi dira jada Euskal Herrian hildako emakumeak, eta horrek agerian uzten du, euren ustez, indarkeria matxistak jarraitzen duela gizarteko gaitz nagusietakoa izaten. Mugimendu feministak azpimarratu du krimen horiek emakumeen desberdintasuna, kontrola eta deshumanizazioa betikotzen dituen sistema baten ondorio direla.

Horien arabera, indarkeria matxista "ez da gai pribatu edo isolatua", erantzun integrala eskatzen duen errealitate estrukturala baizik. Hori dela eta, erakundeei inplikazio eta baliabide gehiago eskatu dizkiete: prebentzio eta babes politikak, koordinazioa, prestakuntza, etxebizitza, arreta duina eta erantzun feminista erreala.

Era berean, erantzun sinboliko eskasak kritikatu dituzte, hala nola minutu bateko isiluneak, eta emakumeen segurtasuna eta askatasuna bermatuko duten neurri eraginkorrak eskatu dituzte. Besteak beste, hezkuntza feminista txikitatik ezartzea eta indarkeria matxista mota guztien aurkako politika publiko koordinatuak garatzea eskatu dute.

Hala, hilketa matxista berri honen aurrean kalera irteteko eta gaitzespena adierazteko eskatu diete Basauriko Asanblada Feministak eta Emakumeok Bat Koordinadorak herritarrei, "terrorismo matxistaren aurrean" mobilizazio soziala funtsezko tresna dela ziurtatuta..

Protesta feministak egoeraren larritasuna ikusarazi eta egiturazko aldaketen eskakizuna indartu nahi du. "Terrorismo matxistaren aurrean, antolakuntza feminista" eta "Gora borroka feminista" lelopean, "emakumeen aurkako indarkeriarik gabeko gizartearen aldeko borrokarekiko konpromisoa" berretsi dute.

Basauriko Udalak elkarretaratzea deitu du larunbaterako

Basauriko Udaleko Bozeramaileen Batzordeak eta Berdintasun Kontseiluak elkarretaratzea deitu dute larunbaterako, 12:00etan, Azaroak 25 plazan. 

Deialdi honen helburua da publikoki kasu honen aurrean gaitzespena adieraztea eta indarkeria matxista salatzea, gizarte osoak ikusarazi eta gaitzetsi behar duena, azpimarratzen dutenez.