ELAk, LABek eta Steilasek ausardia eskatu diete alderdi politikoei eta euskaldunen hizkuntza eskubideak aldarrikatu dituzte

Milaka lagunek hartu dute parte gaur arratsaldean Bilbo erdigunea zeharkatu duen euskararen aldeko manifestazioan. ELA, LAB eta Steilas sindikatuek deituta, "euskaldunen oinarrizko hizkuntza eskubideen aurka antolatutako oldarraldi judizial eta politikoa" salatu dute mobilizazioan.

"Euskaraz bizi eta lan egiteko eskubidea" leloa zeukan pankartaren atzean, eta Jesusen Bihotzetik hasi eta Bilboko udaletxerainoko bidea eginda, "Euskal Herrian euskaraz" eta antzeko oihuak bota dituzte manifestariek.

Ausardia eskatu die ELAk EAJ eta EH Bilduri "euskaren defentsan"

ELAko idazkari nagusi Mitxel Lakuntzak EAJri eta EH Bilduri eskatu die "ausart" joka dezatela euskararen aldeko defentsan. Halaber, "erantzun antolatu bat" proposatu du, euskarak bizi duen "oldarraldi politiko eta judizialaren aurrean".

Bilbon egin ditu adierazpen horiek ELAk, LABek eta Steilasek "euskaraz bizi eta lan egiteko eskubidearen alde" deitutako manifestazioaren atarian.

ELAko buruak esan duenez, mobilizazioaren helburua zen baita "gaztelaniaren nagusitasuna" gailendu nahi dutenei aurre egitea.

Zentzu horretan, salatu du "2026an, oraindik ere, ezinezkoa dela euskaraz bizi eta lan egitea", "hizkuntza ofizial bat den arren", eta zehaztu du Administrazioa dela horren adibide garbi bat.

Horrexegatik, lehen aldarrikapen gisa nabarmendu du bi hizkuntza ofizialen egoera juridikoa berdintzea, eta horrenbestez, Administrazioan bi hizkuntzen eskakizuna parekatzea.

"Malguak gara, baina horretarako bitartekoak jartzen badira", erantsi du. Bukatzeko, azpimarratu du euskararen ezagutza "derrigorrezkoa" izan behar dela, "unibertsaltasun horretatik euskararen aldeko aurrerapausoak hel daitezen".

LABek salatu du "euskararen kontrako eraso antolatu bat" dagoela

LABeko koordinatzaile nagusi Garbiñe Aranburuk salatu du "antolatutako eraso bat" dagoela euskararen kontra. Horregatik, EAJri eskatu dio ez ditzala PSE-EEk Enplegu Publikoaren Legeari ezarritako "betoak" eta "oztopoak" onartu.

Aranburuk adierazi du azken hilabeteotan "antolatutako erasoaldia" jasan behar izan duela euskarak, eta azken epaien aurrean CCOOk eta PSE-EEk izan duten jarrera kritikatu du.

LABeko ordezkariaren iritzian, euskara gorrotatzen dutenek gaztelania inposatu nahi dute, eta administrazioko langileei euskaraz lan egiteko eskubidea eragotzi nahi diete.

Haren esanetan, euskara ofiziala bada ere, "egunerokoan ez da hori betetzen". Hori horrela, "euskara ere ofizial izateko neurriak" galdegin ditu. "Euskara eta gaztelania maila berean exijitu behar zaizkie administrazio publikoko beharginei, eta euskara ezagutzen ez dutenengan arreta gehiago jarri beharra dago", erantsi du.

Euskaraz bizi eta lan egiteko baldintzak galdegin ditu Kontseiluak

Kontseiluko idazkari nagusi Idurre Eskisabelek aldarrikatu du "euskaraz bizi eta lan egiteko baldintza politiko eta sozialak" eraiki behar direla.

Bilbon egin ditu adierazpenok, "euskaraz bizi eta lan egiteko eskubidearen alde" ELA, LAB eta Steilas sindikatuek deitutako manifestazioaren atarian.

Bertan, Eskisabelek defendatu du euskarazko administrazio batek emango duela horretarako bermea.

Azken inkesta soziolinguistikoan jasotako datuak ahotan, Kontseiluko ordezkariak gogora ekarri du 30 eta 60 urte bitarteko euskal herritarren % 70 direla euskaldunak, eta 20 eta 30 urte bitartekoen artean, berriz, % 90. "Horrek esan nahi du pixkanaka ari direla gauzak aldatzen", erantsi du.

Testuinguru horretan, adierazi du Kontseiluak baduela plan bat "15 urte barru, administrazioan hizkuntza guztiak berdintasunean egon daitezen, inori minik egin gabe".