Donald Tusk poloniarra, Europako Kontseiluko presidente berria

Europar Batasuneko 28 herrialdeetako estatuburu eta gobernuburuek bi goi kargu berri aukeratu dituzte larunbat honetan Bruselan egiten ari diren bileran. Hala, Donald Tusk poloniarra izango da Europako Kontseiluko presidente berria, Herman Van Rompuy ordezkatuz, eta Federica Mogherini Italiako Atzerri ministroa aukeratu dute diplomazia buru.

"Europako Kontseiluak Donald Tusk lehen ministro poloniarra aukeratu du Europako Kontseiluko presidente eta Euroaren goi-bileren presidente", iragarri du Herman Van Rompuy egungo Europako Kontseiluko presidenteak haren Twitter kontuan. "Europako buruzagiek Federica Mogherini Italiako Atzerri ministroa aukeratu dute, berriz, diplomazia buru", gaineratu du.

Herman Van Rompuyren agintaldia azaroaren 30ean amaituko da eta Donald Tusk poloniarrak hartuko du haren tokia. Mogherinik, berriz, Catherine Ashton ordezkatuko du eta Jean-Claude Junckerrek zuzendutako Europako Batzordearen presidenteordeetako bat izango da. Europako Parlamentuaren onespena izanez gero, azaroaren 1ean hasiko da lanean Jean-Claude Junckerrek gidatutako taldea.

Kargu aldaketak adostu ondotik, Herman Van Rompuy Europako Kontseiluko egungo presidentea kazetarien aurrera agertu da Tusk eta Mogherini alboan zituela. "Zorionak bioi. Europako Kontseiluaren erabateko babesa duzue eta adostasun hori oso garrantzitsua zen niretzat", nabarmendu du Van Rompuyk.

Donald Tusk Europako Kontseiluko presidente berri izango dena bere kargutik konpromisoak lantzeko prest agertu da, Europar Batasuna batuta mantentzeko eta hazkundea eta enplegua sustatzeko. "Jakin badakit Kontseiluko presidentearen eginkizun nagusia konpromisoak eraikitzeko lan egitea dela", adierazi du hunkituta Tuskek kazetarien aurrean. Halaber, berarentzat une garrantzitsua dela nabarmendu du.

Federica Mogherini Diplomazia buru berria izango denak, bestalde, aurretik dituen erronkak "zailak" izango direla onartu du, baina Europar Batasuneko herrialde eta hiritar guztien alde lan egiteko konpromisoa hartu du. Ukrainako krisia hizpide izan du eta Errusiaren kontrako zigorren beharra nabarmendu badu ere, diplomaziaren atea ere zabalik utzi du.

Europako goi-bileran kargu aldaketak adostu behar zituzten eta Bruselan bildutako agintariek azkar lortu dute akordioa. Uztailean egindako goi-bilera akordiorik gabe amaitu zen. Orduan, Europa ekialdeko herrialdeek Mogheriniren aukeraketa blokeatu zuten Errusiarekiko gertutasuna zuela argudiatuta. Gaurkoan, Tusk poloniarraren hautagaitzarekin korapiloa askatzea lortu dute.

Eurotaldeko buru berria

Luis de Guindos Espainiako Ekonomi ministroak Eurotaldeko presidente berri izateko nahikoa babes baduela adierazi du Herman Van Rompuyk, tartean Angela Merkel Alemaniako kantzillerrarena. Dena den, kargu aldaketa urtebete barru egingo dela azaldu du.

"Ez dugu Eurotaldeko presidentziaz hitz egin ez delako gure eskumena eta urtebete barru erabakiko delako", baieztatu du.

"Jeroen Dijsselbloem Eurotaldeko egungo presidentearen agintaldia 2015. urtearen erdialdean amaitzen da. Ia urtebete falta da horretarako", azpimarratu du. Are gehiago, Eurotaldeko presidentea Eurotaldeko kideek, hots, Euroguneko herrialdeetako Finantza ministroek aukeratzen dutela nabarmendu du.

Emakume gutxiagoz osatutako Batzordea atzera botako dutela berretsi du Schulzek

Orain baino emakume gutxiagoz osatutako Europako Batzordea atzera botako dutela berretsi die Martin Schulz Europako Parlamentuko presidenteak Europar Batasuneko buruzagiei. "Emakumeen proportzioa orain baino txikiagoa den Europako Batzorde bat pentsaezina da Europako Parlamentuarentzat", adierazi du Martin Schulzek Bruselako goi-bileraren harira egindako prentsaurrekoan.

Etorkizuneko Europa Batzordearen osaketa "atzera botatzeko" arriskua dagoela ohartarazi die Schulzek estatuburu eta gobernuburuei.

Orain arte herrialdeek egindako proposamenak aurrera aterako balira, bost emakumek osatuko lukete Europako batzordea, orain baino lau gutxiagok.