Migrazio eta Asilo Ituna onartzea lortu du EBk, urte askotako negoziazioen ondoren

Europar Batasunak Migrazio eta Asilo Ituna onartzea lortu du, urte askotako negoziazioen ondoren. Akordio horren bitartez, Europar Batasuneko kanpo mugen kontrol handiagoa ezarriko dute, eta gobernuei "nahierako elkartasuna" eskainiko diete; horrek, migratzaileen zati baten harrera saihestea ahalbidetuko du.

Bi eguneko negoziazioak behar izan dira Europako Batzordeak 2020an proposatu zuen legegintza-paketearen azken oztopoak sahiesteko. 

EBko Kontseiluko lehendakaritzako ordezkariek, Europako Parlamentuak eta Europako Batzordeak gaur goizean lortutako akordioa 2024ko lehen seihilekoan onartu beharko da, datorren ekainaren 6tik 9ra bitartean egingo diren Europako hauteskundeen aurretik.

Europako migrazio-politika erreformatzeko lehen pausoa 2016an eman zuten, bi milioi etorkin eta asilo-eskatzaile inguru Siriako gerratik ihesi EBra iritsi zirenean.

Errefuxiatuen nahitaezko kuotak baztertu egin ziren aurreko Batzordeak porrot egin ondoren, eta "nahierara" egindako elkartasunaren alde egin dute. Horri esker, 27 estatuek errefuxiatuak beren borondatez hartu ahal izango dituzte, edo beste modu batean parte hartu ahal izango dute prozesuan, adibidez, harrera-zentroen eraikuntza finantzatuz.

Helburua da urtero gutxienez 30.000 migratzaile lekualdatzea, baina herrialdeek uko egin ahal izango diote hartutako batzuk jasotzeari, 20.000 euroko konpentsazio baten truke, baztertutako lekualdaketa bakoitzeko edo baliokideko konpentsazio baten truke.

Bost araudi biltzen ditu Europako Parlamentuko eta Kontseiluko ordezkariek itxitako akordioak. Besteak beste, mugetako kontrol eta identifikazio prozedurak zorroztea jasotzen du, asilo eta kanporatze irizpideak bateratzea, eta elkartasun prozedura migratzaileak 27 herrialdeek har ditzaten, lehen lerroan diren herrialdeek, esaterako Italiak edo Espainiak, gainezka egiten dutenean.

Akordioa atzeratu duten oztopo nagusien artean, kolektibo ahulenentzako babesak zeuden, inoren kargura ez dauden adingabeak eta familiak barne, mugako prozedura bizkorretan. Prozedura horietan, asiliatu-estatusa jasotzen ez dutenentzat eta herrialde seguruetatik datozenentzat deportazio azkarrak aplikatuko dira.

Ituna historikotzat jo du Von der Leyen Europar Batzordeko presidenteak.

"Historikoki txarra da"

Gizarte zibileko 50 bat erakundek gaitzetsi egin dute Migrazio eta Asilorako Europako Ituna, "giza eskubideetan atzera egiteagatik".

Willy Bergogne Save the Children Europako zuzendari eta EBko ordezkariak azpimarratu du lortutako akordioa "historikoki txarra" dela. "EBko Migrazioari buruzko Itunak lotsagabeki urratzen ditu haurren eskubideak, arriskuan jartzen ditu iragaitzazko haurrak eta familia etorkinengandik banantze handiagoa ekarriko du. Argi dago legegile gehienentzat lehentasuna mugak ixtea zela", kritikatu du.

Hope Barker Mugako Indarkeriaren Monitorizazio Sareko politika-analista nagusiak deitoratu duenez, "akordioa fartsa lotsagarria da eta bere horretan salatu behar dugu".

Bitartean, Amnesty Internationalek salatu du itunak asiloari buruzko Europako legedia atzeraraziko duela datozen hamarkadetan, eta giza sufrimendu handiagoa eragingo duela.