18 hilabeteko kartzela-zigorra ezarri diote Depardieuri sexu-erasoagatik

Gerard Depardieu aktore frantziarra errudun jo dute 2021ean egindako sexu-eraso batengatik, aktorearen aurkako horrelako lehen epaiketan. 18 hilabeteko kartzela-zigorra ezarri diote, baina halako deliturik berriz egin ezean, ez du zigorra espetxean bete beharko. Hori zen, hain justu, Fiskaltzak eskatutako zigorra.

Le Monde egunkariak jakinarazi duenez, kartzela-zigorraz gain, eskubide zibiko, zibil eta familiakoak (botoa emateko eskubidea, edota hautagai izatekoa, besteak beste) ukatuko dizkiote bi urtez, eta haren izen-abizenak sexu-erasotzaileen erregistroan sartuko dituzte.  

Biktimetako baten arabera, epaia "aurrerapausoa da". Harago joan da Carine Durrieu-Diebolt emakumeen abokatua, uste baitu "emakumeen garaipena eta Depardieuren inpunitatearen amaiera" dela. Gogora ekarri duenez, gaur abiatuko da Canneseko zinema jaialdia eta aukera ezin hobea izango da "erasoen biktimei babesa adierazteko" eta "jarrera jakin batzuk amaitu behar direla gogorarazteko".

Depardieu ez da joan epaiaren irakurketara, eta horrekin oso kritiko azaldu da biktimen abokatua. "Epaiketan, gaixo zegoela esan ziguten, bada Azore uharteetan dago, filmatze batean. Gezurra esan digu", arrazoitu du. 

Bestalde, Jeremie Assous defentsa abokatuak iragarri du epaiaren kontrako helegitea aurkeztuko duela. Salatu duenez, auzi hauetan "ez dago defentsarako eskubiderik, sexu-eraso delitua egozten dizuten unetik automatikoki errudun jotzen zaituzte".

76 urteko Depardieuk bi hilabetez luzatu den prozesu baten protagonista izan da, Les volets verts filmaren zuzendari laguntzaile bati eta dekoratzaile bati egindako sexu-erasoak direla eta.

Fiskaltzak 18 hilabeteko kartzela-zigorra eskatu zuen, betetzetik salbuetsita. Defentsak, bere aldetik, aske uzteko eskatu zuen, eta interpretea, zinema frantsesaren aktore ezagunenetako bat, azpimarratu du "korronte puritano batek zigortu" nahi duela.