Nicusor Dan hautagai europazaleak ezustekoa eman eta Errumaniako hauteskundeak irabazi ditu

Ezustekoa, Errumaniako presidentetza hauteskundeetan. Nicusor Dan hautagai independente eta europazaleak irabazi ditu bozak, botoen % 55,1 bereganatuta, % 99,9 zenbatuta direnean. Lehen itzulian garaipena eskuratu eta bigarren bueltan inkestek faborito jotzen zuten George Simion ultraeskuindarrari aurrea hartu dio Danek.

Atzerriko botoen emaitza jakitea falta da, eta hori Simionen aldekoa izatea aurreikusten bada ere, ez da nahikoa izango emaitza aldatzeko. Orotara, 890.000 botoren aldea dago bi hautagaien artean, eta zenbatzeko geratzen den boto kopurua txikiagoa da. 

Hautagai independentearen garaipena ezagutu orduko, milaka jarraitzaile, gehienak gazteak, bildu dira bart Bukarest erdigunean, Danen kanpaina-egoitzaren atarian. Europar Batasuneko banderak eskutan zituztela, txaloka hartu dute presidente hautatua, hura balkoira atera denean. "Zuen garaipena da hau, Errumaniaren norabidea aldatu litekeela sinistu duzuenona (...). Eutsi indar honi, gauza askori aurre egin beharko diegu eta. Aro berri bat hastera doa Errumanian, eta zuetako bakoitza da beharrezkoa horretarako", esan die irabazleak bildutakoei.

Simioni boza eman dioten herritarrei ere zuzendu zaie Dan, horien botoa errespetatuko duela esateko: "Gure errespetu osoa lehen itzulian beste aukera lehenetsi zuten guztiei".

Parte-hartze handia

Parte-hartze handia, ustelkeria salaketak —Simionen aldekoek jarritakoak— eta Errusiaren esku-hartzearen mamua. Horiek izan ziren atzoko hauteskunde prozesuak utzitako hiru ezaugarri.

Maiatzaren 4ko lehen itzulian baino ia bi milioi boto-emaile gehiago joan ziren hauteslekuetara, eta lehen zenbaketen arabera, parte-hartzea % 65 ingurukoa izan zen. Adituen hitzetan, azken argazkiak agerian utzi du Errumaniako gizartearen polarizazioa.

Errumaniarren Batasunerako Aliantzaren hautagai Simion zen faborito, lehen itzulian botoen % 41 lortuta —Danek lortutako emaitzaren ia bikoitza—. Bereziki, gazteak eta landa-eremuetako biztanleak mobilizatu ziren haren alde, EBren kontrako diskurtsoak hauspotuta.

Atzo, hauteslekuak itxi berritan egindako lehen adierazpenetan, Simionek bere burua irabazletzat jo zuen, eta errumaniar guztien presidente izango zela ziurtatu.

Zentroko alternatiba

Ikasketaz matematikaria, azken urteotan Bukaresteko alkatea izan da Nicusor Dan. 55 urte ditu eta Europaren proiektuaren defendatzaile sutsua da. Presidentetzarako hautagaitza aurkeztu zuenetik, zentroko alternatiba bezala aurkeztu du bere proiektua, eta bereziki, hiriguneetako boto-emaile gazteak erakarri ditu. Ukrainari laguntza militarra bidaltzen jarraitzearen aldekoa da.