Genozidio hitza erabiltzea ekidin du Guterresek

Txostena aurkeztu eta ordu gutxira, Antonio Guterres Nazio Batuetako idazkariak agerraldia izan du eta Gazan gertatzen ari dena "ikaragarria" dela esan bai, baina ez du "genozidio" hitza erabili nahi izan. Ondorio juridikoak dituen terminoa dela eta Nazioarteko Zigor Auzitegiak ebatzi behar duen gauza dela esan du. Ondorioz, argitu du, Nazio Batuek ez dute bere egiten txostenak dioena.

Nazio Batuen Erakundeko Giza Eskubidee Bulegoak eskatu du Israel Gazan egiten ari den "sarraskia" berehala gelditzea. "Sarraski gaur gelditu egin behar da. Artilleria astuna erabiltzen ari dira, eta tankeak hiriaren hego-mendebalderantz egiten ari dira, dagoeneko goseteak jotako eremuetan barrena", adierazi du Ravina Shamdasani bulegoko bozeramaileak. 

Effie Defrin Israelgo Armadaren eledunak azaldu du "hainbat hilabete" beharko dituztela, Gaza hiri osoa bereganatzeko. "Gure kalkukuen arabera, hainbat hilabete beharko ditugu hiriaren kontrola hartzeko, eta hiria erabat suntsitzeko", esan du, prentsaurreko telematiko batean. Bere hitzetan, "gerra helburu guztiak" lortu arte, ez dute etengo ofentsiba. 

Etxe Zurian kazetariei egindako adierazpenetan, Donald Trump AEBko presidenteak esan du Israelek gaur Gazan abiatutako lurreko operazio militarraren inguruan ez dakiela "gauza askorik".  "Ikusi egin beharko nuke. Ez dakit gauza askorik", azaldu du.

"Israelgo armadak Gaza hiria lurrez hartzeko operazioa beste urrats bat da Gazaren aurkako genozidio sistematikoan eta garbiketa etnikoan". Hala esan du Hamas erakundeak, eguerdian zabaldutako ohar batean. Ohartarazi duenez, gaur abiatutako operazioak Gazako Zerrendako giza-hondamendia areagotu baino ez du egingo. 

Israelgo Gobernuak baieztatu du Hadaydahko portuari eraso egin diola Yemenen, Itsaso Gorrian, "hutiek azken orduotan Israelgo lurretan egindako erasoei erantzunez". Benjamin Netanyahuren Exekutiboak ohar bidez zabaldu duenez, "Israelgo Armamak eraso egin dio hutien erregimen terroristak Hudaydahko portuan duen azpiegitura militarrari". Israelen arabera, azpiegitura militar hori erabiltzen dute hutiek, "Irandik armak ekartzeko eta Iraelen kontrako erasoak egiteko".

Esperanza Santos, Mugarik Gabeko Medikuak gobernuz kanpoko erakundeak Gazan duen koordinatzaileak honela azaldu du hango egoera: "Beldurgarria da Gazako egoera. Israelgo Armadak ofentsiba abiatuko zuela iragarri zuenetik, okerrera egin du. Azken aste honetan, eta batez ere, asteazkenetik, bonbardaketak eta erasoak hiri osora zabaldu dira"

Israel Katz Israelgo Defentsa ministroak astearte honetan berretsi duenez, "Gaza suntsitu" egingo dute. "Gaza hiriaren kontrola hartu nahi dugu, gaur egun Hamasen gobernuaren ikur nagusia delako. Gaur, Gaza erortzen bada, beraiek ere eroriko dira", adierazi du Defentsa ministroak. 

Palestinarrek "ordainduko" dutela eta "Gaza suntsituko" dutela ziurtatu du Katzek, Hamaseko goi-agintariak eginez lurraldea "hondatu eta amaitu" izanaren erantzule. 

Katzek esan du Hamasek armak eta bahituak borondatez entregatzeari uko egin diolako etorri dela operazioa. Bere esanetan, erasoaldi berriak "modu zuzenean garaitzen du" talde palestinarra, eta, aldi berean, "mendean hartuta dituenak askatzeko indarra" egiten du. 

Gutxienez 28 gorpu berreskuratu dituzte hondakinen artean astearte honetan Gaza Hirian, Israelek Palestinako hiriburuan gauean egindako bonbardaketa gogorren ondorioz hildako palestinarrenak, Gazako Defentsa Zibileko zerbitzuak jakitera eman duenez.

Hogei gorpu aurkitu dituzte Al Daraj auzoan, hiriburuaren ekialdean, eta beste zortzi Sheikh Radwanen, ipar-ekialdean.

"40 pertsona baino gehiago hondakinen artean harrapatuta daude oraindik", ohartarazi du erakundeak ohar batean.

Aldi berean, Al Daraj auzoan, hondakinen azpian zortzi orduz baino gehiagoz harrapatuta egon den 10 urteko neskato bat erreskatatzea lortu dute.

Espainia ez da 2026ko Eurovision jaialdian izango, baldin eta antolakuntzaz arduratzen den EBU erakundeak (European Broadcasting Union) erakundeak Israel kanporatzen ez badu. 

Hala iragarri du RTVE Espainiako irrati-telebista publiko Administrazio Kontseiluak, gaur goizean egin duen bileraren ostean. 15 kidek osatzen dute: bost PSOEk aukeratutakoak dira, lau PPk, bi Sumarrek eta bana Juntsek, ERCk, EAJk eta Podemosek. 

Dagoeneko bost dira Israelekin batera Eurovisionen parte hartzeari uko egin dioten herrialdeak: Herbehereeak, Eslovenia, Islandia, Irlanda eta Espainia. 

Yvette Cooper Erresuma Batuko Kanpo Arazoetako ministroren iritziz, Israelek Gaza hiriaren aurka abiatutako eraso berria "arduragabea eta ankera" da. "Odol gehiago isuriko du, zibil errugabe gehiago hilko ditu eta geratzen diren bahituak arriskuan jarriko ditu", gaineratu du ministroak X sareko kontuan.

Su-eten "berehalakoa" lortzeko beharra azpimarratu du, bahitu guztiak askatzeko, giza laguntza mugarik gabe Gazan sartzeko eta bake iraunkorra lortzeko.

Israelgo Gobernuak "faltsutzat" jo du NBEren Nazioarteko Ikerketa Batzorde Independente batek astearte honetan argitaratutako txostena, zeinetan baieztatzen den "Israelek genozidioa" egin duela palestinarren aurka Gazan.

Israelgo Atzerri Ministerioak bidalitako ohar baten arabera, txostena egin dutenek "Hamasen ordezkari gisa jarduten dute" eta "jarrera antisemitengatik ezagunak dira".

Batzordea arlo horretan mundu mailan aditurik errespetatuenetako batek zuzen du, Navi Pillay, Ruandako genozidioaren ondorioz sortutako Nazioarteko Zigor Auzitegiko buru izan zena.

"Israelek erabat baztertzen du txosten distortsionatu eta faltsu hori, eta Ikerketa Batzorde hori berehala desegiteko eskatzen du", gaineratu du Israelgo Atzerri Ministerioak.

Palestinako Aginte Nazionaleko Atzerri Ministerioak "nazioarteko premiazko eta salbuespenezko esku-hartzea" eskatu du "Gaza hirian zibilak babesteko", Israelgo Armadak hiria hartzeko lurreko operazioaren lehen faseei ekin ondoren, hiria "hobi komun" bihurtuko baitu.

"Gerra gelditzeko nazioarteko diplomaziaren porrota susmagarria eta bidegabea da", dio Atzerri Ministerioak ohar batean, eta "kezka handiz" ikusten du Benjamin Netanyahuren Gobernuko kideen "harrokeria", Gaza hirian inbasioa abiaraztean.

430 inguru dira dagoeneko Israelek egindako erasoaldi militarraren eta laguntza humanitarioa emateko murrizketen ondorioz goseak eta desnutrizioak hildako palestinarrak. Gazako Osasun Ministerioaren azken informazioaren arabera, azken 24 orduetan hiru pertsona hil dira arrazoi horiengatik, horietako bat haurra, eta guztira 428 pertsona hil dira gosearen eta desnutrizioaren ondorioz, horien artean 146 haur.

Israelgo Armadak astearte honetan baieztatu duenez, lurreko tropak daude jada Gaza hirian. Armadaren hitzetan, Hamaseko 2.000 eta 3.000 miliziano artean leudeke taldearen "gotorleku nagusi" den hirian.

Atzerriko hedabideekin egindako saio informatibo batean, Israelgo ofizial militar batek adierazi duenez, tropek asteak daramatzate Gaza hiriaren kanpoaldean lanean, baina bart Armadak bere operazioak sakondu ditu hirian.

Nazio Batuen nazioarteko batzorde independente horrek baieztatu duenez, "kanpaina genozida bat dago antolatuta, Gazako biztanleria palestinarra suntsitzeko asmo espezifikoarekin", eta "instantzia gorenetako politikariak" jotzen ditu azken erantzuletzat: Isaac Herzog Israelgo presidentea, Benjamin Netanyahu lehen ministroa eta  2022ko abendutik 2024ko azarora Defentsa ministro izandako Yoav Gallant. 

Irakurri HEMEN albistea

Tankeen mugimenduarekin batera, Israelek hiriburuaren aurkako bonbardaketak areagotu ditu, misilak, droneak eta artilleriako sua ere erabiliz, baita helikopteroetatik tiro eginez ere.

Gauean zehar, gutxienez 41 pertsona hil ditu Israelek Zerrendan. Gaza erdialdean ere gogortu dira erasoak, eta lau palestinar hil dituzte. Hiriburuan 37 dira eraildakoak. 

"Operazio boteretsu bat hasi dugu Gaza hirian", iragarri du Benjamin Netanyahu Israelgo lehen ministroak, ustelkeriagatik bere aurka abiatzekoak diren epaiketa hastear dela. 

Israelgo Armadak erasoak gogortu ditu Gaza hirian, eta, hainbat hedabide israeldarren arabera, lurreko operazioa ere abiatu du hiriburua hartzeko asmoz. 

Tokiko iturrien arabera, gauean Israelgo tankeek aurrera egin dute Gaza hiriaren kanpoaldean, gero eta leku handiagoa hartuz. Hala ere, oraindik Israelgo Armadak ez du baieztatu ezta gezurtatu ere hiriburuaren aurkako lurreko operazioa abiatu duenik.