Zelenski eta Trump Floridan bildu dira, bake-planean "zehazteke" dauden gaiak argitzeko asmoz
Ukrainako presidentea itxaropentsu agertu da batzarraren atarian; izan ere, horren esanetan, "gauza asko erabaki daitezke Urteberri eguna heldu baino lehen". Donald Trumpek iragarri du Putinekin telefonoz hitz egin duela: "Oso elkarrizketa ona eta emankorra izan berri dut harekin".
Volodimir Zelenski Ukrainako presidentea eta Donald Trump AEBko presidentea Floridan bildu dira, Ukrainako bake-planaren zirriborroa hizpide.
"Zehazteke dauden gaiak argitzeko lan egin behar dugu. Jakina, gaur egun marra gorriak daude Ukrainarentzat eta Ukrainako herriarentzat", adierazi du Zelenskik bileraren atarian.
Kazetariek ea Putinek bakea lortzea serio hartzen duen galdetu diotenean, hau erantzun du Trumpek: "Bai, baietz uste dut, biek (Putinek eta Zelenskik) hala egiten dutela uste dut".
Hala ere, gaurko bilerak akordioa ekarriko duen galdetuta, Trumpek ez du erantzun itxi bat eman nahi izan. "Baliteke. Uste dut akordio baterako oinarriak baditugula", esan du AEBko presidenteak, eta ez du gatazka konpontzeko eperik ezarri nahi izan, beste batzuetan kontrakoa egin badu ere.
Gainera, Putinekin eta Europako buruzagiekin berriro hitz egingo duela esan du AEBko buruak.
Zelenskik ere hitz egin du atariko horretan. "Ixteke dauden gaiak minimizatzeko lan egin behar dugu. Hori bai, gaur egun marra gorriak daude Ukrainarentzat eta Ukrainako herriarentzat", adierazi du Zelenskik bileraren aurretik. Ukrainako agintariaren arabera, "konpromiso proposamenak daude" eta "gai horiek guztiak oso delikatuak dira", lurraldetasunaren auzia edo Zaporizhiako zentral nuklearra barne.
Testuingurua
20 puntuko bake-plana adostu dute Ukrainak, AEBk eta Europako bazkideek, eta, besteak beste, honako konpromisoak jasotzen ditu: ez erasotzeko ituna, segurtasun bermeak Kieventzat eta epe ertainean Ukraina EBn sartzeko konpromisoa.
Bileraren atarian, Vladimir Putin Errusiako presidentearekin telefonoz aritu dela esan du Trumpek Truth Social sarean. Horren ahotan, "oso elkarrizketa ona eta emankorra izan berri dut Putin Errusiako presidentearekin".
Errusia oldarraldi betean dagoela bildu dira bi buruzagiak. Zelenskik Moskuren azken erasoaldia gaitzetsi zuen atzo, Putinek bake-elkarrizketei eman dien erantzuna hori delakoan.
Gaur, baina, baikorrago azaldu da. X sare sozialean duen profilean zabaldutako mezu batean adierazi duenez, "diplomazia jardun beteko egunak" izaten ari dira honakoak, eta, horren esanetan, "gauza asko erabaki daitezke Urteberri eguna heldu baino lehen".
"Eginahalak egiten ari gara, baina erabakiak hartzea gure bazkideen menpe egongo da: Ukrainari lagundu nahi diotenen menpe eta errusiarrek euren erasoaren ondorioak senti ditzaten Errusiari presio egiten diotenen esku", azaldu du.
Hori horrela, salatu du Errusiak "2.100 drone, 800 bonba eta 94 misil" bota dituela asteon Ukrainaren kontra. "Gure herriaren kontrako erasoa da, bizitzaren kontrakoa eta bizimodu arruntari eusteko behar diren azpiegituren kontrakoa, batez ere gure energia azpiegituraren kontrakoa", kritikatu du.
Errusiaren kontrako neurriak
Horren harian, adierazi du garrantzitsua dela Errusiari zigor gehiago jartzea eta "presio politikoa" egitea.
Ukrainak "aire defentsarako misilak" behar dituela erantsi du. Zelenskik bake-planaren zirriborroan jasotako "urratsak" betetzeko deia egin du, horiek baitira "gerrari amaiera emango diotenak eta segurtasuna bermatuko dutenak". "Hori da, hain justu, gure bazkideekin eztabaidatuko duguna. Eskerrik asko laguntza ematen ari diren guztiei", gaineratu du.
Trumpekin bildu bezperan, Europako buruzagien eta Kanadaren babesa jaso zuen Zelenskik. Telefonoz aritu zen Ursula von der Leyen Europako Batzordeko presidentearekin eta Antonio Costa Europako Kontseiluko presidentearekin, besteak beste.
"Gure helburu komuna lortzen lagunduko diguten ahalegin guztiak txalotzen ditugu, Ukrainaren subiranotasuna eta lurralde-osotasuna babestuko duen bake justu eta iraunkorra lortze aldera. Eta gure herrialdearen segurtasun eta defentsa gaitasunak indartu daitezela, gure kontinentearen segurtasunaren zati garrantzitsu gisa", adierazi zion Von der Leyenek.
Costak esan zion Bruselaren babesa ez dela ahulduko, eta "bakea eta berreraikuntza" defendatu zituen, "Ukraina indartsu eta oparoa EBren segurtasun berme funtsezkoa" izango dela argudiatuta.
Bien bitartean, Kanadak iragarri zuen 2.500 milioi dolar kanadar (1.827 milioi dolar estatubatuar edo 1.552 milioi euro) emango dizkiola Ukrainari, Kievek 8.400 milioi dolar eskura ditzan Nazioarteko Diru Funtsaren (NDF) mailegutan. Mark Carney Kanadako lehen ministroak egin zuen iragarpena, Zelenskirekin Halifaxen (Kanada) bildu ostean.
Zure interesekoa izan daiteke
Adimen artifizialaren gobernantza eztabaidagai Indian: Silicon Valleyeko handikiak eta nazioarteko agintariak New Delhin bildu dira
Sam Altman (OpenAI), Sundar Pichai (Google) eta Jensen Huang (Nvidia) lider teknologikoak batu dira goi-bileran.
Epsteinen paperetan jasotakoak gizateriaren kontrako krimentzat har daitezkeela esan du NBEk
Inpunitate osoz aritzen zen enpresa kriminal baten aurrean gaudela diote kasua aztertu duten errelatoreek. Sexu-esklabotza, bortxazko desagertzea, tortura edota feminizidioa bezalako delituak egon direla erakusten duten gertakariak daudela ziurtatu dute.
Nola gauzatuko du Israelek Zisjordaniako lurren erregistroa?
Jerusalem ekialdean prozesu bera hasi zenetik, eraginpeko lurren % 1 baino ez da palestinarren izenean erregistratu.
Rubioren hitzetan, AEBk ez du Europa basailu izatea nahi, "aliatu sendo bat" baizik
Bestalde, Atzerri eta Segurtasun gaietako europar idazkari nagusi Kaja Kallasek azken hilabeteotan Trumpen Gobernuak egindako kritikei erantzun die. "Batzuek aurkakoa badiote ere, Europa eroria ez da hiltzen ari den zibilizazio bat", esan du, eta gaineratu du gero eta jende gehiagok batu nahi duela "Europaren klubera".
Ultraeskuinaren gertuko gazte bat kolpeka hil izanak politika giroa nahasi du Frantzian
23 urteko matematikako ikasle katolikoa zen Quentin, eta larunbatean zendu zen, jasotako kolpeen ondorioz eta bi egun koman eman ostean. Lyongo Fiskaltza gertakari horren nondik norakoak ikertzen ari da.
Israelek Zisjordaniako eremu zabalak Estatuaren zati gisa erregistratu ditu, 1967tik lehen aldiz
Palestinako Aginte Nazionalak salatu duenez, Palestinako lurralde gehiena 'de facto' anexionatu du.
Alemaniak, Frantziak, Erresuma Batuak, Suediak eta Herbehereek Navalni oposizioko burua toxina batekin hiltzea leporatu diote Errusiari
Pozoia, jatorriz Ekuadorko igel batek ekoizten duena, ez dago "modu naturalean" Errusian. Von der Leyenek estatu errusiarraren jokabide "terrorista" salatu du.
Rubiok AEBen eta Europaren arteko harremanak hurbildu nahi ditu baina kontinente zaharrak independentzia sustatu nahi du
Marco Rubio AEBetako Estatu idazkariak Europarekiko harremanak goraipatu ditu larunbat honetan Municheko Segurtasun Konferentzian, eta arindu egin du herrialdeko presidenteorde J.D. Vancek duela urtebete emandako hitzaldi gogorraren tonua.
Zelenskik esan du Ukraina erdibitzeak ez duela benetako bakerik ekarriko
AEBk bultzatzen dituen bake-negoziazioek arrakasta izan dezaten ahal duen guztia egiteko prest agertu da Ukrainako presidentea, baita hauteskundeak berehala deitzeko ere, bi hilabeteko su-etena bermatzen bada.
Europa indartzeko eta AEBrekiko harremana bideratzeko deia egin du Merzek, potentzia handien garaian
Alemaniako kantzilerrak europarren aldeko deia egin du Municheko Segurtasun Konferentziaren (MSC) irekiera ekitaldian. 120 herrialdetako 200 estatuburu, gobernuburu eta ministro biltzen ditu hitzordu garrantzitsu horrek.