Elon Muskek eduki esplizitua sustatu zuen Grok AArekin, Xn erabiltzaileak irabazteko

Elon Musk magnateak, Xren jabeak (lehen Twitter zen), adimen artifizialarekin (AA) eduki esplizituak sortzea sustatu zuen Groken bidez, plataforman erabiltzaileak irabazteko, konpainiak ohartarazpenak egin arren eta lege-arriskuak izan arren.

Aktibo egon zen hamaika egunetan, Groken irudi sortzaileak hiru milioi irudi sexualizatu baino gehiago sortu zituen; horietatik 23.000k haurrak irudikatzen zituzten eta 1,8 milioik inguru, emakumeak. 

The Washington Post egunkariak egindako ikerketa baten arabera, maiatzean, Donald Trumpen gobernutik atera baino aste batzuk lehenago, Elon Muskek xAIko langileei eskatu zien eduki esplizituarekin lan egiteko konpromisoa har zezatela, sexuala barne, eta udaberri amaieran eta uda hasieran oporrik ez eskatzea ere gomendatu zien.

Langileei ohartarazi zien "eduki sentikorra, bortitza, sexuala eta/edo beste eduki iraingarri edo asaldatzaileak" ikusteko prestatu zitezela, "estres psikologikoa" eragin ziezaiekeen eta.

Konpainiako bi langile ohik AEBko egunkariari jakinarazi diotenez, Musken inposaketak taldeko hainbat kide asaldarazi zituen, berez, Grokek erabiltzaileei nola erantzuten zien zehazteko kontratatu baitzituzten.

Langileek, besteak beste, eduki sexualeko audioak entzun behar izan zituzten, hala nola Teslako erabiltzaileek ibilgailuaren txatbotarekin izandako elkarrizketak eta Grokekin izandako beste interakzio sexual batzuk.

Ikerketaren arabera, Musk etengabe joaten zen xAIren bulegoetara (noizbait lo ere egin zuen bertan) Groken ospea handitzeko eta Gemini eta ChatGPTrekin lehiatzeko presioa egitera. 

Txatbota jendarteratzeko asmoz, xAIk material sexualizatua sortzea, "AA laguntzaile sexyak sortzea" eta eduki-sexualei buruzko abisuak ezabatzea erabaki zuen, eta horrek berarekin zekartzan arrisku legal eta etikoei buruzko barne ohartarazpenei muzin egin zien, sei langile ohiren baino gehiagoren eta handikiaren gertukoen arabera.

Hain zuzen ere, Xko segurtasun taldeek ohartarazi zuten AA tresnek aukera eman zezaketela famatuekin zein haurrekin irudi sexualak sortzeko, azkenean gertatu den bezala. Gainera, langile ohiek salatu dutenez, xAIren segurtasun taldea bizpahiru pertsonak baino ez zuten osatzen, eta, OpenAI eta beste enpresa batzuetan dozenaka langile daude horretan.

Ani, txatbot "jeloskor eta beroa"

The Washington Posten ikerketak Groken txatbot Ani aipatzen du. Begi urdin handiak dituen anime estiloko irudia, soineko beltza eta parpailadun lepokoa daramatzala, erabiltzaileak "harrapatzeko" eta haren izaera sexualari esker txateatzen egon daitezen sortu zen Ani, grok.com webgunearen iturburu kodearen arabera.

Ani trebatzeko erabili zituzten aginduen artean, horrelako argibideak zeuden: "Oso jeloskorra zara. Jeloskor jartzen bazara, bota itzazu biraoak", eta " Beti zaude pixka bat bero".

Ildo horretan, AAko beste "laguntzaile" batzuk ere trebatu ziren erabiltzaileen arreta ahalik eta denbora gehien izateko, emozioen erabilera azpimarratuz, komando hauei esker: "Sortu lotura magnetiko eta ahaztezin bat, arnasarik gabe eta gehiagorako gogoz utziko dituena".