Art, triskantzaren artista
Umezurtz sentitzen ginen hilabete guztien artean azaroa gustukoena dugun izaki txit sailkaezinak, inork salbatuko ez lukeen jendaila-mordoa, zinemaz aritzeko mintzo mordoilo adigaitza erabiltzen iaioak garen jende-modua.
Gau Beltza hurbil zen eta ez genuen infernu beltzena utzirik, konpainia egiteko nor etorriko zen berririk. Iaz agur egin genien, betiko egin ere, Halloween 13 guztietan agertzen ziren hilobiaz haraindiko Michael Myers hiltzaile mitikoari (zeinen egoki erabiltzen zituen maskara eta aizkora!) eta haren aurka pelikulaz pelikula aritzen zen Jamie Lee Curtisek antzezturiko Laurie Stroderi (urteak eman ditu mundua maldiziotik ateratzeko ahalegin ederretan)
Ez omen genuen aurten zeluloidezko odolez zipriztinduriko gaztaina erreak norekin partekatu. Karteldegiari ginen so, eta benetan merezi zuen munstrorik aurkitu ez. Pixkanaka-pixkanaka, baina, notiziyak hasi zitzaizkigun iristen: Art pailazoa bide zen bere etorrera prestatzen (aizkora zorrotzen, alegia, zerrari bateria berria jartzen, hots, bere mimo jantzia txukuntzen….).
Alaitu ginen oso; garaiz helduz gero, Artek salbatuko zigun Gau Beltza. Baita Halloweeneko ordu txikiak ere. Ezaguna genuen ez baitzen 2024ko hori maite dugun hilabetearen atarian berarekin elkartuko ginen estreinako aldia, aurten gurera ekarri duten Terrifier bere balentrien hirugarren atala baita.
Kontent asko, egundoko harrera egin genion aretoetan. Gainezka, mukuru, jendaiaz beterik ziren saloi zinematografikoak. Bai luxuzkoak bai gure etxe (edo hilobi) ondoko korrienteak ere. Pankartak eskuan eta maskara aurpegian, joan ginen ehunka diosala egitera. Kontent asko joan ere.
Izan dira, badira eta izango dira beldurrezko film gore mila, baina batek ere ez du Terrifier-ek aurkezten duen triskantza, masakrea, txikizioa gainditzen. Normalean, oro har, orain arte, izuzko pelikuletako eraileek hil egiten zintuzten, eta kito. Mailuz, tiroz, matxetez, elektrokuzioz, haginkadaz, zure odola zurrupatuz edo bihurkin elektriko batez. Seko hil, eta kito. Artek ez. Artek bere denbora hartzen du zu hiltzeko modua irudikatzeko. Minutuak pasatzen ditu prestaketetan. Eskura dituen tresnak ederki daki erabiltzen (baita bizirik izoztuko zaituzten su-itzalgailuak ere). Zirujauen jakinduria eta eskarmentua bere egin zituen aspaldi zaharrean. Gure gorputzak zenbat hezur, tendoi, artikulazio, hortz, litro odol, metro azal dituen badaki.
Ez izan dudarik, gu istant batez, azkar demonio akabatzeko erak kontrolatzen ditu. Baina horrela eginez gero, nola arraio gozatuko luke, nola demontre disfrutatu? Hitz bat ere egiten ez duen pailazo-mimo ikaragarriak bitan moztuko zaitu parekorik ez duen harakin bikain baten dotoreziaz, aurpegia erauziko dizu, mantso-mantso larrutu, azidoan hezurgabetu…
Artista hutsa izanik, zu, gu, hiltzea ez du nahikorik. Nahitaezko du estiloa. Ikusleok (pantailaren bestaldean babesturik) ezin sinetsi Artek darabilen… artea. Bere film hirugarrena bada anatomia ikasgai magistrala ere, cum laude batez biribilduko genukeen masterra.
Zin degizuet serio ari naizela. Art da datozen Gau Beltz askotako zirujau nagusia. Eta gu, umezurtz sentitzen zen populu basa zorioneko tribua bilakatu gara.
Harago ere joan gaitezke Arten gure defentsan. Zinematografikoki lan bikaina da filma, tentsioa eta akzioa ondo neurtzen dituena. Bai, onartzen dut kexa: aurreko bi Terrifier ikusita ez baduzu, hirugarrenaren sekretu batzuk ez dituzu boteprontoan menderatuko, baina zinez diotsut: hil baino askoz lehenago ohartuko zara ezkutuko kontu hamaikaz. Bai, egia da, agian beranduegi suertatuko zaigu , ordurako haragi puskak eta hezur apurrak baino ez baitzara izango. Sentitzen dut, lagun, horrelakoxea da… herioa.
Aktoreek badakite zertan dabiltzan. Artena egiten duenak sekulako mimoa da, Jokerrekin edo Buster Keatonekin pareka dezakezu lotsarik pe. Biziki bere kontra egiten duen neska aktoreak arte martzial hainbat kontrolatzen ditu. Beraz, haien arteko borroka nahiko parekatua sumatzen duzu beti…
Umezurtz ginen, bai, baina orain komunitate berria sortu dugu. Errukirik ez duen pailazo-harakin infernukoak adoptatu gaitu. Gurekin geratzeko prest da. Zergatik? Gabonetan ba omen duelako egiteko franko…
Zure interesekoa izan daiteke
"Olatuaren enbatean. Emakumeak eta itsasoa XX. mendean" erakusketa Bermeoko Arrantzaleen Museoan
Kostaldeko emakumeen lana funtsezkoa izan da arrantzan eta itsas historian, baina ez da aintzakotzat hartu izan; gizonezkoena izan da beti ardatz. Hori dela eta, emakume horien lanak izan duen, eta duen garrantzia aldarrikatzeko, Bermeoko Arrantzaleen Museoan Olatuaren Enbata erakusketa antolatu dute. Neskatila, saregile kontserberetako langile zein emakume armadoreen eguneroko lana erakusten duten objektuak jaso dituzte, baita emakume horien testigantzak ere. Era berean, bisita gidatuak zein hitzaldiak eta mahai inguruak eskainiko dituzte.
ZuNonHanDA! azoka ibiltariak Durangoko Azoka zabalduko du
Azaroaren 17tik abenduaren 4ra, Durangoko Kulturaren Jaialdia hasteko bezperara arte, 22 liburu aurkeztuko dituzte Euskal Herriko 19 liburu dendatan. Lehenengoz, Azoka egin aurretik egingo dute ZuNonHanDA!, bost aldiz haren ondoren egin eta gero.
"Hasiera bat" diskoaren birako azken kontzertua eman du Gorka Urbizuk, Victoria Eugenia Antzokian
Gorka Urbizuk igande honetan eman du "Tour Bat" biraren azken kontzertua, Victoria Eugenia Antzokian (Donostia). Lekunberriko musikariak 4 kontzertu eskaini ditu Donostiako antzoki horretan, eta sekulako harrera eta berotasuna jasota, denetan agortu ditu sarrera guztiak. Igandeko kontzertua ikusgai izango da oso osorik ETBn.
Eñaut Elorrieta eta Alos Quartet “Ahots kordak” prestatzen ari dira, kontzertu bakanen sorta
Estreinakoz, Eñaut Elorrietak eta Alos Quartetek kontzertu sorta bat emango dute: "Ahots kordak". Taldea sinplea eta eraginkorra izango da: soka laukote bat, ahotsaz osatua. Bidaia musikal honen lehen geldialdia Tolosan izango da, urtarrilaren 3an. Gasteizen, Zornotzan eta Donibane Lohizunen arituko dira gero.
Oinkari taldeak dantzan ospatuko du bere mende erdia
Villabonako dantza taldeak “50 urte dantzan” ikuskizuna taularatuko du Olaederra kiroldegian ostiralean, hilak 21. Korrontzi folk taldea urteurrenari batu zaio, “Oinkari 50” kantuaren bidez.
Durangoko Azokaren 60. edizioaren iragarkia
Durangoko Azokaren 60. edizioa abenduaren 5etik 8ra izango da. Iratxe Reparazen bizkar dago aurtengo Azokaren zuzendaritza kreatiboa.
Olaso Dorrea Fundazioaren funtsak handituz doaz, dohaintza baliotsuei esker
Olaso Dorrea Fundazioa bere artxiboak eta Monzon-Olaso Etxe Museoaren bilduma (Bergara) handitzeko eta aberasteko lanean ari da. XX. mendetik gaur arteko historian sakondu nahi du Fundazioak, bai eta ezagutarazi ere, eta, bide horretan, hauek jaso dituzte: Telesforo Monzonek gordetako Sabino Aranaren mikrofilmatutako obraren kopia bat, Lauaxetaren gabardina eta gurutzea, Karmele Urrestiri eta Txomin Letamendiri (Karmele filmeko protagonistak) Agirre lehendakariaren Gobernuak emandako dokumentazioa, Otaegi eta Garmendiaren aldeko pankarta, bala tiroz zulatutako Txomin Iturberen alkandora eta Txillarre baserriko lehen akordioaren originala.
“Gipúzcoa” Pio Caro Barojaren dokumentala, Tabakaleran
“Ipuscua” izena lehenbizikoz agertu zeneko milagarren urteurrenaren ospakizunei dagokie proiekzioa. Pelikula 1976 eta 1979 urteen artean filmatu zuten, eta Gipuzkoako orduko errealitate sozial eta kulturala jasotzen duen dokumentu etnografikoa da.
Frankofoniaren eremuan hizkuntza gutxituek dituzten erronkei buruzko biltzarra antolatu du Etxepare Institutuak Parisen
Astelehen honetan egindako aurkezpenean azaldu dutenez, hilaren 19an eta 20an egingo den topaketak bat egiten du Etxepare Euskal Institutuaren 15. urteurrenarekin, eta 'Ça colle au basque' ekimenaren testuinguruan antolatu da, unibertso frankofonoan euskararen eta euskal sorkuntzaren proiekzioa indartzeko abiatutako egitasmoaren baitan, alegia.
"GO!AZEN" telesailaren 12. denboraldia ikusgai da jada MAKUSI plataforman
Gaur goizetik, "GO!AZEN" telesailaren 12. denboraldiaren lehen atala MAKUSIn da ikusgai. ETB1era, aldiz, ostiralean iritsiko da. Basakabiko gaztetxoek abentura ugari biziko dituzte oraingoan ere. Udalekua guztiz aldatuta ikusiko dugu, Maitane zuzendariaren ideia berriekin eta adingabeen zentrotik etorritako gazteekin. Aurtengo istorioekin, elkar ulertzearen eta taldean aritzearen garrantziaz ohartarazi nahi dituzte ikus-entzule gazteak.