Deabru Beltzak konpainiak etxean ospatuko du 25. urteurrena
25 urtean bost kontinente eta 35 herrialde bisitatu eta gero, etxean ospatuko du mende laurdena Deabru Beltzak kale antzerkiko euskal konpainiak. Perkusio, piroteknia eta koreografiaz beteriko zortzi emanaldi eskainiko ditu taldeak Bizkaiko beste horrenbeste herritan, abuztuaren 9an Zaratamon hasi eta irailaren 4an Etxebarrian bukatuta.
Bizkaiko Aldundiak (emanaldien sustatzailea) azaldu duenez, emankizunak kalean izango dira, baina, pandemiaren ondorioz, aforoa mugatuta egongo da, eta bertaratzen diren herritarrek eserita ikusi beharko dute ikuskizuna.
Hau izango da egutegia: abuztuaren 9an, Zaratamon (Elexalde plazan); abuztuaren 10ean, Atxondon (Udaletxeko plazan); 11n, Ereñon (Udaletxeko plazan); 23an, Diman (Udaletxeko plazan); 24an, Alonsotegin; 25ean, Lemoizen (Armintzakalde hondartzako parkinean); 26an, Lanestosan; eta irailaren 4an, Etxebarrian (Udaletxeko plazan). Emanaldi guztiak 21:30ean hasiko dira.
Euskal Herriko hainbat antzerki taldetan ibilitako aktoreek sortu zuten Deabru Beltzak kale antzerkiko konpainia, 1996an. Ordudanik, 10 antzezlanen 3.000 emanaldi baino gehiago egin dituzte 35 herrialde baino gehiagotan.
Finalista aukeratu berri dute Espainiako Arte Eszenikoen XXIV. Max Sarietan, Symfeuny lanagatik, kale-ikuskizun onenaren kategorian, besteak beste Markeliñe euskal konpainiarekin batera. Hori ere etxean ospa lezakete, Bilbon banatuko baitira sariok.
Oraingoz, baina, kandelei putz eginez barik, Bizkaian zehar sugarrak zabalduz, danbor hotsak joz eta dantzan ospatuko dute hogeita bost urteko bide oparoa.
Zure interesekoa izan daiteke
Euskal Herriko emakume meatzarien historia ikusezina taularatu du Kalamua Sopelako taldeak
Kalamua Sopelako antzerki taldeak Euskal Herriko emakume meatzarien historia taularatu du Alas de hierro lanarekin. Taldea osatzen duten sei emakumeek sormena, aldarrikapena eta umorea uztartu dituzte. Ez dute emakume meatzarien abesti edo ereserkirik aurkitu, asko bilatu badute ere, baina hori ez da oztopo izan.
“Itzulera” Dejabu konpainiaren lanak irabazi du Donostia Antzerki saria
2025ean Donostian konpainia profesional batek euskaraz publiko helduarentzat egin duen lan onena izan da, epaimahaiaren arabera. 12.000 euroko saria eta margolan bat jasoko du konpainiak sari gisa, martxoaren 27an, eta antzezlan irabazlea taularatuko dute.
Lautan Hiru antzerki jaialdiak zortzi ikuskizun eskainiko ditu
Lau astez egingo dituzte antzerki emanaldiak Bilbon, ostegunetan, eta Baionara ere iritsiko da jaialdia, apirilaren 17an.
“7 urte” euskaraz estreinatuko dute
Agurtzane Intxaurragak film eta antzezlanaren egokitzapena egin du, eta gaur emango dute lehenengoz, Basaurin, Kandido Uranga, Jon Olivares, Iñigo Gastesi, Dorleta Urretabizkaia eta Aitor Beltran aktoreek.
"Kandida" Patxo Telleriaren antzezlana estreinatuko dute, Bilbon
Miren Gaztañaga, Nerea Mazo eta Mikel Martinez dira Arriaga antzokian otsailaren 3an estreinatuko den euskarazko ekoizpenaren protagonistak.
Tanttakak "Desobedienteak 18/98" antzezlana estreinatuko du Arriagan
Maria Goiricelayak idatzi eta Fernando Bernuesek eta Mireia Gabilondok egokitu eta zuzendu duten antzezlanak desobedientzia zibilaren ibilbide bat marraztu, eta 18/98 sumarioan murgiltzen du ikuslea. Euskarazko bertsioa gaur, urtarrilak 8, estreinatuko dute, Arriagan, eta gaztelaniazkoa bihar, urtarrilak 9, agertoki berean. Gero, biran izango da ikuskizuna: Eibar, Zarautz, Donostia, Gasteiz, Barakaldo, Hondarribia...
Antzerkia eta dantza asko, dFERIAko 31 ikuskizunetan
Arte eszenikoen Donostiako azokaren 32. edizioko eskaintzaren % 15 izango da euskaraz. Tanttaka Teatroak 'desobedienteak 18/98' auziari buruzko antzezlana aurkeztuko du martxoaren 15ean.
Arriagak kontzertua eta antzerki ibilbideak eskainiko dizkio izena eman zion konpositoreari
2026ko urtarrilaren 17an Juan Crisostomo de Arriaga konpositorearen heriotza goiztiarraren (19 urte zituela hil zen) 200 urte beteko direla eta, haren izena daraman Bilboko antzokiak proposamen bikoitza egingo du. Urtarrilaren 17an, La Ritirata Josetxu Obregón bilbotar musikariak zuzendutako orkestrak Arriaga y el eco de su tiempo kontzertua eskainiko du, eta urtarrilaren 10ean eta 24an, eta otsailaren 1ean, goizez, Koldo Olabarrik eta Ainhoa Etxebarria aktoreek prestatutako antzerki ibilbideak izango dira. Kontzerturako sarrerak 26 eta 52 euro bitarteko prezioan eros daitezke, eta ibilbideetakoak 15 euroan.
"Muro de piedra" antzezlanak inauguratuko du Pabellon 6ko Gazte Konpainiaren espazio berria, Bilbon
Bilboko udal antzoki berrian ikusiko den lehen antzezlana "oroitzapen baten historia da". Torremolinoseko Pasaje Begoña kalezulo txikian, polizia-sarekada masibo bat egin zuten errepresio frankistatik ezkutuan askatasunez bizitzen saiatzen ari zirenen kontra, 1971an. Markel Hernandezen testua Aritz Castillok, Nora Urdanpilletak, Nerea Sanzek, Pino de Pablosek, Markel Urrestarazuk eta Arnatz Puertasek zuzendu, sortu eta interpretatu dute, talde lanean. Guk Sanzekin eta Castillorekin hitz egin dugu. Emanaldiak azaroaren 6tik 23ra egingo dituzte, ostegunetik igandera.
“Dena egiteke dago”tik “Dena eginda dago”ra arteko tentsioan mugituko da “Ikimilikiliklik Vol.2” lan berria
Edurne Azkarate zuzendari artistikoaren gidaritzapean, Loraldia festibalaren ikuskizun berriak Laboa, Artze anaien eta Zumetaren jatorrizko lanaren espiritu esperimental eta abangoardiazkoa berpiztu nahi du musika, poesia, dramaturgia eta zuzeneko ikus-entzunezkoen bidez.