Euskadi sariak, Ramon Eder, Xamar, Daniel Innerarity eta Isabel Etxeberriarentzat

Bingen Zupiria Eusko Jaurlaritzako Kultura eta Hizkuntza Politika sailburuak 2019ko Euskadi Literatura sarien irabazleak iragarri ditu gaur, Bilbon: Ramón Eder (Palmeras Solitarias) Gaztelaniazko Literaturan; Juan Carlos Etxegoien “Xamar” (Etxera bidean) Euskarazko Saiakeran; Daniel Innerarity (Política para perplejos) Gaztelaniazko Saiakeran; eta Isabel Etxeberria (Etsaiak, lagunak, ezkongaiak, maitaleak, senar-emazteak Alice Munroren lana) Euskarazko Literatura Itzulpenean.

Izen hauek duela bi aste iragarritako beste irabazleen zerrendari gehitu zaizkio: Irati Elorrieta (Neguko argiak) Euskarazko Literatura atalean, Patxi Zubizarreta (Korri, Kurru, korri!) Euskarazko Haur eta Gazte Literatura atalean eta Asisko Urmeneta (AztiHitza: Xahoren Biografikoa) Literatura Lanaren Ilustrazioan.

Euskadi Literatura sariak azaroaren 18an emango dizkiete, Tabakaleran, zazpi modalitateetako irabazleei. Saridun bakoitzak 18.000 euroko saria izango du, eta beste 4.000 euro eskura ditzake bere lana beste hizkuntza batean argitaratzen bada.

Karmelo C. Iribarren iazko irabazlea buru izan duen epaimahaiaren aburuz, Ramón Eder (Irunberri, 1952) azken hamarkada hauetako aforismo idazlerik garrantzitsuena da, eta Palmeras Solitarias obrako aforismoak “jakintsu burlati eta zoriontsu” baten aforismoak dira, klasikoen modura emanak.

Saiakera Euskaraz ataleko epaimahaiko kideek, bestalde, azpimarratu dute Xamarrek “trebezia handiz” darabilela luma, “eta idazkera arin eta –aldi berean– jaso batez ondu duela Etxera bidean-en”, zeinetan idazleak bere belaunaldiaren kronika eskaini baitigu. Aezkoa eta Garraldako lurretan euskara berreskuratzeko bidean izandako bozkario eta oztopoak ditu kontagai liburuak.

Política para perplejos Daniel Innerarityren (Bilbo, 1959) lanak, halaber, “begirada argia eskaintzen du mendez mende finkatutako oinarriak dituen baina oinarri horiek aldatzen ari den munduari buruz”, epaimahaiak dioenez. “Innerarityren gogoetak aukera ematen du panoramaren giltzarrietako batzuk hautemateko, baita inoiz gertatuko ez zela, edo inoiz errepikatuko ez zela, pentsatzen genuena zergatik gertatzen ari den ulertzeko ere”, gehitzen du.

Etsaiak, lagunak, ezkongaiak, maitaleak, senar-emazteak Alice Munroren lana euskarara ekartzeko Isabel Etxeberriak eginiko lana saritu du Literatura Itzulpena Euskarara modalitateko epaimahaiak: “Itzulpen xaloa da, leiala, zintzoa, batere erakuskeriarik gabe biltzen dituena jatorrizkoaren estilo fina”.