Talde batek bere gain hartu du Derioko autobusen kontrako erasoa

Identifikatu gabeko talde batek bere gain hartu du aurreko asteburuan, Derion (Bizkaia), izandako zortzi autobusen kontrako erasoa, Euskal Irrati Telebistari (EiTB) igorritako email baten bidez.

Gainera, taldeak gogor kritikatu ditu alderdi politikoak, bereziki EH Bildu eta Sortu. Haien arabera, "preso politiko gehienen borrokari irain egiten diote" eta "jarrera honek beste ondorio larri batzuk eragiten ditu. Errepresioari alfonbra gorria jartzen diote".

"Gutun hau idazten dugunok gure gain hartu nahi dugu Derioko autobusen aurkako erasoa, zeinaren ondorioz zortzi ibilgailu erre egin ziren", idatzi du taldeak testuaren hasieran. Ondoren, idazkian diotenez, "Ibon Iparragirre euskal preso politikoa hil zorian da Espainiako estatuak aplikatzen dion espetxe politikaren erruz. Berarekin eta beste preso gaixoekin egiten dutena onartezina da edozein ikuspuntutik. Ekintza honek izan duen oihartzunak Ibonen egoera albiste eta eztabaida guztietan lehenengo gai bezala kokatu du".

Gainera, alderdi politikoak ere gogor kritikatu egin dituzte, EAJren, PSOEren eta PPren kasuan "zalantzarik ez genuen gure biolentziaz hitz egingo zutela beraiek egunero aplikatzen dutena estaltzeko asmoz" eta "guk biolentzia erabiltzen ez dugunean, ordea, oraindik eta errazago estaltzen dute presoekin egiten dutena". Hala, "defendatzen duguna bidezkoa dela konbentzituta gaude eta gure esku dagoen guztia egiten jarraituko dugu egoera hauei aurre egiteko. Borrokaren aldeko hautua egin dugu", ziurtatu egin dute.

Kritika gogorrak EH Bilduren eta Sorturen aurka

EH Bilduri eta, "batez ere, Sorturi" eskaini diete punturik zabalena. Testuaren egileak ez dira harritu ekintzaren ostean ezker abertzaleak izandako erreakzioarekin, "Euskal Herriaren zapalkuntza mantentzen dutenen ondoan lerrokatu baitira". Haien ustean, ezker abertzalea kontraesankorra da presoen alde egiten duela esan baina Derioko erasoa "modu sinplistan kritikatzean, zeharka, preso politiko gehienen borrokari irain" egiten diotelako.

Era berean, testuan agertzen denaren arabera, EH Bilduk eta Sortuk "errepresioari alfonbra gorria jartzen diote ekintza egin dugunok bakarrik gaudela salduz. Badakigu hurrengo urratsak biolentzia erabiltzen dugun militante politikoen atxiloketak txalotzea izango dela, salaketaren aurreko azken urratsa, eta hau guztia sisteman integratzeko baino balio ez duten poltrona batzuen truke".

Gutunaren azken partean, indarkeriaren aldeko defentsa egin dute, sistemaren "desestabilizazioa" erdiesteko.