Eusko Jaurlaritzak esan du ez zaiela esleipenik egin Antxon Alonsoren enpresei eta ez duela irregulartasunik antzeman

Eusko Jaurlaritzak ez die kontraturik esleitu Antxon Alonso euskal enpresariarekin lotutako 19 enpresei, eta ez du irregulartasunik aurkitu 'Koldo auziari' lotutako enpresekin edo Aldi Baterako Enpresa Elkarteekin (ABEE) egindako 2.022 esleipenetan.

Imanol Pradales lehendakariak duela hilabete iragarri zuen Eusko Jaurlaritzak berrikusi egingo zituela azken hamar urteetan Jaurlaritzak sinatutako kontratu publiko guztiak, baten batek 'Koldo auzia'rekin lotutako sozietateekin zerikusirik ote zuen jakiteko, baina orduan ziurtatu zuen ez zegoela kasu horrekin lotutako iruzurren "zantzu, informazio edo susmo txikienik".

Astearte honetan, Gobernu Kontseiluaren bileraren osteko prentsaurrekoan, Maria Ubarretxena Eusko Jaurlaritzako bozeramaileak ikerketa horren ondorioak aurkeztu ditu. Horrela, Antxon Alonso euskal enpresariarekin zerikusia duten 19 enpresarekin egin daitezkeen kontratazioak berrikusi dira, eta enpresa horietako bat ere ez da ageri lizitatzaile gisa, ezta ezein kontraturen esleipendun gisa ere.

Halaber, beste enpresa-talde batzuekin eta ABEEekin egindako kontratu publikoak berrikusi dira, 'Koldo auzia'ren sumarioan agertzen direnak edo Legebiltzarreko euskal taldeek galdegin dituztenak. Guztira, 3.663 kontratazio-prozesu zenbatu dira, eta hamar urteotan enpresa horietakoren bat agertu da, Euskadin 2.022 kasutan kontratu publikoren baten esleipendun izan direnak.

Dena dela, esleipen publikoen % 0,33 baino ez dira hamar urteko aldi horretan, eta txostenak egiaztatu du ez dagoela inolako irregulartasunik aztertutako kontratazio-prozesuetan.

Eusko Jaurlaritzan, aipatutako enpresek 1.393 prozesutan parte hartu dute eta horietako 739tan esleipendunak izan dira.