ELA, CCOO, LAB, Steilas eta UGTk ikasturte hasiera adostea eskatu diote Jaurlaritzari

ELAk, CCOOk, LABek, Steilasek eta UGTk “ikasturte hasiera eta datorren urterako beharrezko segurtasun eta osasun neurriak” sindikatuekin adosteko eskatu diote Hezkuntza Sailari, zeren bestela “mobilizazioak” jarriko omen dituzte martxan, “langileentzat eta ikasleentzat osasun bermeak dauden arte”.

Agiri bateratu batean, bost sindikatuek adierazi dute "ia ikastetxe guztiek bat egin dutela sindikatuek planteatutako ikasturte amaierako proposamenarekin, Hezkuntza Sailaren arduragabekeriaren eta irizpide aldakorren aurrean", eta iragarri dute datozen egunetan "adi" egongo direla "zentro bakoitzean aurrez aurreko itzulera behar bezalako osasun-bermeekin egin dadin"

Ildo horretan, azpimarratu dute astelehen honetan, maiatzaren 25ean, EAEn oso ikastetxe gutxik jarri dituztela abian aurrez aurreko ikasketak, eta oso ikasle talde mugatuentzat izan direla, batez ere errefortzu bat eskatzen duten ikasleentzat edo unibertsitatean sartzeko azterketa prestatzeko Batxilergoko 2. urteko ikasleentzat.

Beraz, bost sindikatuek adierazi dutenez, "Hezkuntzak Sailak ez bezala, ikastetxe gehienek joan den astean sindikatuok Sailari helarazi genion proposamenaren ildotik doazen ikasturte amaierako planteamendua egitea erabaki dute".

Bost sindikatuek idazkian adierazi dutenez, "sindikatuen eta, oro har, hezkuntza-komunitate osoaren gaitzespenak eta presioak Hezkuntza Saila bere hasierako erabakiak aldatzera behartu badute ere, oso larria eta arduragabea izaten ari da ikasturte amaiera atipiko honi begira egiten ari den kudeaketa"; izan ere, sindikatuen ikuspuntutik, Jaurlaritza "hezkuntza-eragileekin adostu gabeko aldebakarreko erabakiak hartzen ari da etengabe".

Haien ustez, "ikastetxe bakoitzaren autonomia aitzakiatzat hartuta, ikastetxe bakoitzaren esku utzi nahi dituzte itzulera presentzialaren erantzukizuna eta pisua, eta ikastetxe askok ez dute Hezkuntza Ikuskaritzaren erantzunik jaso haren itzulera-planaren aurrean; beraz, ez dakite haren itzulera-planak Sailaren oniritzia duenik ere".

Hori dela eta, "ikasturte amaiera honi eta Jaurlaritzaren arduragabekeriak eragindako egoerei adi egoteaz gain, Hezkuntza Sailari eskatzen diote negoziatu eta adostu dezala langileen ordezkariekin datorren ikasturtearen hasierako plangintza eta baldintzak, bai eta beharrezkoak diren segurtasun- eta osasun neurriak” ere.