Nafarroako Gobernuak Siemens Gamesaren "konpromiso arduratsua" espero du

Mikel Irujo Garapen Ekonomiko eta Enpresarialeko kontseilariak astearte honetan Nafarroako Parlamentuan esan duenez, Nafarroako Gobernuak Siemens Gamesaren "konpromiso arduratsua" espero du, Foru Erkidegoan dituen langileekiko, Siemensek Gamesaren akzioen % 100 bereganatuta.

Navarra Sumak eskatutako agerraldian, Irujok ziurtatu du Nafarroako Gobernuak bilerak egin dituela konpainiaren inguruarekin, hainbat mailatan, eta sindikatuekin, eta topaketak izaten jarraituko dutela. Hain zuzen, iragarri du lanean daudela bilera egiteko, "mailarik gorenean", Siemens Gamesako kontseilari delegatu berriarekin. Helburua da ezagutzea Mistral planaren xehetasunak; enpresako plan operatibo berria da Mistral.

"Izandako bilera guztietan, eta egingo ditugunetan ere, konpainiari adierazi diogu kezkatuta gaudela Siemens Gamesak egun Nafarroan dituen 1.763 langileengatik", esan du. Sarrigurenen, Iruñean eta Arazurin daude lanean langile horiek: "Irmoki jarraituko dugu lanean, konpromiso arduratsua eskatzen diogu enpresari; langileek prestakuntza handia dute, bai eta balio erantsia ere", adierazi du.

Gehitu duenez, Europa mailan sektore eolikorako kritikoa den egoera baten testuinguruan, "Siemens Gamesak balio eta garrantzi handia du Nafarroarentzat", eta Gobernuaren nahia da Eskaintza Publiko honen eragina "ahalik eta txikiena" izan dadila.

Azaldu duenez, "enpresak nabarmendu du lantaldeko lehiakortasuna, eta esan du langileak ez direla arazoa". Horren gainean, gogora ekarri du nola 2017tik, alegia, Siemens Taldea eta Gamesa fusionatu zirenetik, Foru Erkidegoan dituen langileen kopuruak gora egin duen, "garai hartako 1.335etatik egungo 1.763etara, hori Agoitzeko pala-fabrikazioko lantegiko 239ak kontuan izan gabe".

Kontseilariak, halaber, zehaztu du enpresak Estatu espainiarrean urtean 1.250 milioi euroko gastua gauzatzen duela erosketak egiteko, eta horietatik 240 milioi nafar hornitzaileentzat izan direla. Horrek erakusten du "enpresak konfiantza duela" Foru Erkidegoan, eta aldezten duela Nafarroako lantegietako la nona.

Navarra Sumako bozeramaile Carlos Perez Nievasek, horren inguruan, esan du kezkatuta daudela "etorkizunagatik". Argitu duenez, hori ez da soilik aurrekariengatik, baizik eta, horrez gain, "Gobernu honetako bazkide batzuengatik". Esan du, Nafarroako Gobernuak "ezinezko" bilakatu duela estepako hegaztiak babesten duen garapen eolikoa izatea: "Gainera, batzuek nahi dute egoerak okerrera egitea, beraiek hobeto egoteko", salatu du.

Sindikatuek "benetako inplikazioa eta konpromiso aktiboa" eskatu dizkiote Nafarroako Gobernuari

Bitartean, Nafarroako Parlamentuko kanpoaldean, elkarretaratze batean, ELA, UGT eta CC. OO. sindikatuek "benetako inplikazioa eta konpromiso aktiboa" eskatu dizkiote Nafarroako Gobernuari, Siemens Gamesan enplegua eta lan-baldintzak aldezteko. Gaitzetsi dutenez, Siemens eta Gamesa fusionatu zirenetik, "itxierak eta kaleratzeak etengabeak izan dira", eta kaleratua izateko mehatxuarekin egoteak "eragin handia du langileen buruko osasunean; izan ere, gero eta ohikoagoak dira estres-kasuak eta, horien ondorioz, lan-bajak".

Gehitu dutenez, ekainean, jakitera eman zutenean Siemens Energyk Siemens Gamesako akzio guztiak erosiko zituela, bilerak izan zituzten Nafarroako Gobernuarekin, konpainiaren etorkizunak eragindako kezka helarazteko. Ordutik, adierazi dute, zurrumurruak izan dira: mundu-mailan, enpresak langileen % 10 kaleratzeko asmoa omen du. Hori dela eta, Gobernuari esan diote "ekintzak gauzatzeko garaia" dela, "ez hitzak botatzekoa".