Aiaraldeko enplegua defendatu eta Guardianen itxiera geldiarazteko eskatu du giza kate batek Gasteizen

Berrehun bat lagunek protesta ekimena egin dute larunbat honetan Gasteizen, Laudioko Guardian lantegiaren itxiera gelditzeko eta Aiaraldeko enplegua defendatzeko eskatuz.

Elkarretaratzea Gasteizko Probintzia Plazan egin dute, eta bertan hiru pankarta jarri dituzte, 'Aiaraldea defenda dezagun' leloarekin.

Arabako Foru Aldundiaren eraikina inguratu duen giza katea osatu dute, multinazionalaren lantegiko enpresa-batzordearen pankarta bat buru zuela. Pankarta horretan, 'Guardian ez itxi, Eusko Jaurlaritza konplize' irakur zitekeen.

Elkarretaratzea amaitu ostean irakurri duten manifestuan, eskualdea "existituko ez balitz bezala" jokatzea leporatu diete erakundeei. Azpimarratu dutenez, eskualde horretan, "industria-ehuna nola desegiten ari den eta enpresak nola ixten dituzten" ikusi dute, "erakundek sarraski hori gelditzeko batere keinurik egin ez duten bitartean".

"Abandonatzeaz gainera, gurea defendatzeagatik kriminalizatu ere egiten gaituzte; gatazkatsuak garela diote egiten dugun gauza bakarra gure eskubideen alde borrokatzea denean", nabarmendu dute.

Manifestuan, SOS Aiaraldea kolektiboak ohartarazi du ez dutela prekarietatea isilean onartuko, itxiera bakoitzak "merkataritza eta gazteria kolpatzen dituelako, baita eskualde hau eraikitzeko bizitza osoan lan egin dutenak ere".

Eusko Jaurlaritzari leporatu diote "lantegiak zigorgabetasun osoz desegiten dituzten multinazionalei aurre egin aurretik beste alde batera begiratzea" eta eskualdeko bizilagunak "miseriara" kondenatzea. 

Azpimarratu dutenez, "larriena da gu engainatzen saiatzen direla errealitatea desitxuratuz, eta hitz egiten digute inbertitzaileez, industria-planez eta bestelako kontuez, denboraren poderioz beti ezerezean geratzen direnak, hitzontzikeriak". 

Hori dela eta, "politika publiko eraginkorrak"  eta "prestakuntzan eta enpleguan inbertitzea" eskatu dute, "komunitate hau une zailenetan sostengatu dutenak ez daitezen izan prekarietatearen prezioa eta guztion ongizatea zaindu beharko luketenen erantzukizun falta ordaintzen lehenak". 

Guardianeko enpresa-batzordeko kideek ere hartu dute parte mobilizazioan, eta berretsi dute ez dutela "inolako itxaropenik" lantegiaren etorkizunaren gainean, ezta "konfiantzarik" ere Eusko Jaurlaritzarengan, "denbora amaitzen ari delako" eta inbertitzaile berririk ez dagoelako.

Joan den otsailaren 25ean egin zen 100 urtetik gorako fabrikako 171 langileak kaleratzea ekarriko duen enplegu-erregulazioko espedienterako kontsultaldiko lehen bilera. 

AEBko multinazionalak hilabete lehenago jakinarazi zuen beira lantegia ixteko asmoa zuela, labearen egoerak bideraezin egiten zuela argudiatuta. Sindikatuek espedientea kentzea eskatu dute, azpiegitura hori modu irregularrean itzali zela iritzita.

LABek Guardianeko enplegu-erregulazioko espedientea berehala kentzea eskatu du

LAB sindikatuak aste honetan ziurtatu duenez, Laudioko Guardian enpresako zuzendaritza "fede txarrez" ari da jokatzen enplegu-erregulazioko espedientearen kontsulta epean, eta berehala erretiratzea eskatu du.

Ohar batean, LABek adierazi du enplegu-erregulazioko espediente honen negoziazioak agerian uzten duela "Guardianek aspaldi programatuta zuela lantegiaren itxiera", eta berretsi du ez dituela onartzen enpresak hura aurkezteko emandako arrazoiak, oraindik uste baitu, "bideragarria izateaz gain, proiektu berriekin jarrai dezakeela, eskualdeko industria-sarea eta ehunka familiaren etorkizuna bermatzeko". 

Horren arabera, astelehenean kontsulta epearen barruan izandako bileran sindikatuek espedientearen arrazoiak egiaztatzeko beharrezko dokumentazioa eskatu zuten, baina enpresak oraindik ez die eman. Hori dela eta, LABek berretsi du "Guardianen fede txarra agerikoa" dela.

Hori dela eta, espedientearen bertan behera uzteko eskatu du, eta erakundeei galdegin die premiaz jokatzeko eta berehalako konponbideak emateko, lanpostuei eutsi eta industria-jarduerarekin jarraitzeko lehentasunarekin.