Bermeoko suteak basoko 50 hektarea kiskali ditu
Bermeoko sutea itzalita dago, Bizkaiko Foru Aldundiak jakitera eman duenez, basoko 50 hektarea kiskali ostean. Itzaltze-taldeek uste dute litekeena dela sutea hasi izana linea elektriko batek zuhaiztia jo duelako; bi laguntza-talde izango dira bertan, gau osoan zehar, sua ez berpizteko.
Carlos Uriagereka Bizkaiko Foru Aldundiaren Baso Zerbitzuko zuzendariaren hitzetan, larrialdi zerbitzuek "azkar" lan egin dute, eta horri esker "sua errepidearen ezkerraldean" mantentzea lortu dute. "Lanean jarraitzen dute, baina nahiko kontrolaturik dute", gaineratu du. Lau etxebizitza eta gas instalazio bat sugarretatik defendatu behar izan dituztela azaldu du Uriagerekak.
Arene-San Pelaio auzoa
Baso-sutea goizaldean piztu da Bermeoko (Bizkaia) Arene-San Pelaio auzoan, Bakio eta Bermeo lotzen dituen errepidetik hurbil, Radio Euskadik aurreratu duenez.
Igandetik astelehenera bitartean, Sopelan eta Berangon, 200 bat hektarea kiskali zituen sua itzali eta egun bat geroago piztu da sua Bermeon.
Dirudienez, sua gas instalazio (Enagas) batetik gertu piztu da eta Matxikakoko zenbait baserri hustu dituzte badaezpada, Bermeoko Udalak azaldu duenez. 25 bat pertsona etxetik atera dituzte, SOS Deiakek jakitera eman duenez.
Azkenean suteak ez ditu hustutako etxebizitzak harrapatu, ezta gas instalazioa ere.
Artatza (Leioa), Gernika eta Derioko 20 suhiltzaile zonaldean daude, baita Gurutze Gorriko boluntarioak ere. Ertzaintzaren helikoptero bat zonaldearen gainetik hegan egiten ari da.
Ingurumen Ministerioko hidrohegazkin batek ur deskarga batzuk egin ditu 10:30etik aurrera, baina dagoeneko joan egin da egoerak hobera egin duela ikusita.
Sutea Bermeon. Argazkia: Bizkaiko suhiltzaileak
Bestalde, BI-3101 Bermeo-Bakio errepidea itxi dute. Era berean, Matxikoko itsasargira doan errepidea, BI-4203, itxi dute segurtasuna bermatzeko, Ertzaintzak jakinarazi duenez.
“Sua baserriko teilatua harrapatzen ari dela ikusten ari naiz”
Etxetik atera duten bizilagun batek bere kezka azaldu du Radio Euskadin: “Sua baserriko teilatua harrapatzen ari dela ikusten ari naiz”. “Goizeko seietan heldu dira eta une batetik bestera etxetik ateratzeko, gertu egoteko esan digute”, azaldu du. “Lehorteak ez du batere laguntzen”, deitoratu du.
Unai Rementeria Bizkaiko ahaldun nagusia zonaldera hurbildu da. Sua kostaldearen eta errepidearen artean, Matxitxako lurmuturraren magalean, dagoela azaldu du buruzagiak. “Suhiltzaileak sua bertatik ihes egiteko lanean ari dira”, esan du Radio Euskadin.
Sutea Bermeon. Argazkia: Bizkaiko suhiltzaileak
Arantzako sutea ere, itzalita
Bestalde, 230 hektarea kiskali dituen Arantzako (Nafarroa) sutea ere itzalita dago.
Nafarroako Gobernuak jakinarazi duenez, sutea 18:30ak aldera jo dute itzaltzat. Ordu horretan bueltatu dira Oronozeko parkera bertan zeuden suhiltzaileak, gunean egiten ari ziren lanak amaitu ostean.
Behin-behineko kalkuluen arabera, suteak 230 hektareari eragin die; dena den, datu hori ez da behin betikoa, zeren eta perimetroan eraginik jasan ez duten guneak daude.
Zure interesekoa izan daiteke
Matrikulazioa % 5 jaitsiko dela uste du Hezkuntza Sailak, baina ikasturtean zehar heldutako ikasleekin orekatu daitekeela erantsi du
Begoña Pedrosa Hezkuntza sailburuak azaldu duenez, matrikula kopuruak % 5 inguru egin du behera, datu demografikoak kontuan hartuta egindako estimazioen arabera. Dena dela, iragarri du beherakada "matrikulazio biziak" konpentsatuko duela; izan ere, irailetik 5.400 ikaslek eman dute izena EAEko hezkuntza sisteman.
Gidari bat ikertzen ari dira istripu batetik ihes egin eta alkoholemia proba egiteari uko egiteagatik
Ertzaintzak ikertu gisa inputatu du bart Trapagaranen beste ibilgailu baten kontra istripua izan eta ihes egiten saiatu zen gidari bat, bide-segurtasunaren aurkako ustezko delitu bat egotzita. Eusko Jaurlaritzako Segurtasun Sailak jakinarazi duenez, larunbatean, 21:00ak aldera, bi ibilgailuk talka egin zuten Bizkaiko udalerri horretan, eta gidarietako bat bertan artatu behar izan zuten. Beste gidaria, onik atera zena, ihes egiten saiatu zen, baina agenteek geldiarazi egin zuten. Gizonak uko egin zion alkoholemia proba egiteari.
Hiru pertsona artatu dituzte Usurbilen, sute batean kea arnasteagatik, eta beste bat Errenterian
Usurbile, hiru pertsonak tokian bertan artatu dituzte, baina Errenterian, Donostia Ospitalera eraman behar izan dute emakume bat. Barañaingo supermerkatu batean ere sutea izan da larunbat honetan baina ez da inor zauritu.
Manteroen kontrako "poliziaren esku-hartze bortitza" salatu dute dozenaka lagunek Bilbon
Mbolo Moye Doole eta Manteroekin bat! plataformek deituta, ostegunean Ertzaintza eta Udaltzaingoa manteroen aurka indarkeriaz aritu zirela salatu dute. Horien esanetan, "ez da gertaera isolatua izan", hilero jazotzen baitira halakoak.
Euskaraz bizitzeko eskubidea aldarrikatu eta EHEko lau ekintzaileren aurkako epaiketa salatu dute dozenaka lagunek Baionan
Euria eta hotza egin badu ere, 200 euskaltzale batu dira protestara datorren ostegunean epaituko dituzten Euskal Herrian Euskarazeko lau kideei babesa emateko.
Adingabe bat atxilotu dute Getxon, beste gazte bati lepoan labankadak eman eta larri zauritzeagatik
Ertzaintzak jasotako testigantzen arabera, 01:00ak aldera, hiru gazte Areeta auzoko parke batean zeuden banku batean eserita, erasotzailea eurengana joan eta oldartu zitzaienean. Higu gazteek korrika alde egin zuten baina bat harrapatu eta zauritu egin zuen.
Kamioi batek A63 autobian izandako istripuak auto-ilara luzeak eragin ditu Donibane Lohizune parean
Ibilgailua irauli egin da, eta ondorioz zama galdu du. Errepidea erabat itxi dute eta 6 kilometrora arteko ilarak sortu dira, baina 19:15ean errei bat ireki dute bertan hiru orduz geldirik egon diren ibilgailuak pasatzeko. Ondoren, berriro itxi dute bidea, kamioia bertatik kendu ahal izateko.
Gizon bat atxilotu dute Errenterian beste gizon bat labanaz hiltzen saiatzea egotzita
Ertzaintzak atzo atxilotu zuen 36 urteko gizasemea, baina gertakariak hilaren 12an jazo ziren, Gipuzkoako udalerri horretako lokal batean. Biktima, 21 urtekoa, ospitaleratu egin behar izan zuten, zauri larriak baitzituen.
Osasun sailburuaren arabera, iraungitako txertoen kasuak "ESI batean edo bitan izan dira, Donostialdekoan tartean"
Alberto Martinezek ETBn egindako elkarrizketa batean azaldu duenez, pertsona batek "bere lana egin beharko lukeen modura egin ez duela ondorioztatzen bada, horren ardura hartu beharko luke, zalantzarik gabe". Sailburu gisa, ahal den neurrian, horrelako akatsak ez direla berriro jazoko bermatu behar duela nabarmendu du, hori baita bere "ardura".
Euskal eskola publikoen "itxierak eta bat-egiteak" itunpeko ikastetxeei "artifizialki eusteko" direla salatu du Sumarrek
Sumar Mugimenduak, Ezker Anitza-IUk eta Berdeak Equok "Hezkuntza publikoaren aldeko frontea" ekitaldia egin dute larunbat honetan Santurtzin, EAEko hezkuntza publikoaren egoera aztertzeko.