Errefuxiatuen minari 'erantzun azkarra' ematea eskatu du lehendakariak
Euren herrialdeetatik ihesi, Europara sartu nahian dabiltzan errefuxiatuek pairatzen duten "bidegabekeriak eragindako minari erantzun azkar, eraginkor eta gizatiarra" eman behar zaiela uste du Eusko Jaurlaritzak, eta horren aldeko aldarria egin du Iñigo Urkullu lehendakariak, hark irakurri baitu Jaurlaritzak auzi honen inguruan duen iritzia jasotzen duen adierazpen instituzionala.
Jaurlaritzak gobernu bilera izan du astearte honetan, eta besteak beste, Mazedonian azken orduetan gertatutakoa hartu dute hizpide. Batzarraren ondotik, errefuxiatuen krisiaz eta Europak horren inguruan izandako jarreraz adierazpen instituzionala irakurri du lehendakariak berak, ondoan sailburuak zituela.
Urkulluren hitzetan, "Euskadiren ametsa izan da beti Europa, Europa batu eta arimaduna". Dena dela, azkenaldian Europak "arima horri uko" egin diola uste du lehendakariak, eta "Europako Gobernuaren balio-krisia" deitoratu du.
"Babes bila dabiltzan lagun horiek pairatzen ari diren bidegabekeriak harridura, mina eta inpotentzia eragiten digu. Gure jarrera etiko eta demokratiko sakonenei eragin die", nabarmendu du lehendakariak.
Jaurlaritzaren adierazpen instituzionalaren arabera, hau ez da errefuxiatuen krisia, "Europako Gobernuaren eta gobernuen balio-krisialdiaren adierazle nagusia" baizik. Izan ere, Jaurlaritzaren aburuz, gobernu horiek "balio instrumentalak pertsonen balioaren aurretik jarri dituzte". Horren aurrean, Euskadik bere "ahots kritikoa" entzunarazi behar du, Urkulluren hitzetan.
"Gu ere errefuxiatuak izan gara"
Lehendakariak esan duenez, euskaldunok ere, uneren batean, "errefuxiatuak izan gara eta beste herrialde batzuek harrera egin digute". Horren ildoan, Eusko Jaurlaritzak bere konpromisoa adierazi nahi izan du "iheslari diren lagunek jasaten ari diren giza krisiari erantzun azkar, eraginkor eta gizatiarra emateko".
Jaurlaritzaren aburuz, Europak ere "giza eskubideen eta gizaki guztien duintasunaren defentsan duen erantzukizuna onartu behar du, nazioarteko zuzenbidea errespetatuta". Hala, adierazpenak elkartasun, erantzukizun eta legaltasun konpromisoak berreskuratzeko deia egin du.
"Jaurlaritzak eta euskal gizarteak konpromiso horiek bete beharrekoak direla dute, beti amestu eta defendatu dugun Europa batu, gizatiar eta arimadunaren isla baitira", laburbildu du.
Albiste gehiago gizartea
Motorzale bat larri zauritu da Bidankozen, auto batekin talka egin eta aldapa batetik behera erorita
Ezbeharra igandean jazo zen, 19:45ean, NA-2130 errepideko 8,9 kilometroan. Zauritua Nafarroako Unibertsitate Ospitalera eraman zuten, femurra hautsita zuela.
Zerura begira, San Joan bezperan
Iparraldean ostarteak zabalduko dira, baina adi hegoaldean, iluntzean trumoi-zaparradak botako ditu eta.
Bederatzi pertsona zauritu dira Galdakaon, auto batek harrapatuta
Auto erakusketa bateko hainbat ikusle zauritu dira Galdakaon (Bizkaia), parte hartzen ari zen autoetako batek harrapatuta. Zaurituak ospitalera eraman dituzte. Motor Show ikuskizunean gertatu da ezbeharra, Urreta auzoko San Joan jaietan. Dirudienez, ibilgailua kontrola galdu du, biribilgune batean irrist egin duelako, eta hesiaren atzean zeuden ikusleak aurretik eraman ditu.
Hainbat zauritu Galdakaon, auto-erakusketa batean
Ezbeharra Urreta auzoko San Joan jaietan gertatu da. Zaurituak Galdakaoko Ospitalera eraman dituzte; hala ere, gehienek ez dute zauri larririk, lehen informazioaren arabera.
Oraindik ere ikusten da ostiraleko sutearen ke arrastoa Gasteizko LEA-Lascaray enpresan
Gasteizko LEA-Lascaray enpresaren atarian hau da gaurko irudia. Oraindik ke arrastoa ikus daiteke, ostiraleko zoritxarreko sutearen ondorioz. Sugarrak kontrolpean dituzte, baina guztiz amatatu gabe daude oraindik. Enpresa erabat suntsituta geratu da, baina jabeek berreraiki egingo dutela jakinarazi dute.
Nico Williamsen irudia ezabatu dute ezezagunek, Barakaldon margotu zieten muraletik
Pintaketa bat agertu da Athleticeko jokalaria agertzen zen espazioaren gainean: "Joan edo geratu, errespetua galdu duzu". Bartzelona Futbol Klubaren balizko fitxaketarekin lotuta egon daiteke erasoa. Muralaren egilea oso haserre agertu da eta Athleticetik adierazi dute "Carlos Lopezen muraletik Nico Williamsen irudia ezabatu dutenek" ez dutela "Athletic ordezkatzen".
Hiru adin txikiko zauritu dira Castro Urdialesen, atrakzio batean istripua izanda
Gurutzetako Ospitalera eraman dituzte hiru zaurituak. Batek pronostiko erreserbatuko zauriak ditu, eta beste biak arin zauritu direla jakitera eman da.
Maiatzean Bakion desagertutako gizonarena izan daitekeen gorpua aurkitu dute Asturiasen
Maiatzaren 27an, 52 urteko gizon bat desagertu zen Bakioko hondartzara joan ostean. Euskadiko larrialdi zerbitzuek abisua jaso bezain pronto hasi zituzten desagertua aurkitzeko lanak baina ez zuten lortu. Matxitxakoko lurmuturraren eta Lemoizen artean itsasoan egin ziren miaketak.
“Elkartasun zapia”, Gazako herriari elkartasuna adierazteko kanpaina
Gernika-Palestina herri ekimenak “Elkartasun zapia” udako kanpaina aurkeztu du gaur Gasteizen. Zapia jaietan erabiltzeko proposatu dute, Gazako herriari elkartasuna adierazteko. Hiri eta herrietako jai eragile askorekin elkarlanean, Gernika-Palestinak gazatarren aldeko aldarrikapena jai guztietan presente egotea nahi du.
Baso-suteak sortzeko arrisku "handia" eta "oso handia" Nafarroan
Horren aurrean, tenperatura altuak diren bitartean, sua eragin dezakeen edozein jarduera saihesteko gomendatu du SOS Nafarroak.