Haurren transexualitatea, zazpi hizkuntzatan azalduta

"Neskak eta mutilak. Identitatea eta gorputza". Hala deitzen da ikasgeletan haurrekin transexualitatea lantzeko sortutako lehen material didaktikoa. Ikasmateriala Aingeru Mayor Chrysallis Euskal Herria elkarteko presidente eta sexologian adituak sortu du.

Denbora darama sarean euskaraz eta gaztelaniaz eskuragai, baina orain, arrakasta ikusita, osatzea eta beste bost hizkuntzatara (katalana, galegoa, italiera eta alemana) itzultzea erabaki dute. Hain justu, astearte honetan, Transexualitatearen eta Homofobiaren kontrako Egunean, aurkeztu dute bertsio berria.

Getxoko San Nikolas ikastolan darabilte gida, eta Chrysallis Euskal Herria elkartearen arabera, Sarean deskargatzeko aukera eman dutenetik, 330.000 lagunek eskuratu dute jada. Material honek modu sinple eta zuzenean azaltzen du transexualitatearen gaia, orain arte zegoen hutsunea beteta. "Neskak eta mutilak. Identitatea eta gorputza" ikasgeletan landu nahi zuen profesionalak euskaraz edo gaztelaniaz egiteko aukera zuen; orain, baina, beste bost hizkuntza izango ditu eskura.

Aingeru Mayorren hitzetan, "beharrizan bati erantzun diogu, orain errealitate hau lantzeko lehen baliabide bat izango dute maisu-maistrek, eta laster beste asko izatea espero dugu".

"Semeak ez du inoiz 'transexual' hitza entzun"

Hain zuzen ere, aurkezpen berri hau baliatuta, aluarekin jaio zen mutiko baten amarekin mintzatu da ETBko 'El Foco' erreportari taldea. Emakumeak azaldu duenez, umeak ez du inoiz "transexual" berba "potoloa" entzun: "Berak mutikoa dela dio, besterik gabe. Orain, dena den, badaki alua duten mutikoak daudela, eta zakila duten neskak".

Ikastolako gainerako haurrek nola hartu duten galdetuta, "normaltasuna" aipatu du ama bizkaitar honek. Izan ere, "inork esan baino lehen, eurek bazekiten mutikoa zena, bere jolasei eta moduei erreparatuta. Azkenean, inork ez die genitalei begiratzen", esan du.

Gurasoek ere ondo hartu dute errealitate hau. Hitzaldi informatibo bat eskaini zuten ikastetxean, eta harrera "bikaina" izan zuen. "Ez da inolako arazorik izan", erantsi du.

Harrera on horrek mesede egiten dio haurrari, ez duelako "une oro" egon behar bere izateko era defendatzen.

"Gure helburua ezagutza sustatzea da"

Aingeru Mayorrek prentsaurrekoan azaldu duenez, ume transexualak dituzten sendiak ohartu ziren eskoletan ez zegoela gai horri heltzen zion materialik. Horregatik erabaki zuten ikasmateriala prestatzea.

Ekimenak arrakasta izan duenez, elkartea prest agertu da Bigarren Hezkuntzako ikasleentzako materiala ere diseinatzeko, dena boluntarioekin egiteak lan andana badakar ere.

"Gure helburua da ezagutza sustatzea, gurasoek eta eskolek ume horiek entzun ditzaten, euren haurtzaroa gainerako haurrek bezala bizi dezaten: jolasten, ikasten eta harremanak izaten, ez negar egiten, sufritzen eta ezkutatzen", azpimarratu du Chrysalliseko presidenteak.