Bizkaian egongo da bidean dauden migratzaileak artatzeko zentro berria
Bizkaian egongo da euskal erakundeek bidean dauden migratzaileentzat egokituko duten zentro berria. Gaur egun, gehienez ere bost egun eman ahal dituzte harrera zentroetan, baina hiru aste pasatu ahalko dituzte aurrerantzean, zentro berria egokitutakoan.
Josu Erkoreka Eusko Jaurlaritzaren bozeramaileak baieztatu duenez, migratzaileek bi edo hiru aste eman ahalko dituzte zentro berrian, eta "litekeena da baliabide berri honen behin betiko kokapena Bilbo izatea".
Eusko Jaurlaritzak, foru aldundiek, Bilbo, Gasteiz, Donostia eta Iruneko Udalek eta elkarteek hartu dute zentro berri bat martxan jartzeko erabakia.
Erkorekaren esanetan, zentro horrek "gaixorik edo haurdun daudelako edo laguntza berezia behar dutelako ahultasun egoeran dauden pertsonak artatzea" ahalbidetuko du.
Eusko Jaurlaritzaren bozeramailearen arabera, "laster" aurkeztuko dituzte "behin betiko" erantzuna emango duen zentro honen "zehaztasun guztiak", migratzaileek "ahultasun egoera berezi hori gainditzeko behar duten denbora Euskadin igaro ahal izateko".
Bilboko alkatea ados agertu da
Bestalde, Eusko Jaurlaritzak bidean dauden migratzaileentzat egokituko duen zentro berria Bilbon egiten badu, erabaki horrekin ados egongo dela adierazi du Juan Mari Aburto Bilboko alkateak.
Euskadi Irratian egindako elkarrizketa batean jakinarazi duenez, bidean dauden migratzaileak hartzeko zentro berria Bizkaiko hiriburuan bertan edo Bilbo inguruan egitea aurreikusi du Jaurlaritzak.
Hala, Bilboko Udala gai horrekin zerikusia duten elkarteekin "elkarlanean" ari dela esan du Aburtok.
"Hiru egunez 88 pertsona hartzeko ahalmena duen zentro bat dugu Bilbon, eta kasu batzuetan bost egunera luza daiteke bidean dauden migratzaileen egonaldia", jakinarazi du Bilboko alkateak. Aburtoren ustez, zentro berrian 15 egun inguru egoteko aukera izango dute migratzaileek.
Albiste gehiago gizartea
Jendetza bildu da Andre Maria Zuriaren plazan, Zeledon agurtzeko
Zeledonen igoerak eman die amaiera Gasteizko jaiei, alaitasuna nagusi izan den sei egunen ostean. Jendetza bildu da goizaldean Andre Maria Zuriaren plazan, blusa eta nesken kuadrillekin elkartutako txarangen ondoan. Hala, Zalduondoko baserritar maitatua San Migel elizako dorrera itzuli da, datorren urtera arte.
22 urteko bi hildako eta bat larri zauritu dira Berantevillan izandako trafiko-istripu batean
Zauritua Txagorritxuko Ospitalera eraman dute.
Suhiltzaileak airez eta lurrez ari dira lanean Zarrakaztelun piztu den baso-sutean
Gau osoan lurretik lanean aritu ondoren, gaur goizean, 08:00etan, Nafarroako Gobernuaren aireko baliabideak batu zaizkie suhiltzaileei sua itzaltzeko lanetara.
Kanoikadaren eztandarekin, lehertu da Donostiako Aste Nagusia
Elikagaien Bankuaren eta Amara Berriko Auzo Elkartearen kanoikadak hasiera eman dio musikaz eta 380 jarduera baino gehiagoz beteriko zortzi eguneko jaiari; eta, nola ez, Su Artifizialen Nazioarteko lehiaketaren 60. edizioa izango dugu aurten.
Adingabe bat atxilotu eta hamar ikertzen ari dira uztailaren 20an Azpeitian izandako istiluengatik
Desordena publikoak eragitea eta agintaritzaren agenteen aurkako atentatua egitea egozten diete guztiei. Atxilotua, 16 urtekoa, aske utzi dute, beharrezko polizia-eginbideak bukatutakoan.
Beroak hauspotuta, zimitz izurritea Gorraitzen
Gorraitz herrian sekulako amesgaiztoa bizi dutela salatu dute bizilagunek. Beroak hauspotuta, astebete baino gehiago da zimitz izurrite batek herria hartu duela. Egoera horren aurrean, fumigatzeaz gain, prebentzio-neurriak ere exijitu dituzte herritarrek. Bideoan, Javier de Arbizu eta Ane Irigoien bizilagunek azaldu dute egoera.
Gasteiztarrak jaien amaiera borobilaz gozatzen ari dira, Zeledoni agur esan aurretik
Kalejirek eta txarangek hiriko kaleak girotu dituzte egunean zehar, aurreko egunetan bezala, eguraldia lagun zutela. Goizaldean, egunerokora itzuliko dira, txokolatea eta bizkotxoak hartu ondoren.
Ehunka lagun bildu dira Bilbon Palestinaren alde
Bilbo-Palestina herri ekimenak elkarretaratzea egin du Plaza Biribilean, Palestina askatzea eskatzeko eta Netanyahu "gizateriaren aurkako krimenengatik" salatzeko.
Bizkaiko hondartzak, karabela portugesik gabe
Larunbat honetan Bizkaiko kostaldeko hondartza guztietan bainua hartzeko aukera izango dugu, marmokarik gabe.
Auto-gidari bat hil da Tolosan, autobus batekin talka eginda
Lurraldebusek aldi baterako eten du zerbitzua Ibaiondo kaleko 1. eta Larramendi kaleko 8. atarien pareko geralekuetan.