Eutanasia ez zigortzeko eskatuz milioi bat sinadura aurkeztu dituzte Kongresuan

Change.org plataformak eutanasia ez zigortzeko eskatuz bildu dituen sinadurak eraman ditu gaur Diputatuen Kongresura: milioi bat baino gehiago dira. Despenalizazioaren aldeko aldarriaz gain, Angel Hernandezi, esklerosi anizkoitzak jotako Maria Jose Carrasco emazteari hiltzen lagundu zion gizonari (auzia Genero Indarkeriaren epaitegi batean dago), babesa erakutsi diote sinadurok.

Eutanasia gaia hizpide hartuta, plataforman eskaerak egin dituzten hainbat lagunek eraman dituzte sinadurak. Besteak beste, Angel Hernandez bera, Marcos Ariel Hourmann, eutanasia egiteagatik Espainiako Estatuan zigortutako lehen medikua, edota Maribel Tellaetxeren familia. Portugaleteko emakumeak alzheimerra zuen, eta martxoan hil zen. Haren familiak erakundeengana jo zuen lege aldaketa eskatzeko; izan ere, oraindik kontziente zenean eutanasia praktikatzea eskatu zien senitartekoei.

Biek milioi bat sinadura baino gehiago bildu dituzte: 374.000, eutanasia ez zigortzeko eskatuz, eta 600.000 baino gehiago, Angel Hernandez babestuz.

"Familiek ezin dute gehiago"

"Legea lehenbailehen onartu behar dute, familien sufrimendua hor dago, ezin dute gehiago. Eutanasia zigortzeari uzten dioten arte politikarien akuilua izango naiz. Angeles eta Maria Jose asko daude", adierazi du Hernandezek Kongresuaren aurrean egindako adierazpenetan.

Gogorarazi duenez, herritarren "gehiengoa" eutanasia arautzearen alde dago "baita Kongresuko Mahaia eta gehiengo aurrerakoiaren parlamentariak ere". Horren ustez, "Legea onartu behar dute, bai ala bai". Politikariei gobernua osatzeko eginahalak egiteko eskatu die, izapideetan aurrera egiteko.

Marcos Ariel Hourmann medikuak ere antzeko adierazpenak egin ditu: "Gobernua osatzeko gure politikariak ados jartzen saiatzen ari diren bitartean, milaka familia sufritzen ari dira eutanasia ez zigortzeko araudirik ez dagoelako"

Bestalde, David Lorente Maribel Tellaetxeren semeetako bat eta SOS Amatxu elkarteko kideak Euskadi Irratiari eskainitako elkarrizketa batean esan duenez, 'larrialdi soziala" da egoera, eta eutanasia arautuko duen legearen premia azpimarratu du berriz ere.

Tellaetxe, kazetarien galderei erantzuten. ETBko bideo batetik ateratako argazkia

Hala, Tellaetxe familia Kongresuan izan da gaur, baita Luis de Marcosen emaztea ere. De Marcosek esklerosi anizkoitz zuen eta 2017ko abuztuan hil zen. Zendu baino lehen gaixoek paratu behar duten "tematze terapeutiko krudela" salatu zuen.

Aurreko legegintzaldian heriotza duina eta zainketa aringarrien inguruko araudiak aurkeztu zituzten PSOEk eta Ciudadanosek, baina hauteskundeak aurreratu behar izan zituztela eta, ez ziren aurrera atera. Legegintzaldi honetarako, bestalde, PSOEk, Ciudadanosek eta Unidas Podemosek euren hauteskunde programetan sartu dituzte gaiaren inguruan dituzten proposamenak.