Saltoki handietan eros daiteke, lanetik etxera bidean

Koronabirusaren pandemiak eragindako alarma-egoeraren ondoriozko mugikortasun murrizketek baimendu egiten dute lanposturako joan-etorriko ibilbidean kokatutako saltoki eta azalera handietan erostea.

Dena den, elikagaiak edo bestelako produktu baimenduak eskuratzeko joan-etorriek behar diren gutxienekoak izan behar dute, eta gertuen dauden lekuetara joan behar da. Baimenduta dago, ordea, bizilekutik gertu dagoen azalera handi batera edo antzeko batera mugitzea.

Ertzaintzak eta udaltzaingoek osasun-alarmari buruz ezarritako irizpideen azken berrikuspenean jaso dira berritasun horiek, Eusko Jaurlaritzako Segurtasun Sailak asteazken honetan argitaratu duenez.

Zerbitzugune edo gasolindegi bateko jatetxe edo kafetegiei dagokienez, baimenduta dago catering zerbitzua gidari profesionalentzat bakarrik irekitzea. Halaber, bertako dendak elikagaien salmenta erraztu dezake gainerako erabiltzaileentzat.

Orain arte indarrean egon diren irizpideen beste aldaketa bati esker, elikagaiak eta nekazaritzako eta abeltzaintzako produktuak zuzenean saltzeko merkatu eta azoka tradizionalak (normalean astero) egin daitezke, osasun izaerako jarraibide jakin batzuk kontuan hartuta.

Merkatuak eta jai-azokak

Hala ere, aldi baterako etengo dira udalerrietan gizarte eta jolas izaera edo jai izaera duten nekazaritzako eta abeltzaintzako elikagaiak eta produktuak zuzenean saltzeko merkatu eta azoka tradizionalak.

Familia baratzetako lanari dagokionez, mugikortasuna eta egonaldia behar den denborarako egiten direnean baimentzen da, osasun-agintaritzak ezarritako neurriak errespetatuz. Ez dira kontuan hartzen bigarren egoitzetan dauden baratzeak.

Zilegi da produktuak biltzea, mantentze-lanak egitea, lurra ereiteko eta landatzeko prestatzea eta landatzea, ereitea, ureztatzea eta ongarritzea, baina ezin da inolako ekitaldi edo ospakizunik egin lurrean bertan edo finkatutako instalazioetan, iraunkorrak izan ala ez.

Bestalde, eten egingo da lehendik dauden eraikinetan esku hartzea, baldin eta obrarekin zerikusirik ez duten pertsonak badaude, obren sektorizazioa edo premiazko konponketak izan ezik. Fatxadak konpontzeko, aipatutako baldintzak bete beharko dira.

Azkenik, pertsonen garraio publikoari dagokionez, Osasun Sailak ezarritako neurriak errespetatuko dira, eta gutxienez metro eta erdiko distantziari eutsi beharko zaio, bi ahal bada, bidaiarien artean. Distantzia hori sarbideetan eta itxaroteko geletan edo nasetan ere mantentzea komeni da.