Hezkuntza Sailak klasera txandakako egunetan joatea proposatu du

Hezkuntza Sailak proposatu du astelehenetik aurrera, hilaren 25etik, ikastetxeetara itzuliko diren DBH, LH eta Batxilergoko 4. mailako ikasleek astean bi egunetan aurrez aurreko eskolak eta internet bidezko prestakuntza konbinatzea.

Cristina Uriarteren Sailak ostiral honetan jakitera eman du ikasturtearen azken zatian COVID-19aren pandemiaren aurrean ikastetxeetan jarduteko protokoloa, besteak beste, irakaskuntza-jarduerarako jarraibideak, higiene eta garbiketa-neurriak eta maskarak behar bezala erabiltzeko gomendioak emanez.

Prestakuntza presentzialerako itzulera aurreikusita zegoen Euskadin astelehen honetarako. Izan ere, azken egunetan, Hezkuntza Sailak hidrogelak, maskarak eta termometroak banatu ditu ikastetxeetan, langileen eta ikasleen tenperatura neurtzeko, Saileko iturriek jakitera eman dutenez.

Hala ere, Eusko Jaurlaritzak ostegun honetan iragarri zuen ikasgeletarako itzulera hilaren 25era atzeratuko zuela, "ziurgabetasun juridikoa" dela eta (1. faseak ez zuen aurreikusten ikastetxeak irekitzea), eta hezkuntza-komunitatea "gehiago ez tenkatzeko", Hezkuntza komuniateteak aurrez aurreko prestakuntza berreskuratzeko hartutako erabakia kritikatu baitzuen.

Zentroek askatasuna izango dute aurrez aurreko klaseetara itzuliko diren ala ez erabakitzeko, eta prebentzio-neurri batzuk jaso dituzte koronabirusaren kutsatzea saihesteko. Besteak beste, ikasleak astean bi egunetan ikastetxera joan daitezke prestakuntza- eta tutoretza-jardueretara, eta prestakuntza telematikoa jaso dezakete.

Nolanahi ere, ikasleak ez dira 5 ordutik gora egongo eskolan; beraz, eskolak ordutegi trinkoan emango dira eta ez da jantoki-zerbitzurik egongo. Ikasgeletan ezin izango dira 15 ikasle baino gehiago egon, eta haien mahaigainek 1,5 metroko distantziara egon beharko dute.

Gainera, derrigorrezkoa izango da ikasleek, irakasleek eta gainerako langileek maskara eramatea, eta ikastetxe bakoitzak sarrera eta irteera mailakatuak antolatu beharko ditu, eta, bi sarbide izanez gero, norabide bakarrekoak erabili.

Patioan pilaketarik ez sortzeko txandak ezarriko dira, eta gehieneko edukiera ezarriko da liburutegietarako, tailerretarako, informatika-geletarako edo laborategietarako. Txanda horietan, pertsonen arteko distantzia 2 metrokoa izango da beti.

Era berean, lan-materiala partekatzea saihestu beharko da, eta zentroetako garbitasuna areagotuko da.