PCRa egingo diote medikuarengana COVID-19aren sintomak jota bertaratzen den orori

Osakidetzak PCR probak egingo dizkie COVID-19aren sintomak jota ospitaleratzen dituzten edo lehen arretako zentro zein larrialdi zerbitzuetara joaten diren guztiei, baita adinekoen egoitzetan sintomatologia susmagarria agertzen dutenei ere.  

Nekane Murga Osasun sailburuak agindu bat argitaratu du gaur, asteartearekin, Euskadiko Aldizkari Ofizialean, kasu berriak azkar detektatzeko eta beren kontaktuak kontrolatzeko giza baliabideak eta antolaketa egitura zehazteko.

Agindu horri jarraituta, PCR proba egingo diete medikuarengana joaten diren guztiei eta adinekoen egoitzetan daudenei, sintoma hauek badituzte: sukarra, eztula, arnasestuak, odinofagia (eztarriko mina, irenstean), anosmia (usaimena galtzea), ageusia (dastamena galtzea), giharretako mina, bularreko mina, beherakoa eta buruko mina, besteak beste.

PCRak barik, azterketa serologikoak (test azkarrak) egin liezazkiekete, “sintomen zein puntutan dauden ikusita”.

Erakunde Sanitario Integratu (ESI) bakoitzean, “kasu eta kontaktuak kudeatzeko eremua” egongo da, erizain baten zuzendaritzapean, eta horrek hartuko du lehen arretako zerbitzuetan detektatutako kasuen ardura.

Aginduak kasuen ikerketa aste osoan zehar egin behar dela jasotzen du, jaiegunak eta asteburuak barne, eta, hartara, behin-behineko langileak kontratatuko dituzte zeregin horretarako, berehala eta urgentziaz.

Bestalde, lan arloan, Osalan Laneko Segurtasun eta Osasunerako Euskal Erakundea arduratuko da positibo berriak eta horien harremanak aztertzeaz.

Kasu berri bat detektatzen denean, eria eta horren kontaktuak etxean isolatzea gomendatuko dute eta PCRa egingo diete, harreman estua izanez gero. Go.Data Osasunaren Mundu Erakundearen aplikazioa erabiliko dute horretarako, sailburuaren aginduan jasota agertzen denez.