Osakidetzak 67 lagun artatu ditu azken 10 egunetan, tenperatura altuen ondorioz

Osakidetzako Larrialdi Zerbitzuek 67 pertsona artatu dituzte ekainaren 20tik 29ra bitartean egunotan Euskadin izaten ari diren tenperatura altuek eragindako gaitzak direla eta. Horietatik 37 ospitaleetara nahiz osasun zentroetara eraman behar izan dituzte.

Eusko Jaurlaritzako Osasun Sailak jakinarazi duenez, beroarekin lotutako intzidentzia kopururik handienak ekainaren 24, 28 eta 29an izan dira.

Lurraldeka, Gipuzkoan jazo dira kasu gehienak (40). Bizkaian bederatzi pertsona artatu behar izan dituzte, eta 18, Araban.

Artatutako pertsona horien adin tartea 11-94 urte artekoa izan da, eta gehienbat zorabioak, nekea eta desorientazioagatik jo dute osasun-etxeetara; batzuek konortea galdu ere egin dute. 

Tenperatura altuei aurre egiteko gomendioak

- Ohi baino likido gehiago edan, ura batez ere, eta ez itxaron egarri izan arte.

- Saihestu kafeina, alkohola eta azukredun edariak.

- Elikadurari dagokionez, otordu arinak egin (entsaladak, gazpatxoa, barazkiak, frutak...).

- Etxean, bero handiena egiten duen orduetan, leihoak itxi eta pertsianak jaitsi, eta aprobetxatu bero gutxien egiten duenean etxea aireztatu eta freskatzeko.

- Arropa zabala, arina eta kolore argikoa erabili, eta oinetako eroso eta freskoak.

- Bero handiko orduetan, ez atera kalera, eta, atera behar izanez gero, burua estali eta eguzkitako betaurrekoak erabili.

- Bero handiena egiten duen orduetan (12:00etatik 18:00etara) ez egin kirol- ariketarik eguzkitan, batez ere, intentsitate altukoak badira.

- Kalean jarduerarik egin behar izanez gero, ez ahaztu atseden hartzea, eguzkitatik babestea eta freskatzea (likidoak edan, burua freskatu eta abanikoa erabili).

- Bero handia sentituz gero, dutxa hartu edo ur hotzetan bainatu.

- Ez utzi inor aparkatutako edo itxitako ibilgailuen barruan, nahiz eta autoa itzaletan egon.

- Babestu pertsona zaugarrienak, arreta bereziz zaindu ume txikiak, adinekoak eta beroarekin zein deshidratazioarekin larriagotu daitezkeen gaitzak dituzten pertsonak; bihotzeko gaixotasunak dituztenak, kasurako.

- Adineko pertsonei dagokienez, egunean behin bisitatu, gutxienez, bakarrik bizi direnak eta laguntza behar dutenak bereziki, eta, behar izanez gero, gizarte-zerbitzuen laguntza eskatu, babes-neurriak hartzeko zailtasunak izan baititzakete.

- Osasun-arazoren bat baduzu:

  - Galdetu medikuari zer neurri osagarri hartu behar dituzun.

  - Botikak hartzen badituzu, jarraitu hartzen, baina ez hartu zeure kabuz, medikuak agindu gabe.

  - Makalik bazabiltza, utzi egiten ari zarena egiteari, saiatu leku fresko bat bilatzen eta laguntza eskatu.