Cerdanek epailearen galderei erantzun beharko die astelehenean, UCOren txostenaren ostean

Santos Cerdan PSOEko antolakuntza idazkari ohiak Leopoldo Puente Auzitegi Goreneko epailearen galderei erantzungo die astelehen honetan, UCOren txostenaren harira, ikertu gisa. Txosten horrek ustez Koldo auziko sarearekin eta obra publikoen esleipen irregularrarekin lotzen du Cerdan.

10:00etarako jarri diote hitzordua. Ikusmin mediatiko handiaren erdian agertuko da Santos Cerdan Auzitegi Gorenera. Izan ere, Guardia Zibilaren Unitate Zentral Operatiboak (UCO) ekainaren 12an egindako txostena eta Jose Luis Abalos ministro ohiarekin eta haren aholkulari ohi Koldo Garciarekin batera egindako audioak publiko egin zirenetik gertatutakoek harrabotsa sortu baitute. 

Galdeketa egingo dio epaileak, eta pentsatzekoa da erantzun egingo diela Cerdanek galdera horiek, are gehiago Cerdanek berak agerraldia publikoki eta zuzenean erretransmititzeko eskaera bitxia egin ostean. Magistratuak ez zuen eskaera hori onartu eta, beraz, legeak ezartzen duen gisan, ateak itxita deklaratuko du Cerdanek. 

Asteleheneko bistaren ostean aztertuko du epaileak kautelazko neurriak hartu ala ez. 

Enpresa gakoa: Servinabar

Cerdanek instruktorearen aurrean erantzun beharko du, bai UCOk desestali zuen esleipen publikoen ustezko sare ustelagatik, bai eta auzi honetan gako den Servinabar enpresarekin lotzen duen dokumentuagatik ere.

Izan ere, epaileak dagoeneko bere eskutan du Servinabar 2000 enpresako bazkide Antxon Alonso enpresariaren erregistroan aurkitutako kontratu pribatu bat. 2016ko kontratu horren bidez, PSOEko Antolakuntza idazkari ohiak esleipen susmagarrien onuradun izan den Servinabar enpresako bazkide bihurtu zen, enpresaren % 45 eskuratuta 6.000 euroren truke.

Enpresak ukatu egiten deu Cerdan inoiz enpersako bazkide izan denik, baina lau orrialde dituen kontratu pribatua Cerdanek eta Alonsok sinatuta dago, konpainiaren azken zigiluarekin. 

Enpresak 75 milioi euro baino gehiago jaso ditu Nafarroako Gobernuak emandako esleipen publikoengatik.

Abalos, Koldo, Cerdan triangelua

Epaileak ontzat jotzen du Guardia Zibilaren tesia, eta bere azken autoan Cerdanek, Abalosekin batera, "obra publikoen emakida irregularren truke sari ekonomikoak jaso" izanaren zantzuak aipatzen ditu, Cerdan izan daitekeelarik "bildutako zenbatekoak banatzeaz arduratzen zena".

Puentek "zantzu sendoak" ikusten ditu pentsatzeko Cerdanek erakunde kriminaleko eta funtzionario-eroskeriako delituak egin zituela pentsatzeko, Abalosen eta Koldoren aldeko sarietan 620.000 euro kudeatu ahal izan zituela adierazten duen txosten baten ondoren.

Eta, horregatik, haren ondarea ikertzeko agindua eman du epaileak, finantza-egoera ezagutzeko. Gainera, agenteek diligentzia bat egin zuten hilaren 20an Ferrazko PSOEren egoitzan, Cerdan posta korporatiboa aztertzeko; izan ere, agenteek uste dute Cerdanek helbide elektroniko hori eman ziola Koldori, bide horretatik bidal ziezaizkion "zenbait komunikazio garrantzitsu". 

Baina UCOk ikerketarekin jarraitzen duen bitartean, Cerdanek epaileari jakinarazi dio astelehen honetan bere ondarearen egoerari buruzko informazioa emateko asmoa duela, "gardentasunerako borondate argiaren" adibide gisa.

Azken erregistroak: fokua Adifen eta errepideetan

Gorenaren ikerketarekin paraleloan, Auzitegi Nazionaleko epaile bat Isabel Pardo de Vera Adifeko presidente ohiaren eta Javier Herrero Errepideetako zuzendari nagusi ohiaren ustezko esleipen irregularrak ikertzen hasi da.

UCOk ostegun honetan miatu zituen haien etxeak Madrilen – eta Pardo de Veraren beste etxe bat Espainia iparraldean-, eta Adifen eta Garraio Ministerioaren egoitzetara joan ziren berriro, dokumentazioa eskatzeko.

Ismael Moreno epaileak agindu zituen miaketa horiek. Izan ere bi pertsona horiek Abalosi, orduan bere aholkulari zen Koldo Garciaren bitartez, laguntza eman ziotela adierazten duten zantzuak igorri zizkion Morenori, beraiek proiektatutako esleipenak "ondo egin zitezen", ustez espedienteei buruzko informazioa emanez.