Hauteskundeetarako prest agertu dira euskal alderdiak, Sanchezen deialdiaren aurrean
EAJk esan du bere alderdiaren egitekoa ez dela "blokeak defendatzea", "Euskadiren interesak baizik". Bestalde, EH Bilduk adierazi du partida ez dagoela "erabakita", "eskuinari ateak ixteko aukerak" egon badaudelako. PSEk iritzi dio "aukera leiho zabala" emango dietela hauteskundeek herritarrei, eta PPk "aldaketarako aukera" gisa jo du bozka.
EAJren presidente Aitor Estebanek hauteskunde orokorren deialdiari buruz esan du bere alderdiaren egitekoa ez dela "blokeak defendatzea", "Euskadiren interesak baizik". Zentzu horretan, EAJren "elkarrizketa, negoziazio eta akordio eredu arrakastatsuari" egin dio azpimarra.
"Madrilek bere gatazkak ditu, baina Euskadik bere interesen alde egin behar du", adierazi du, eta EAJ hauteskunde deialdirako prest dagoela erantsi du; izan ere, "hilabeteak generamatzan esan eta esan legegintzaldiak ezin zuela gaur arte bezala jarraitu, alegia, proposamen zehatzak aurrera ateratzeko gutxieneko bermerik gabe".
"Gobernatzea ez da irautea, akordioak lortzeko eta herritarren hobe beharrez ematen ditugun aurrerapausoetan erreminta instituzionalak erabiltzea baino", gaineratu du.
"Aukera leiho zabala" ikusten du PSEk
PSE-EEren idazkari nagusi Eneko Anduezak iritzi dio "aukera leiho zabala" emango dietela hauteskundeek herritarrei "haien alde jarduten dutenen eta funts buitreak babesten dituztenen artean" aukeratzeko aukera izango dutelako.
"Euskadiren eta Espainiaren historian momentu oso garrantzitsua da", azpimarratu du.
PSNko Ainhoa Unzuk ziurtatu du sozialistak "dena ematera" aterako direla, eta defendatu du hauteskundeetan "gizarte eredu baten edo bestearen" eta "herri baten etorkizunaren" inguruan erabakiko dela.
Horrekin lotuta, PSOEren "eredu aurrerakoiari" buruz esan du "herri osoa" hartzen duela kontuan, "nehor baztertu gabe".
EH Bilduren ustez, "bloke atzerakoia garaitu daiteke"
EH Bilduren idazkari nagusi Arnaldo Otegik "itxaropen mezua" helarazi die euskal herritarrei; haren hitzetan, "bloke atzerakoiaren" eta "marra horren beste aldean" daudenen artean "partida ez dago bukatuta eta irabazi egin behar da". Ziur esan du Euskal Herrian "bloke atzerakoiari irabazi" egingo zaiola, eta gaineratu du, EH Bildurengatik bada, eskuin atzerakoiak ez duela "ez Espainiako Estatuan, ez Frantziakoan, ezta inon ere gobernatuko".
Exekutibaren bileraren ostean emandako prentsaurrekoan, Otegik gogorarazi du bere alderdiak azaroaren 14rako iragarri zuten manifestazioarekin hasiko duela kanpaina.
Otegiren aurretik, EH Bilduko Harreman Politikoetarako idazkari eta Senatuko bozeramaile Gorka Elejabarrietak ere hitz egin du Sanchezen deialdiaren ostean, eta adierazi du bere alderdia prest dagoela hauteskundeei aurre egiteko. "Partida ez dago erabakita, eskuinari ateak ixteko aukerak baitaude", esan du.
Ildo beretik hitz egin du EH Bilduren Nafarroako bozeramaile Laura Aznalek ere eta EH Bildu bere siglekin aurkeztuko dela baieztatu du.
"Euskadik behar duen aldaketa ekarriko dute hauteskundeek", PPren aburuz
PPren Euskadiko presidente Javier de Andresek adierazi du "Euskadik behar duen aldaketa" ekar lezaketeela hauteskundeek.
"Espainia guztiaren onerako izango da aldaketa, baina bereziki Euskadirako", esan du. Izan ere, De Andresen esanetan, "Euskadiri ez zaio sozialismoa komeni, ezkerrak hartutako neurriak ez dira onak erkidegorako".
Nafarroako PPren presidente Javier Garciak Sanchezen iragarpena ospatu du. "Sanchezek edo Espainiak irabaztea, dekadentzia ala aldaketa, gezurra ala aldaketa, gaitasun eza ala aldaketa, banaketa ala aldaketa, ustelkeria ala aldaketa, horien artean aukeratu behar da", ohartarazi du.
"Etorkizunari ilusioz begiratzeko aukera", UPNk
UPNren presidente Cristina Ibarrolak "etorkizunari ilusioz begiratzeko aukeratzat" jo ditu hauteskunde orokorrak Espainian eta Nafarroan.
"Polarizazio etapa atzean utzi eta aurrera egin, eraiki eta aukera berriak eskainiko dituen herrialde bat berreskuratzeko garaia da", zehaztu du X sare sozialean "aldaketa guztion esku dago. Espainiak eta Nafarroak hori behar dute", erantsita.
Geroa Baik Nafarroak erabakitzeko gaitasuna izatea nahi du
Pablo Azconak (Geroa Bai) azpimarratu du Nafarroak "erabakitzeko gaitasuna" izan behar duela, "eskuin muturrak eta bere politikek" aurrera egin ez dezaten.
Hala eta guztiz ere, eskatu du hauteskundeek ez dezatela Nafarroako egoera politikoa oztopatu, "legealdia aurerra doa eta konpromiso politikoak ditugu", argitu du.
Zurekin Nafarroak "ezkerreko aliantza" handia eraiki gura du
Zurekin Nafarroaren eledun Carlos Guzmanek "ezkerreko aliantza handiak" eratzearen alde egin du. Hauteskundeei begira dituen planei buruz ezer gutxi aurreratu du, datozen egunetan emango baitute horren berri.
Vox Nafarroaren ustez, "azterketa garaia da oraingoa"
Voxeko Emilio Jimenezen aurreratu du orain hasiko dela "herritarren azterketa". Voxen zerrendei buruz ere hitz egin du, eta "onenak" aurkeztuko dituela esan.